Mmuhusihe Mwaninyu Okhala Oovilela

OVILELA TIHEENI?

Muchu oovilela ti yoowo oniilipixerya emanle weereya echu yoonanara. Mavyakelo ala anaphwanyeya moorweela wa saweereya. Hiiha ntoko mwaana onahusereiye weeca phaama moorweela wa othoowa ikwaha ikina, muchu hawerya ohuserya okhumelela phaama ahikumanaka ni makacamiho.

NTAKHARA HEENI OVILELA TI WOOCHUNEYA?

Anamwane akina annakhala ooceecheya vaavaa anakumanaayano yaweeha, okumana ni makacamiho naari vaavaa akina anawoonaaya wi aahesa. Akina annavolola. Mwa yeeyo, awo anaphwanela wiiwexexa miyaha iha inacharela:

• Hanikhumelelaka phaama wa ichu soothene nnapakaahu.—Tiyako 3:2.

• Muchu ori oothene onahaala okumanano makacamiho mweekumini.—Eklesiyaste 9:11.

• Mphurevo echu wakhala wi muchu ohooleelaani wi moohesa.—Masiposipo 9:9.

Ohuserya ovilela mu sookacamiha enamwaakhaviherya anamwane anyu osuwela, wi ananwerya okhumelela phaama ni makacamiho a muukumini.

MUKHALELO WA OMUHUSIHA MWANINYU OKHALA OOVILELA

Vaavaa mwaninyu onaheseiye.

NLAKIHERYO NA MPIIPILIYA: “Awookololowa murima naari uuwale ikwaha thanu napiili, onarwa avinya.”—Masiposipo 24:16.

Mmukhaviherye mwaninyu osuwela nikacamiho naakhanle ntokweene naari hooye. Ntoko yootakiherya, tiheeni onahaaleiye weera wakhala wi hakhumelenle phaama mu eporova osikola? Owo onanwerya ovolola alocaka: “Nkinaweryaru weera echu yaphaama!”

Wi mmuhusihe mwaninyu okhala oovilela, mmukhaviherye wuupuwelela mmukhalelo oneereiye apake phaama ekwaha ekina. Mmukhalelo yoowo, owo onahaala weererya orehererya nikacamiho nave hakiiphwanyerya mathowa.

Mu elukuluku emohamoha, mwaninyu ahesa muhaakuvele orehererya nikacamiho. Moohiyana, mmukhaviherye mukhalelo wa orehererya meekheiye. Nyuwo munanwerya omukoha: “Tiheeni onaphwanelaawe weera wi wiiwexexe phaama mwaha yoola?”

Vaavaa makacamiho aneereyaaya.

NLAKIHERYO NA MPIIPILIYA: “Nyuwo hamunasuwela echu enii ephacuwe omeelo.”—Tiyako 4:14.

Ekumi henakhoveleleya. Muchu ori a muhakhu olelo omeelo onamukhala oohaawa; muchu orino ekumi yaphaama olelo, omeelo onamwiiceliwa. Piipiliya oni: “Motxhimakani tahi wi mahiku othene onavotha ti yole òveyasa; mw’ekhotxoni, tahi yoleru awupasa onavotha mahiku othene . . . Txhiri orèriwa ni otakhaliwa, honamuthanla mutxhu.”—Eklesiyaste 9:11, BNM.

Ntoko mulipa ooyara, mpake soothene munaweryaanyu wi mmukhaviherye mwaninyu va yawoopiha. Oloca eparipari, honi okhale wooweryeya omukhapelela mwaninyu mu ichu soothene soonanara.

Vaavaa mwaninyu onahooleleiye ichu soohiciha, ntoko yootakiherya, vaavaa nthamwene awe onakhweiye naari muchu aveemusini, mmukhaviherye ovilela ni mikhalelo seiya. Mmukhalelo yoowo munnamuhusiha mukhalelo wa orehererya makacamiho makina unnuwa, ntoko wakhala wi ooyeleela muteko naari ohikhalano ikhorowa.a

Vaavaa mwaninyu onalakiweiye.

NLAKIHERYO NA MPIIPILIYA: “Owiriyane olopoliwa . . . wi okhale a miruku mahiku aa amuhoolo.”—Masiposipo 19:20.

Wakhala wi muchu oomuleela mwaninyu wi ookolole muupuwelo wammoori, tahi wi onachuna omoopopiha naari omuhooxa mwaninyu nto onachuna omukhaviherya otoroka echu enachuneya wi ookolole.

Vaavaa munamuhusihaanyu mwaninyu weemererya olaka, oothene anyu munahaala okhaviheryeya. Tiithi mmoha oniichaniwa John oriye: “Wakhala wi anamwane hanalakiwa wa soohesa saya, awo herwa ehuseryavo echu. Awo anahaala okhalano makacamiho mancipale mookumini, nave ntoko mulipa ooyara munahaala otitelela waakhulaka milacu seiyo anatannyaaya. Eyo enahaala weeriha wi okumi wa alipa ooyara ni wa mwaana okhale woothananiha.”

Muni mmukhaviherye hai mwaninyu okhaviheryeya orweela wa olaka? Vaavaa mwaninyu onalakiweiye—moohipwacha waari oxikola naari mpuro vyakala—musepe oloca wi awo hiyaaphwanela omulaka. Moohiyana, munaphwanela omukoha mwaninyu:

• “Mathowa taani aweerinhe olakiwa?”

• “Oni okhaviheryeye hai?”

• “Tiheeni onahaalaawe weera mu ekwaha ekina wakhala wi ori mmukhalelo yoola?”

Muupuwele wi, olaka onahaala omukhaviherya mwaninyu, ohiya hiihaanoru pahi, koma tho omwaahiyu.