Ari akavi Anamoona a Yehova mwaasuwenlaanyu? Akhweya tho akina amwaacamanaanyu, asinthamwene oomutekoni, naari ooxikola. Akhweya nyuwaano montoko ochekula ni mmoha a hiyaano vooloca sa Piipiliya. Hiyaano naani chiryene, nave ntakhara heeni ninnalaleerya soororomela sahu wa achu oothene?

Hiyaano naachu pure. Nnarweela mmaloko oothene ni makhalelo oohiyanahiyana. Akina a hiyaano khalai naakhala mu ikerexa sikina, akina tho hiyaamweemererya Muluku. Nto, oothene hiyo nihaakumve okhala Anamoona, nohiivaha elukuluku wi naalikhele moomaaleleya soohusiha sa Piipiliya. (Saweriwa Tarummwa 17:11) Nivinyaka neemererya ichu nihusenryaahu, navetho nthanla omulapela Yehova Muluku.

Hiyaano noophura mwa omuhuserya Piipiliya. Ntoko achu oothene, hiyaano nookhalano makacamiho ni soocecheya sahu. Mu ochariha malakiheryo a Piipiliya mu okumi ahu wa nihiku nnihiku, ninnoona orukunuwa mwa phaama. (Salmo 128:1, 2) Ti nthowa nimoha nnaneeriha okawana ni akina ichu saphaama seiyo nihusenryaahu Mpiipiliyani.

Hiyaano nnakhala mwawiiwanana ni malakiheryo a Muluku. Malakiheryo ala, oorweela Mpiipiliyani, annanikhaviherya okhala phaama ni waacicimiha tho akina, vamoha ni makhalelo ntoko ororomeleya ni ophaameya. Awo annaakhaviherya achu okhala phaama mweelaponi, nave tho annakhaviherya waataana veechokoni ni meecelo aphaama. Nthowa na ororomela wi “Muluku hano nthalu” hiyaano ninneemererya wi na emusi emoha veelaponi yoothene, yawaataana moorweela wa soororomela sahu. Naamwi nri achu pure, hiyo naachu oohiyana.​—Saweriwa Tarummwa 4:13; 10:34,35.

• Anamoona a Yehova anaphwanaphwana hai ni achu akina?

• Malakiheryo taani Anamoona a Yehova ahusenryaaya Mpiipiliyani?

Achu ancipale anuupuwela wi Anamoona a Yehova nsina na ekerexa evyaani. Nyenya, opacerya khalai ovira miyakha 2.700, arummwa a Muluku eeparipari yaasuweliwa ntoko “anamona” awe. (Isaiya 43:10-12, BNM) Ophiyerya mu eyaakha 1931, hiyaano naasuweliwa ntoko Oohuserya a Piipiliya. Ntakhara heeni nikunxaahu nsina Anamoona a Yehova?

Nla nnamweemelela Muluku ahu. Mwawiiwanana ni soorempwa ni mata sakhalai, nsina na Muluku, Yehova, ninnaphwanyeya ikwaha masana masaneene Mpiipiliyani. Mu a Piipiliya ancipale nsina na Muluku nla nooraceelihiwa ni masina a ncicimiho, ntoko Apwiya naari Muluku. Nyenya, Muluku eeparipari aahiisooneiha meekheiye wa Moose moorweela wa nsina nawe, Yehova, ariki: “Ti nenla nsina naka wa mahiku othene.” (Mukwaha 3:15, BNM) Mwawiihiiha, yene ohiihiyaniha meekheiye ni amuluku oothene atheru. Hiyaano ninniirumiha okuxa nsina naweela na Muluku.

Nla nnooniherya muteko ahu. Achu ancipale akhalai, opacerya ni mulopwana eekhaikhai Haavele, yaavaha onamoona wa nroromelo naya vooloca sa Yehova. Moovira wa iyaakha masana masaneene, Noowa, Aaparahamu, Saara, Moose, Tavite, ni akina yaapaka makupa a ‘neku ntokotoko na anamoona.’ (Ahebri 11:4–12:1) Hiihaa ntoko muchu aweerela onamoona va mulacu ntakhara muchu mukina ohirino nthowa, hiyaano noolakelela osuweliha eparipari vooloca sa Muluku ahu.

Nnamutakiherya Yesu. Piipiliya onnamwichana owo “namona óroromeleya ni éparipari.” (Yawupulula 3:14) Mwaneene Yesu aaloca wi ‘ahoniherya nsina na Muluku’ nave atitelela ‘werela namona ni eparipari’ vooloca sa Muluku. (Yohane 17:26; 18:37) Oomuchara a Kiristu eeparipari anaphwanela okuxa nsina na Yehova ni weeriha wi nsuweliwe. Ti yeeyo Anamoona a Yehova aniilipixeryaaya weera.

• Ntakhara heeni Oohuserya a Piipiliya aakuxa nsina nawi: Anamoona a Yehova?

• Opacerya liini Yehova oreiyeno Anamoona veelaponi yavathi?

• Taani ori Namoona oopwahaxa a Yehova?

Piipiliya aaloherya wi amanle okhwa Kiristu, ahusiha atheru yaahaala okhumelelavo variyari va Akiristu oopacerya ni onanariha eparipari ya Piipiliya. (Saweriwa Tarummwa 20:29, 30) Moovira wa elukuluku, eyo yaaheereya. Awo yaahakanyerya mahusiheryo a Yesu ni muupuwelo wa ikerexa sa amalapo, nave Akiristu atheru yaapacerya. (2 Timoteo 4:3, 4) Nnii nsuwele hai wi olelo ninniiwexexa phaama yeeyo Piipiliya onahusiheiye?

Elukuluku yaaphiya wi Yehova ooniherye eparipari. Owo aalaiherya wi ‘nihiku nomaliha osuwela phama’ waahaala osareya. (Daniyeli 12:4, BNM) Muyakha wa 1870, nikhuuru nikhaani naachu yaavya eparipari yaahoona wi mahusiheryo mancipale a ikerexa hiyaarweela Mpiipiliyani. Hiiha, awo yaahipacerya waavyaavya wiiwexexa soohusiha soopacerya sa Piipiliya, nave Yehova aahaakhaviherya omwiiwexexa Piipiliya.

Achu eeparipari yaamuhuserya Piipiliya moomaaleleya. Oohuserya a Piipiliya oopacerya, yaachara mukhalelo wa ohuserya yoowo hiyaano nnapharihelaahu muteko olelo. Awo yaamuhuserya Piipiliya mwaha ni mwaha. Vaava yaaphwanyaaya makupa a Piipiliya oovila wiiwexexa, awo yaanavarerya iciciri ikina sinataphulela makupa yaawo. Emanle ophwanya soorepa siniiwanana ni makupa oothene a Piipiliya, awo yaanarepa. Mu omuhiya Piipiliya wiitaphulela mukhateiye, awo yaaphwanya eparipari vooloca sa nsina na Muluku ni Omwene awe, yookhwela awe wa achu ni elapo yavathi, mukhalelo wa alipa ookhwa, ni ewehereryo ya ovinya muukhwani. Otholathola waya waahaakhaviherya okhala ootaphuwa mu saweera ni a soororomela sincipale satheru.​—Yohane 8:31, 32.

Muyakha wa 1879 Oohuserya a Piipiliya yaahiiwexexa wi elukuluku yaaphiya wi esuwelihe eparipari veelaponi yoothene. Mu eyaakha yeela, awo yaapacerya opaka erevista Mulipeleli Alaleyaka Omwene wa Yehova yeeyo hiyaano nnapharihelaahu muteko olelo. Vano, hiyo ninnakawana eparipari ya Piipiliya ni achu mu ilapo sawaakhwana 240 nave mu ilocelo soopwaha 750. Esuwelelo yeeparipari hetonko osareya ntoko olelo!

• Amanle okhwa Kiristu, tiheeni yeeren’ye ni eparipari ya Piipiliya?

• Tiheeni enikhavihenrye ophwanya eparipari ya Masu a Muluku?

Khalai Anamoona a Yehova, ahaapharihela muteko, ahaakumiha, nave ahaakawa Apiipiliya oohiyanahiyana. Nyenya, hiyo naahoona wi waanakhweleya omutaphulela Piipiliya ahaala waakhaviherya achu ohuserya “eparipari”, yeeyo eri yookhwela ya Muluku wa achu oothene. (1 Timoteo 2:3, 4) Mwawiihiiha, mu eyaakha ya 1950 hiyaano naapacerya okawa makupa a Piipiliya ahu a elocelo ahihano, Tradução do Novo Mundo. Piipiliya yoola ootaphuleliwa moororomeleya ni mwevelevelo mu ilocelo soopwaha 130.

Aanakhweleya Piipiliya ookhweya omwiiwexexa. Voovira wa elukuluku ilocelo sinnatorokeya, nave Apiipiliya ancipale aakhalano masu oovila wiiwexexa. Nave tho, soorempwa ni mata sa khalai seeparipari seiyo siracenle soopacerya saaphwanyiwa, ikhaviherya wiiwexexa phaama ilocelo sa Piipiliya, Eheepri, Aramaiko, ni Ekriki.

Aanakhweleya Piipiliya oororomeleya mu masu a Muluku. Ohiya orukunuxa soorempwa sooveereliwa sa Muluku, alipa ootaphulela a Piipiliya anaphwanela okhala oororomeleya mu soorempwa soopacerya. Nyenya, mu Apiipiliya ancipale, nsina na Muluku, Yehova, nooviihiwamo mu Soorempwa Saweela.

Aanakhweleya Piipiliya onavaha ncicimiho wa mwaneene Muluku. (2 Samuwele 23:2) Mu Tradução do Novo Mundo, nsina na Yehova nookookiheriwamo ikwaha 7.000 mmapuroni naaryaayamo mu Apiipiliya akhalai oorempwa ni mata ntoko yooniheriwaaya vathi va. (Salmo 83:18) Ntoko yookhumelelavo ya iyaakha sincipale sa ohuserya wa wiilipixerya, Piipiliya ola onnahakalaliha omwaalakhanya ntakhara wi onnooniherya phaama muupuwelo wa Muluku. Mwaarino Tradução do Novo Mundo mu elocelo anyu naari hooye, hiyaano ninnoovekaani wi mwiikhovelelihe phaama waalakhanya Masu a Yehova mahiku oothene.​—Yosuwa 1:8; Salmo 1:2, 3.

• Ntakhara heeni aanakhweleya Piipiliya muvyaani?

• Muchu ori oothene onachuna ohuserya yookhwela ya Muluku, onaphwanela weera echu taani yaphaama mahiku oothene?