Moonelo wa Muluku Vooloca sa Nikhami

Nikhami ti noochuneyaxa. Nahaarino nikhami, haavo mmoha a hiyo aahaala okhala mukumi. Woona wi Muluku mpatusa, owo ookhalano ophwanelela wa onleela mukhalelo nikhami nnaphwanelaaya ophariheliwa. Tiheeni owo olonceiye sa nikhami? Apwanne ninnaphwanela ociwa naari ophariheliwa mu oloola? Nave muni nwerye hai opaka soolakelela saphaama vooloca sa mwaha yoola?

1. Tuuvi ori moonelo wa Yehova vooloca sa nikhami?

Yehova aahiloca wa alapeli awe akhalai wi: “Okumi wa enama yoothene ori munikhamini mwaya.” (Onamukutxho 17:14) Wa Yehova, nikhami nneemelela okumi. Okumi yamahala yasisapo yoorweela wa Muluku, mwawiihiiha nikhami tho ti nasisapo.

2. Mukhalelo taani wa opharihela nikhami Muluku onawatiiheiye?

Ohaakumve otikitheryiwa muloko woopacerya Weekristu, Yehova aahaaleela alapeli awe wi ehilyeeke nikhami. (Mwaalakhanye Maphatxuwelo 9:4 ni Onamukutxho 17:10.) Omanle otikitheryiwa muloko Weekristu, Yehova aahuuluulela nlamulo nimohamoha wa Akristu. Nikhuuru Noolamulela naahivahererya yooleeliherya ela: ‘Muthanyeke . . . nikhami.’—Mwaalakhanye Saweriwa T’arummwa 15:28, 29.

Othanya nikhami onataphulela eheeni? Waakhanle wi totore ohooleelaani wi muhiwuryeke soowurya soohapaliha, tiheeni mwaahaalaanyu weera? Apwanne yaahaala okhala ya miruku olyaaka sooca seiho saakanyeryiwe ni soowurya soohapaliha naari oheleliwa mmisipheni mwanyu? Mweeparipari hooye. Mmukhalelo mmohamoha, nlamulo na Muluku na othanya nikhami nnataphulela wi hannaphwanela owurya nikhami naari mano okhuura enama yeeyo ehihitiwe. Nave tho hannaphwanela olya yoolya yeeyo eheliwemo nikhami.

Nki vooloca sa oloola okina yoowo onaphariheliwa nikhami? Mikhalelo mikina sa oloola ti sawooneya wi sinnavuhana ni nlamulo na Muluku. Eyo enaphitaanyerya ovahiwa nikhami naari makupa masese oochuneya a nikhami aniichaniwa: Glóbulos vermelhos, glóbulos brancos, plaquetas ni plasma. Nyenya mikhalelo mikina sa oloola, akhweya onamukhala woovila osuwela waakhanle wi sinnavuhana ni nlamulo na Muluku naari hooye. Ntoko yootakiherya, mikhalelo mikina sa oloola sinnapharihela ifrasau seiyo inarweela mmakupa oochuneya a nikhami; akina annapharihela nikhami na mwaneene yoowo oniiceliwa. Vaavaa muchu onalakeleleiye echu ya weera, mmoha ti mmoha a hiyo onaphwanela opaka yoolakelela mukhateiye.a—Galasya 6:5.

OHUSERYA MWAWIISEELA

3. Muthanle oloola yoowo onahaala omuhakalaliha Yehova

Muni nwerye hai othanla oloola yoowo oniiwanana ni muupuwelo wa Muluku vooloca sa nikhami? Moone EXILEMA, nave voocharela muthokororye ochuneya waya opharihela muteko ipontu sinacharela.

EXILEMA: Como tomar decisões sobre tratamentos de saúde que envolvam o uso do sangue (5:47)

• Mvekele mvekaka miruku.—Tiyako 1:5.

• Mutholathole malakiheryo a Mpiipiliyani nave voocharela moone mukhalelo wa opharihela.—Masiposipo 13:16.

• Musuwele mikhalelo sa oloola seiyo inaphwanyeya mpuro munakhalaanyuwo.

• Musuwele mikhalelo sa oloola seiyo muhinahaalaanyu weemererya.

• Moone waakhanle wi yoolakelela anyu enahaala oweerihaani okhalano yawuupuserya-ya-murima yaphaama.—Saweriwa T’arummwa 24:16.b

• Muupuwele wi haavo onahaala wooleelaani vooloca sa yoolakelela taani munaphwanelaanyu opaka, mmiyaha seiho sinavolowela yawuupuserya-ya-murima anyu, naamwi muchu owo aari iyanyu, mwaarinyu, mutokweene a mmulokoni, naari muhusiha anyu a Piipiliya.—Aroma 14:12.

• Murepe yoolakelela anyu wi akina esuwele.

4. Anamoona a Yehova annaavya oloola yoowo ori woophwanelela

Ti wooweryeya wiiwelela nlamulo na Muluku vooloca sa nikhami nave tho mweelukuluku emohamoha naavyaka oloola yoowo ori woophwanelela ohinaphariheliwa nikhami. Moone EXILEMA,

EXILEMA: Entrevista com o Dr. Massimo P. Franchi (1:36)

Mwaalakhanye Tito 3:2, nave voocharela muthokororye nikoho nla:

• Ntakhara heeni nnaphwanelaahu waacicimiha ni okhala oomaaleleya vaavaa nnalocaahu ni matotore?

5. Vaavaa inaphariheliwaaya ifrasau sa nikhami

Nikhami nookhalano makupa masese oochuneya: Glóbulos vermelhos, glóbulos brancos, plaquetas ni plasma. Makupa yaala masese ananwerya okawanyiwa mmakupa makhaani, yaawo aniichaniwa ifrasau sa nikhami.c Ifrasau ikina sinnaphariheliwa mmurece yoowo onamaaliha ereca naari onahiiha okhuma wa nikhami.

Vooloca sa nikhami, Mukristu ti Mukristu onaphwanela opaka yoolakelela awe, mwawiiwanana ni yawuupuserya-ya-murima awe evyakihiwe ni Piipiliya. Akhweya akina anamulakelela okhooca oloola yoowo onaphariheliwa ifrasau sa nikhami. Nyenya akina ananwerya weemererya.

Vaavaa munapakaanyu yoolakelela anyu, muthokororye nikoho nla:

• Kini kimutharihele hai totore mathowa anakeeriha okhooca naari weemererya ifrasau sammoori sa nikhami?

MUKWASU

Yehova onachuna wi ncicimiheke nikhami.

Makoho awuuluulela

• Ntakhara heeni nikhami ti nasisapo wa Yehova?

• Nnasuwela hai wi nlamulo na Muluku na othanya nikhami ninnaphitaanyerya makupa a nikhami?

• Muni mpake hai soolakelela saphaama vooloca sa oloola yoowo onaphariheliwa nikhami?

OTHOLATHOLA

Tiheeni munaphwanelaanyu wuupuwela muhaakumve olakelela waakhanle wi munahaala weemererya oloola yoowo onaphariheliwa nikhami na muchu mwaneene?

“Perguntas dos leitores” (A Sentinela, 15 de outubro de 2000)

Tiheeni munaphwanelaanyu wuupuwela waakhanle wi munahaala weemererya naari hooye ifrasau sa nikhami?

“Perguntas dos leitores” (A Sentinela, 15 de junho de 2004)

Tiheeni yaamweerinhe totore mmoha weemererya wi moonelo wa Yehova vooloca sa nikhami ti woophwanelela?

“Aceitei o conceito de Deus sobre o sangue” (Despertai!, 8 de dezembro de 2003)

Moone mukhalelo anna analapa mu Nikhuuru Nniiwanana ni Exipitali anaakhaviheryaaya anna ni arokora.

Jeová ampara os doentes (10:23)