Yohuserya 2

Muluku Tani?

Muluku evelevelo tani ni nsinanawe tani? (1, 2)

Ti mwili wawihai owo oriyeno? (3)

Tisivi siri mikhalelo sawe sawoneyasha vanchipale? (4)

Tiwaphama opharihela muteko sophwaniherya ni ineneryo mu olapela? (5)

Makhalelo tani meli yawo nnahalahu owerya ohuserya etchu volocha sa Muluku? (6)

1. Atchu annalapela itchu sinchipale. Nyenya Biblia onnanlela wi orivo Muluku EVELEVELO mmoha pahi. Yowo opatunshe sothene irivovo wirimu ni velaponi. Nthowa na onivaha okumi, Mekheiye yowo nnaphwanelahu omulapela.—1 Akorinto 8:5, 6; Yawupulula 4:11.

2. Muluku okhala ni masina manchipale a itchu onereiye, nyenya orino nsina nimoha pahi. Nsinanlo ti YEHOVA. Mwa a Biblia anchipale, nsina na Muluku nokumihiwamo nave niheliwakamo nsina na itchu onereiye APWIYA nari MULUKU. Nyenya vava arempwiye Biblia nsina nawi Yehova nanaphwanyiwamo mummo ikwaha sawakhwana 7.000!—Eksodo 3:15; Masalmo 83:18.

3. Yehova okhala ni mwili, nyenya ohikhala ntoko yawihu. “Muluku ti Munepa”, Biblia onlocha hiha. (Yohane 4:24) Munepa ori makhalelo mamoha a okumi mutokwenesha opwaha wawihu. Havovo mutchu omonne Muluku. Yehova onakhala wirimu, nyenya owo onnawerya wona sothene. (Masalmo 11:4, 5; Yohane 1:18) Vanonto, eheni, munepa wawela? Tahi mutchu olikana ni Muluku. Nyenya, iri ikuru sowerya sa Muluku.—Masalmo 104:30.

4. Biblia onnanupululela makhalelo a Yehova. Onnoniherya wii sophwanelela sawe sitokwene ti osivela, ekekhai, miruku, ni owerya. (Detronomiu 32:4; Yobu 12:13; Yesaya 40:26; 1 Yohane 4:8) Biblia onnanlelatho wii owo ta ikharari, epewe, okhurumuwela, ovaha ni ovilela. Hiyano ntoko anamwane awiwelela, ninnaphwanela wavyavya omutakiheriya.—Aefeso 5:1, 2.

5. Ninnaphwanelela okokhorela vamithoni va sophwaniherya, sopatcha akhweya ineneryo, akhweya ovekelela seiho mu othamalela wahu? Hoe! (Eksodo 20:4, 5) Yehova oni wii ninphwanela omulapela yoworu pahi, owo hankawana nchichimiho nawe ni mukina nari ni etchu ekina. Sophwaninherya hisanono ikuru sonikhaviheryano.—Masalmo 115:4-8; Yesaya 42:8.

6. Timwawihai nnahalahu ophiyerya omusuwela Muluku phama? Makhalelo mamoha ari oweha itchu seiho owo opatunshiye ni wupuwelela mwawisherya mu seiho sinnupululelaya. Sopatushiwa sa Muluku sinninoniherya wii owo otepa okhalano owerya nimiruku. Ninnona osivela wawe musothene seiho opankeiye. (Masalmo 19:1-6; Aroma 1:20) Makhalelo makina a ohuserya etchu volocha sa Muluku ori omuhuserya Biblia. Mummo owo onnanlela vanchipale volocha sa makhalelo mummo Muluku okhanliye. Onnanlelatho volocha sa sotchuna sawe ni volocha sa seiho ontchuniye wii nipakeke.—Amosi 3:7; 2 Timoteo 3:16, 17.

[Iruku va epaaxina 5]

Ninnahuserya orwela mu sopatushiwa ni sa Biblia etchu volocha sa Muluku