MWAHA 6
Achu Okhwa Ari Woowi?
Tiheeni eneereya ni hiyaano nakhwa?
Ntakhara heeni ninnakhwa?
Mano enahaala okhala yoohakararyiha osuwela eparipari vooloca sa okhwa?
1-3. Makoho taani achu anapakaaya vooloca sa okhwa, nave ikerexa sincipale inavaha maakhulo taani?
ALA makoho yaawo achu anapakaaya opacerya khalai. Awo makoho oochuneyaxa. Moohipwacha makhalelo ahu naari wiiwo nnakhalaahuwo, maakhulo aya toochuneyaxa wa muchu ori oothene a hiyo.
2 Mmwaha ovinre, noothokororya ti mwawiihai mukucho wa woopola wa Yesu Kiristu ohunlaaya ephiro ya okumi woohimala. Noohuserya wi “horwa okhalavotho okhwa” ntoko Piipiliya onaloceiye. (Wupulula 21:4) Hiihaano, oothene hiyo ninnakhwa. Mwene a miruku Soolomoni aaloca: “Akumi annasuwela wi anamukhwa.” (Eklesiyaste 9:5) Ninnachuna okhalano okumi elukuluku yincipale. Naamwi hiiha, ninnakacamiheya ni yeeyo enahaala weereya ni hiyaano nakhwa.
3 Hiyaano ninnathanana yakhwa achu nnasivelaahu. Akhweya ninnakoha: ‘Tiheeni eneereya ni yaawo? Mano awo annahooxeya? Awo annanoona? Hiyaano nnawerya waakhaviherya? Nnahaala owoona awo nihiku nikina?’ Ikerexa sa mulaponi sinavaha maakhulo ohiyana hiyana a makoho yaala. Ikina inahusiha wi wakhala wi murino okumi waphaama, munahaala oya wirimu nyenya wakhala wi murino okumi woonanara, munahaala weeyeliwa onipuro na cukucha a mooro. Ikerexa ikina inahusiha wi va okhwa, achu anaya o elapo yohooneya ya minepa wi yakhale ni makholo aya akhalai. Ikerexa ikina inahusiha wi achu ookhwa anaya vathi va elapo wi yathorihiwe nave yayariwe wanaawiili mu mwiili mukina.
4. Ikerexa sincipale irino muupuwelo taani vooloca sa okhwa?
4 Mahusiho a ikerexa soothene iha irino muupuwelo mmoha—wi hiyaano nookhalano echu enapwahiherya okhala ekumi muchu amanle okhwa. Mwawiiwanana ni ikerexa soothene sa khalai ni sahihano, hiyaano mmukhalelo mukina ninnakhala ni okumi woohimala niweryaka woona, wiiwa, ni wuupuwela. Mano, eyo enaweryeya hai? Owerya wahu, vamoha ni muupuwelo ahu woothene oniiwanana ni muteko wa ocoopare. Va okhwa, ocoopare onnahiya ophara muteko. Miruku sahu, muupuwelo, ni makhalelo hanapwahiherya ophara muteko mukhataaya mu mukhalelo woohisuweliwa. Iho hasinavuluwa va okhwa wa ocoopare.
TIHEENI ENEEREYA VA OKHWA CHIRYENE?
5, 6. Piipiliya onahusiha eheeni vooloca sa mukhalelo wa achu ookhwa?
5 Yeeyo eneereya va okhwa ti yawiiweyaxa wa Yehova, Mpatuxa a ocoopare. Owo onnasuwela eparipari, nave mu Masu awe, Piipiliya, owo onnathariha mukhalelo wa achu ookhwa. Yoohusiha yawiiweyaxa ya Piipiliya ti ela: Muchu akhwa, haanono okumi. Okhwa ti ohikhalano okumi. Achu ookhwa hanawerya woona naari wiiwa naari wuupuwela. Hiyaano hinaanono echu yoohooneya enavuluwa va okhwa wa mwiili. Hinaanono munepa woohikhwa.a
6 Soolomoni amanle oloca wi achu akumi annasuwela wi anahaala okhwa, owo aarepa: “Nto akhwile hanasuwelaru etxhu.” Vanonto, owo aahunnuwiha mathipelo eeparipari ela moorweela wa oloca wi achu ookhwa hanawerya osivela naari wiica nave “mmahiyeni honeriwamo etxhu nave mwemmo hiwamo wupuwela, osuwela ni miruku.” (Mwaalakhanye Eklesiyaste 9:5, 6, 10.) Moophwanaphwana, Salumu 146:4, onnaloca wi muchu akhwa, “nihiku nenlo sinnarimela sawupuwela sawe.” Hiyaano ninnakhwa nave hannavuluwa va okhwa wa mwiili ahu. Okumi nryaahuno ori ntoko nikalume na eveela. Nikalume naxipihiwa, nlo hannaya onipuro nikina. Nikalume nlo nnamuxipha pahiru.
TIHEENI YESU AALONCEIYE SA OKHWA
7. Yesu aalonce wi okhwa onaphwanaphwana ni eheeni?
7 Yesu Kiristu ooloca sa mukhalelo wa alipa ookhwa. Owo aaheerano hiiha ni Lasaro, mulopwana yoowo aamusuwenleiye phaama nave aakhwile. Yesu aahaaleela oohuserya awe: “Làzaro onamukona.” Oohuserya awo yuupuwela wi Yesu aaloca wi Lasaro aamurupa nthowa na wiiceliwa, nave aahaala openuwa. Nyenya tahi yeeyo Yesu aaloceiye. Yesu aathariha: “Làzaro òkhwa.” (Mwaalakhanye Yohani 11: 11-14.) Nkoonani, Yesu oophwanaphwaniha okhwa ni wiichuuwa ni orupa. Lasaro haari wirimu naari mu cukucha a mooro. Owo haakele okumana ni ankeelo naari makholo akhalai. Lasaro haakele oyariwa ntoko muchu mukina. Owo aamurupa muukhwani, ntoko ikhove sawiixa soohikhalano oloha. Soorempwa sikina sinnaphwanaphwaniha tho okhwa ni orupa. Ntoko yawooniherya, vaavaa muhuserya Stefano aavonyiweiye maluku ophiyerya okhwa, Piipiliya onaloca wi owo “árupa.” (Saweriwa Tarummwa 7:60, NN) Moophwanaphwana, murummwa Paulo oorepa wi akina mu mahiku awe “árupa” muukhwani.—1 Akorinto 15:6, NN.
8. Nnasuwela hai wi okhwa wa achu tahi yookhwela ya Muluku?
8 Apwanne okhwa wa achu, yaari yookhwela yoopacerya ya Muluku? Hooye! Yehova aapatunxe achu wi ekhale okhala wookhala veelaponi yavathi. Hiihaa ntoko nihusenryaahu wuupaceryani wa liivuru ola, Muluku aamukuha mulopwana ni muthiyana oopacerya mu parataiso ooreera. Owo aahaavaha okumi woophaameya. Yehova aachuna pahiru wi awo ekhale phaama. Mano aakhalavo asitiithi anachuna wi anamwane aya yoone masooso, wuuluvala ni okhwa? Mwevelevelo hooye! Yehova aanaasivela anamwane awe nave aanachuna wi awo epuhe okumi woohimala veelaponi yavathi. Vooloca sa achu, Piipiliya onii: “Mw’atxhu Muluku òkuhamo otxhuna osuwela sotikhiniha s’elapo.” (Eklesiyaste 3:11) Muluku onipatunxe ni yoochuna ya okhala ni okumi woohimala. Nave owo oopaka marehereryo wi akhwaaniherye yoochuna eyo.
NTAKHARA HEENI ACHU ANNAKHWA
9. Nlamulo taani nenlo Yehova aamvanheiye Aatamu, nave ntakhara heeni nlamulo nlo hinaari noovila wiiwelela?
9 Ntakhara heeni, vano, achu annakhwa? Wi niphwanye naakhulo, nnaphwanela othokororya yeeyo yeeren’ye mu elukuluku yeele vaavaa mulopwana ni muthiyana mmoha yaaraaya veelaponi yavathi. Piipiliya onnathariha: “Apwiya Muluku, yàmeliha vatxheyani miri sa milokomiloko: sàri sorèra wona nave sawima saya sàri sosiva.” (Maphatxuwelo 2:9) Nyenya naakhalavo nlamulo nimoha. Yehova aamulamulela Aatamu: “Oni onalya sawima sa miri sa mmatxani, nto ohilye sawima sa mwiri yole onasuweliha yaphama ni yonanara. Walya sa yowo onamukhwa!” (Maphatxuwelo 2:16, 17) Nlamulo nla hinaari noovila wiiwelela. Sakhalawo miri mikina mincipale seiyo Aatamu ni Haava yaaphwanelaaya olya. Nyenya nlamulo nla naahaavaha ekari yavameekhaaya wi yooniherye othamalela waya wa Muluku yoowo aavanhe ichu soothene, ophitaanyerya okumi woophaameya. Wiiwelela waya waahaala wooniherya tho wi awo yaanacicimiha olamulelo wa Atiithi aya a wirimu nave tho wi yaanachuna ohoolela wawe woosivela.
10, 11. (a) Mutheli oopacerya aaphiyenrye mwawiihai ohimwiiwelela Muluku? (b) Ntakhara heeni ohiiwelela wa Aatamu ni Haava waari mwaha mutokotoko?
10 Moothananiha, mutheli oopacerya aathanla ohimwiiwelela Yehova. Alocaka moorweela wa enowa, Satana aamukoha Haava: “Txhiri Muluku oholèlani wi muhilyeke sawima sa miri iri mmatxani?” Haava aahaakhula: “Hoye, hiyano novahiwa sawìma sa miri sa mmatxani! Muluku onihìhale pahi olya sawima sa mwiri ori veri v’ematxa ariki: ‘muhilyeke sawima sa mwiri yowo, nari mano muhiphareke, vawi muhikhwe!’”—Maphatxuwelo 3:1-3
11 Satana aaloca: “Tahi eparipari wi mwalya munamukhwa, ti wi, Muluku òsuwela wi, mwalya sawima iho, mìtho anyu anamuhuleya, munamukhala ntoko yowo: munamusuwelaka yorèra ni yonanara.” (Maphatxuwelo 3:4, 5) Satana aachuna wi Haava eemererye wi owo aahaala wiiphwanyerya moorweela wa olya yawiima yaawateeliwe. Mwawiiwanana ni yoowo, Haava aanwerya othanla mukhateiye yeeyo yaari yaphaama naari yoonanara; owo aahaala weera yeeyo aachuneiye. Satana aaloca tho wi Yehova aahootha sa yookhumelelavo ya olya yawiima eyo. Haava aamweemererya Satana. Mwawiihiiha owo aarukula yawiima eyo nave aalya. Voocharela vaya, Haava aamvaha iyawe, nave owo tho aalya yawiima eyo. Awo hiyeenre echu eyo moohisuwela. Yaanasuwela chiryene wi yeerano echu yeeyo Muluku aaleenleiye wi eheere. Moorweela wa olya yawiima eyo, awo mwaayiini yaachekela nlamulo nookhweya nave noophwanelela. Yaahooniherya omunyemula Muluku ni olamulelo awe. Ohimucicimiha Mpatuxa aya oosivela yaari echu yoohiphwanela okhurumuweliwa!
12. Tiheeni enahaala onikhaviherya wi niiwexexe ti mwawiihai Yehova oonneiye vaavaa Aatamu ni Haava yaachanraaya ephiro ya omwiica Yehova?
12 Wi nooniherye: Nyuwo mwahaala wiisoona mwawiihai wakhala wi moomphuwa mwaana, avinyaka ahiwiiwelelani mmukhalelo onooniherya wi owo haarino ncicimiho naari osivela wa nyuwo? Eyo yahaala owiicelaani. Vano, nkaanyiheryani wiicela Yehova ooneiye vaavaa Aatamu ni Haava yaachanraaya ephiro ya omwiica Yehova.
13. Tiheeni Yehova aalonceiye wi yaahaala weereya ni Aatamu mu okhwa, nave ela enataphulela eheeni?
13 Yehova haarino nthowa wi apwahiherye waaphuwa achu oohiiwelela, Aatamu ni Haava, okhala wookhala. Awo aakhwa, hiiha ntoko Muluku aalonceiye. Okumi wa Aatamu ni Haava woomala. Awo hari mu elapo yoohooneya ya minepa. Hiyaano noosuwela ela nthowa na yeeyo Yehova aalonceiye amanle omuthoriha Aatamu nthowa na ohiiwelela wawe. Muluku aaloca: ‘Onarwa otxhikela vatxheyani vavale wakhumalawevo: ntakhara weyano wa ntxhupi nave vantxhupini onamukokelavo.’ (Maphatxuwelo 3:19) Muluku aampatunxe Aatamu mwa nchupi na echaya. (Maphatxuwelo 2:7) Ahaakumve opatuxiwa, Aatamu haakhanlewo. Vanonto, vaavaa Yehova aalonceiye wi Aatamu aahaala ochikela vachayani, Owo aataphulela wi Aatamu aahaala orimeela. Aatamu aahaala ochikela ohikhalano okumi hiihaa ntoko nchupi nenlo owo aapatuxiweiyeno.
14. Ntakhara heeni ninnakhwa?
14 Aatamu ni Haava yaamukhala akumi ophiyerya olelo, nyenya awo aakhwa nthowa nawi awo aathanla ohimwiiwelela Muluku, nave mwawiihiiha awo yaacheka. Hiyaano ninnakhwa nthowa nawi yoocheka ni okhwa wa Aatamu sohaavolowela anamwane awe oothene. (Mwaalakhanye Aroma 5:12.) Yoocheka eyo eri ntoko ereca yoorava, haavovo muchu onawerya ochawa. Okhwa ti yookhumelelavo aya. Okhwa ti mwiicani, tahi nthamwene. (1 Korinto 15:26) Hiyaano nnaphwanela othamalela vancipale nthowa nawi Yehova oonivaha woopola wi anivuluxe mwa mwiicani ootakhala ola!
TI WAPHAAMA OSUWELA EPARIPARI VOOLOCA SA OKHWA
15. Ntakhara heeni ti yoohakararyiha osuwela eparipari vooloca sa okhwa?
15 Yeeyo Piipiliya onahusiheiye vooloca sa mukhalelo wa achu ookhwa ti yoohakararyiha. Hiiha ntoko noonnaahu, achu ookhwa hanoona masooso naari wuukhuwa. Hinaavovo nthowa na owoova, awo hanawerya oniphoreiha. Awo hanachuna nikhaviheryo nahu, nave hanawerya onikhaviherya. Hiyo hannawerya oloca ni yaawo, nave awo hanawerya oloca ni hiyo. Ahooleli ancipale a malapelo annaloca mwa wootha wi annawerya waakhaviherya achu ookhwa, nave achu anaaroromela ahooleli yaawo annaavaha ikhorowa. Vanonto, osuwela eparipari vooloca sa okhwa ennanikhaviherya wi nihihuwelihiwe ni yaawo anahusiha sawootha seiyo.
16. Taani ovolowenle mahusiho a ikerexa sincipale, nave mmukhalelo taani?
16 Ekerexa anyu enneemererya yeeyo Piipiliya onahusiheiye vooloca sa okhwa? Ikerexa sincipale hasineemererya. Ntakhara heeni? Nthowa nawi mahusiho aya aavoloweliwa ni Satana. Owo onnapharihela muteko malapelo atheru wi achu yeemererye wi muchu akhwa, onahaala opwahiherya okhala mukumi o elapo yoohooneya ya minepa. Satana onapharihela muteko wootha iwo ni sawootha sikina wi aahuwelihe achu wi emwalane ni Yehova Muluku. Mano mwawiihai?
17. Ntakhara heeni nihusiho na ohooxiwa woohimala hinnamucicimiha Yehova?
17 Ntoko noonnaahu wuupaceryani, ikerexa ikina inahusiha wi wakhala wi muchu aarino okumi woonanara, akhwa onahaala oya onipuro na cukucha a mooro wi ahooxeye okhala wookhala. Nihusiho nla hinnamucicimiha Muluku. Yehova ti Muluku a osivela nave harwa aahooxa achu mmukhalelo yoola. (Mwaalakhanye 1 Yohani 4:8.) Nyuwo mwahaala woona hai vooloca sa muchu onamuhooxa mwanawe oohiiwelela moorweela wa ohela matata awe vamooroni? Nyuwo mwammucicimiha muchu owo? Apwanne mwahaala ochuna omusuwela? Moohikhwa minikwa hooye! Mwaahaala wuupuwela wi owo tootakhala vancipale. Vano, Satana onachuna wi hiyaano nroromele wi Yehova onnaahooxa achu omooroni okhala wookhala!
18. Waakokhorela achu ookhwa onathipeliwa mu wootha taani wa ikerexa?
18 Satana tho onnapharihela ikerexa ikina wi sihusiheke wi achu yakhwa, annathatuwa minepa seiyo inaphwanela ocicimihiwa ni okokhoreliwa ni achu akumi. Mwawiiwanana ni nihusiho nla, minepa sa achu ookhwa inanwerya okhala asinthamwene akuru naari amwiicani awoopiha. Achu ancipale annaroromela wootha iwo. Awo annawoova achu ookhwa nave annaacicimiha ni waakokhorela. Moohiyana, Piipiliya onahusiha wi achu ookhwa anamurupa nave wi hiyo nnaphwanela omukokhorela Muluku eeparipari pahiru, Yehova, Mpatuxa ni Mvuluxa ahu.—Wupulula 4:11.
19. Osuwela eparipari vooloca sa okhwa enanikhaviherya wiiwexexa yoohusiha taani ekina ya Piipiliya?
19 Osuwela eparipari vooloca sa achu ookhwa enamookhapelelani wi muhihuwelihiwe ni sawootha sa ikerexa. Eyo tho enamookhaviheryani wi mwiiwexexe mahusiheryo makina a Piipiliya. Ntoko yawooniherya, vaavaa munasuwelaanyu wi va okhwa achu hanaya o elapo yoohooneya ya minepa, yoolaiherya ya okumi woohimala mu parataiso veelaponi yavathi ennakhala yeeparipari wa nyuwaano.
20. Nikoho taani nnahaalaahu othokororya mmwaha onacharela?
20 Khalai, Yupu mulopwana eekhaikhai aapaka nikoho nla: “Mutxhu okhwile onnakoka akhala?” (Yobi 14:14) Onnaweryeya muchu ohirino okumi onarupa muukhwani okookiheryiwa okumi? Yeeyo Piipiliya onahusiheiye vooloca sa yeela ti yoohakalaliha vancipale, hiiha ntoko mwaha onacharela onahaalaya wooniherya.
[Nsu na vathi]
a Wi moone otharihiwa wa nsu nawi “munepa,” khwoo vareryani Masu Awaaceererya “Achu Aakhalano Munepa Ohinakhwa Chiryene?.”
PIIPILIYA ONAHUSIHA EHEENI
▪ Achu ookhwa hanoona naari wiiwa naari wuupuwela.—Eklesiyaste 9:5.
▪ Achu ookhwa anamukona; awo hanahooxeya.—Yohani 11:11.
▪ Hiyaano ninnakhwa nthowa nawi noorava yoocheka ya Aatamu.—Aroma 5:12.
[Eruku va epaaxina 59]
Nikalume nikele woowi?
[Eruku va epaaxina 60]
Yehova aapatunxe achu wi ekhale veelaponi yavathi okhala wookhala
[Eruku va epaaxina 62]
Aatamu aarweenle onchupini, nave okookenle onchupini