Achu ancipale aahiya oya ovekela okerexa, nthowa na ohiphwanyawo malakiheryo oomunepani. Mano ntakhara heeni nyuwaano munnaphwanela oya o mithukumano Seekiristu sa Anamoona a Yehova? Tiheeni munahaalaanyu ophwanyawo?

Iwo munahaala okhala oohakalala variyari va achu anasivelana ni anakhapelelana. Mu nsana noopacerya, Akiristu yaari ooreheryeya mmilokoni, nave awo yaanathukumana wi emulapele Muluku, emuhuserye Piipiliya, ni olipihana mukina ni mukhwaawe. (Ahepri 10:24, 25) Vaavaa yaathukumanaaya mmukhalelo woosivela, yaanoona wi yaari variyari va asinthamwene eeparipari​—anna aya oomunepani. (2 Atesalonika 1:3; 3 Yohane 1:14) Hiyaano nnachariha ntakiheryo na Akiristu a nsana noopacerya nave ninnoona ohakalala omohamoha.

Mphurelo wa opharihela muteko malakiheryo a Piipiliya. Hiihaa ntoko yeereyaaya khalai, alopwana, athiyana, ni anamwane oothene annathukumana vamoha. Ahusiha oophwanelela annampharihela muteko Piipiliya wi enikhaviherye wiiwexexa mukhalelo wa opharihela muteko malakiheryo a Piipiliya mu okumi ahu. (Malamulo 31:12; Nehemiya 8:8) Achu oothene annakhalano ekari ya wooniherya nroromelo naya moorweela wa wiipa ni ovahererya maakhulo.​—Ahepri 10:23.

Nroromelo nanyu wa Muluku nnahaala okhala noolipa. Murummwa Paulo aahiloca wa mmoha wa miloko sa mmahiku awe: “Kókhala minkhela yawonana ni nyuwo, . . . wi nyuwo mukilatheye; ti wi, miyo kahitheyihiwe vamoha ni nyuwo, mwa nroromelo na hiyo ópíli, nawinyu n’náka.” (Aroma 1:11, 12) Mmithukumanoni, okumana wahu vamoha ni annihu onnalipiha nroromelo nahu ni yoolakelela ahu ya okhala mwawiiwanana ni malakiheryo a Piipiliya.

Ninnoowopani wi muye omuthukumanoni wahu onacharela wi moone mukhatinyu ichu seiya ni miitho anyu. Nyuwo munahaala waakheliwa ni mata meeli. Mithukumano soothesene ti sa mahala​—honavekiwawo ikhorowa.

• Mithukumano sahu Seekiristu sinachariha ntakiheryo nawani?

• Nnii niphure hai moorweela wa oya omithukumanoni Seekiristu?

Naari mu ilukuluku sookacamiha hiyaano ninnathukumana moohihiyererya. Naamwi nrino makacamiho a okumi naari ovelavela ntakhara olapa muteko, ntakhara heeni hiyaano nniilipixeryaahu othukumana ni anna?

Ela ti yookhweleya wi nikhale phaama. Alocaka sa yaale nnathukumanaahuno vamoha Paulo aahi: “Nanyiheryane mukina ni mukhwawe.” (Ahebri 10:24) Nsu nla nnataphulela “wuupuwela moomaaleleya,” ti wi, osuwelana mukina ni mukhwaawe. Mwawiihiiha masu a murummwa annanceenyerya wi naathokororye akina. Mu osuwela imusi sikina Seekiristu, hiyaano ninnoona wi awo avootha sookacamiha soophwanaphwana ni sawihu nave awo ananwerya onikhaviherya wi nivoothe ntoko yaawo.

Ela ennapakiha onthamwene woohimala. Mmithukumanoni mwahu, ninnakhala vamoha, ohiya pahiru ni amusi, nyenya nnikhuuru na asinthamwene awaataana. Mu ilukuluku sikina ninnathukumana vamoha wi nthate. Mareeliho mancipale nnaphwanyaahu vookhala vamoha. Hiyaano ninnahuserya waacicimiha annihu, nave eyo ennalipiha osivelana wahu. Vanonto, vaava asinthamwene ahu anakhalaayano makacamiho, mwawaakuveya ninnaakhaviherya ntakhara noopaka onthamwene woolipa. (Masiposipo 17:17) Moorweela wa opaka onthamwene ni achu oothene a mmulokoni mwahu, hiyo ninnooniherya wi nri ‘oophwanaphwana ni othokororyana mukina ni mukhwaawe.’​—1 Akorinto 12:25, 26.

Ninnoocenyeryaani wi mwaathanle asinthamwene mwa yaale aneera yookhwela ya Muluku. Nyuwo munahaala waaphwanya asinthamwene ntoko yaala variyari va Anamoona a Yehova. Khwoo muheemererye wi echu ekina yoohiiheni opaka onthamwene ni hiyaano.

• Ntakhara heeni ti waphaama okhala vamoha mmithukumanoni?

• Mano ti liini nyuwaano munachunaanyu osuwela muloko ahu?

Vaavaa Akiristu oopacerya yaathukumanaaya, yaaniipa, yaanavekela, yaahaalakhanya ni ohuserya Soorempwa​—soothene hisaarino mihapo. (1 Akorinto 14:26) Nyuwo munahaala ophwanya ichu soophwanaphwana mmithukumanoni mwahu.

Mahusiheryo anarweela Mpiipiliyani nave annaphara muteko. Murunku ori woothene, muloko ti muloko onnathukumana wi ewiriyane Mwaha wa Piipiliya wa aminutu 30 wooniheryaka mummo Soorempwa sinakhaviheryaaya okumi ahu ni vooloca sa ilukuluku nnakhalaahu. Oothene ninnaceenyeryiwa wi nicharihe mwaha mu Piipiliya ahu. Wamala mwaha, ennacharelavo Yoohuserya ya “Mulipeleli” ya ewora emoha, achu oothene annakhalano ekari ya waakhula mu yoohuserya ela enarweela mu erevista Mulipeleli. Yoohuserya ela ennanikhaviherya opharihela muteko malakiheryo a Piipiliya muukumini mwahu. Erevista emohamoha ennahuseryiwa mmiloko sahu soothene opwaha 110.000 veelaponi yoothene yavathi.

Ninnakhaviheryiwa okhalano mavyakelo a ohusiha. Va esumana ninnathukumana wi niwiriyane makupa mararu a muthukumano aniichaniwa Okumi ni Muteko Ahu Weekristu, anarweela mu miyaha sinalaleeryiwa mweeri ti mweeri mu Yoochariha ya Mithukumano ya Okumi ni Muteko. Nikupa noopacerya na muthukumano, Muhakhu wa Masu a Muluku, ninnanikhaviherya wiikhoveleliha ni makupa a Piipiliya. Voocharela Wiikhoveleliha Mmuteko Woolaleerya onaphitaanyerya sawooniherya mmukhalelo wa oloca sa Piipiliya ni akina. Namiruku onnavaha moonelo awe wi anikhaviherye wunnuwiha mavyakelo ahu. (1 Timoteo 4:13) Nikupa nookuchula, Okumi Weekristu, nnathokororya malakiheryo a Piipiliya mu okumi wa nihiku nnihiku. Nla nnaphitaanyerya okoha ni waakhula mwaha yoowo onaaceererya omwiiwexexa wahu Piipiliya.

Mwaphiya omithukumanoni wahu, moohikhwa minikwa, munahaala otikhina ni mahusiheryo aphaama a Piipiliya munahaalaanyu waakhela.​—Yesaya 54:13.

• Tiheeni munaweheryaanyu wiiwa mmithukumanoni mwa Anamoona a Yehova?

• Mithukumano taani sa esumana munachunaanyu woona?

Nyuwaano mohoona iruku mu eproxura ela mukhalelo Anamoona a Yehova anawaraaya yaayaaka mmithukumano saya? Ntakhara heeni hiyaano nnathokororyaahu vancipale mukhalelo wa owara ni wiireherya?

Ela enooniherya ncicimiho wa Muluku ahu. Eparipari wi Muluku hanaweiwano mukhalelo ahu wa vaate. (1 Samuwele 16:7) Naamwi hiihaa, vaava nnathukumanaahu wi nimulapele owo, yookhwela ahu yeevelevelo ti omucicimiha yoowo ni waacicimiha alapeli akhwiihu. Waakhanle wi hiyaano nnaya oloca ni muthoriha mutokweene, naahaala othokororya wi mawarelo ahu annooniherya ncicimiho nthowa na otokweene awe. Moophwanaphwana, owara wahu phaama nayaaka mmithukumanoni ennooniherya ncicimiho nahu wa “muthoriha a elapo,” Yehova Muluku, ni nipuro nenlo nnamulapelaahu yoowo.​—Maphatxuwelo 18:25, BNM.

Ela enooniherya malakiheryo anahoolela okumi ahu. Piipiliya onnaaceenyerya Akiristu wi ewareke yoowara ‘yophwanelela, ni wuliwa muru [ntoko] omuthamala Muluku.’ (1 Timoteo 2:9, 10) Owara yoowara ‘yophwanelela’ onataphulela osepa ikuwo soohiphwanelela nthowa na okhala sookwaculiha, saweeha, naari sawooneela. Navetho, “wuliwa muru” onnanikhaviherya othanla soowara sooreera, sihiri soonyala. Malakiheryo ala nlelo annavaha oneethi wa othanla wa muchu meekheiye. Nihilonce masu, owarela wahu phaama onnawerya ‘oreriha mahusiheryo a Mvulushahu’ nave ‘annamuchichimiha Muluku’. (Tito 2:10; 1 Petro 2:12) Moorweela wa owara wahu phaama nayaaka mmithukumano, hiyaano ninnaweeriha akina ocicimiha malapelo a Yehova.

Muhemererye wi soowara sanyu soohiiheni ophiya Ompa ya Omwene. Hiyaano nnanwerya owara phaama naamwi nihirino soowara soowalamela.

• Ntakhara heeni ti woochuneya owara phaama vaava nnamulapelaahu Muluku?

• Malakiheryo taani ananihoolela mu othanla wahu mukhalelo wa owara ni wiireherya?

Wakhala wi nyuwaano munnamuhuserya Piipiliya ni mmoha a Anamoona a Yehova, munniilipixerya oreherya makupa munayaanyu ohuserya nihiku nihiphin’ye. Wi mphure phaama, ti waphaama weera emohamoha muhaakumve oya omuthukumano wa muloko. Mphurelo waphaama onakhumelela mwa wiikhoveleliha weerano eyo.

Muthanle elukuluku ni nipuro na ohuserya. Elukuluku taani munaweryaanyu wiichaala phaama? Wooxixelo muhaakumve opacerya muteko, naari ohiyu, anamwane emanle oya okona? Naamwi nyuwaano muhiweraka omaliha elukuluku yincipale muhuseryaka, muthanle elukuluku munaweryaanyu, nave muheemererye wi echu ekina yoohiiheni weerano ela. Mwaavye nipuro noomaaleleya, nave mvihevo ichu soothene sawaakanyerya ntoko ommaaliha raatio, televisau, ni telefone. Ovekela muhaakumve ohuserya onahaala wookhaviheryaani ohiipiwa murima ni makacamiho a nihiku, nave munanwerya oweiwa ni Masu a Muluku.​—Afilipi 4:6, 7.

Mvahe eneneeryo, nave mwiireherye wi mwaakhule. Mpacerye ni ovarerya mwawaakuveya mwaha woothene. Muupuwele muru wa mwaha, muthokororye mummo muru ori woothene mukhaani oniiwananaaya ni muru mutokweene, nave mwaalikhele iruku soothene ni makoho awuuluulela yaawo anathoonyerya miyaha soochuneya. Mwamala, mwaalakhanye eparakrafo eri yoothene, nave mwaavye naakhulo na nikoho nlo. Mwaavye nave mwaalakhanye soorepa siromoliwe, nave muupuwele mukhalelo sinakhaviheryaaya mwaha. (Saweriwa Tarummwa 17:11) Mwaphwanya naakhulo na nikoho, muhele eneneeryo naari muceke masu vakhaani yaawo anahaala okhala ookhweya wuupuwelela. Nto, omuthukumanoni, nyuwaano munanwerya oviiha moono mwachuna, nave mwaakhule mwawaakuveya mmasu anyu.

Moorweela wa waalikhela miyaha soohiyana hiyana inathokororyiwa esumana eri yoothene mmithukumanoni, nyuwo munahaala waacererya mawuupuwelo mavyaani “m’muhakhuni” mwanyu mwa nsuweliho na Piipiliya.​—Mateyu 13:51, 52.

• Yookhovelela taani munaphwanelaanyu okhalano wi murehererye mithukumano?

• Munii mwiirehererye hai wi mwaakhule omuthukumanoni?

Ovinyerya khalai, Yehova aachuna wi ichoko simaliheke elukuluku vamoha wi ilipiheryeke makhalelo aya oomunepani ni waataana wa emusi. (Malamulo 6:6, 7) Ti nthowa nenla Anamoona a Yehova aniivahaaya elukuluku isumana soothene wi epake malapelo a veechokoni​—ehuseryaka ichu soomunepani siniiwanana ni sookhwela saya. Naamwi mukhalaka meekhinyu, munanwerya opharihela phaama elukuluku yeeyo wi mmwaacamele Muluku moorweela wa yoohuserya ya Piipiliya ya mwaha muthanlilaanyu.

Ela elukuluku ya omwaacamela Yehova. “Mwachameleni Muluku, nave anarwa-awachamelani nyuwo.” (Yakobo 4:8) Hiyaano ninnamusuwela Yehova phaama mwa ohuserya ichu vooloca sa mikhalelo sawe ni miteko sawe mu Masu awe, Piipiliya. Mukhalelo wookhweya opacerya malapelo eechoko ori omaliha elukuluku vakhaani mmwaalakhanyaka Piipiliya vamoha mwawiiweya, akhweya mucharihaka Okumi ni Muteko Ahu Weekristu. Makupa anaya waalakhanyiwa anaphwanela okaweliwa muchu ti muchu a veechokoni, nave mwamala waalakhanya, oothene ananwerya oloca yeeyo ahusenryaaya oorweela mu Soorempwa.

Ela elukuluku ya achu a veechokoni waacamelana. Alopwana ni asaaraya, asitiithi ni anaaya, annalipiha waataana waya vaava anamuhuseryaaya Piipiliya vamoha. Enaphwanela okhala elukuluku yoohakalala, ya murecele yeeyo oothene a veechokoni anawehereryaaya va esumana. Mwawiiwanana ni winnuwa wa anamwane, asitiithi annathanla miyaha soophwanelela othokororya, akhweya ompharihela Mulipeleli ni Despertai! Nave munaphwanela oloca sa makacamiho aakhumelenle aniinyu oxikola ni wooniherya mukhalelo wa ovootha. Ntakhara heeni muhinamoonaanyu televisau mu JW Brodcasting (tv.jw.org) voocharela muthokororye miyaha iho vamoha? Ti yaphaama ohuseryaka macipo anahaala wiipiwa omithukumanoni ni okhalano elukuluku ya ochekula mwamaliha malapelo eechoko.

Elukuluku yeeyo ya vameekhaaya munamalihaanyu esumana eri yoothene mmulapelaka Yehova vamoha, enahaala waakhaviherya achu oothene a veechokoni osivela Masu a Muluku, nave munahaala waakhela mareeliho mancipale nthowa na wiilipixerya wanyu.​—Salmo 1:1-3.

• Ntakhara heeni ninniivaha elukuluku wi nipake malapelo eechoko?

• Asitiithi enii yeereno hai wi elukuluku eyo ekhale yoohakalaliha wa achu oothene a veechokoni?

Ntakhara heeni achu ala akhanlaaya oohakalala vancipale? Ala ari va mmoha wa mithukumano sahu mitokotoko. Hiiha ntoko akapuro a Muluku akhalai, yaahusihiwa wi ethukumaneke ikwaha raru vayaakhani, hiyaano ninnawehererya othukumana vamoha mu nikhuuru ntokotoko. (Malamulo 16:16) Eyaakha eri yoothene, ninnakhalano mithukumano miraru: mithukumano miili sa ekulucu sa nihiku nimoha, ni muthukumano wa muceche wa mahiku mararu. Mano mithukumano seiha sinanikhaviherya hai?

Iha sinnalipixa onna ahu Weekiristu. Hiiha ntoko Aisarayeli yaahakalalaaya mu omuthamala Yehova “m’makhucheni,” hiyaano tho ninnahakalala mu omulapela yoowo vamoha mmithukumano seiya savameekhaaya. (Salmo 26:12; 111:1) Mithukumano seiya sinnanivaha ekari ya waasuwela ni waataana vamoha ni anna a miloko mikina ni a ilapo sikina sookhopela. Elukuluku ya mitiya, hiyaano ninnalya vamoha va nipuro na muthukumano naaceereryaka onthamwene ahu. (Saweriwa Tarummwa 2:42) Mmithukumano mwemmo hiyaano ninnoona osivela yoowo onanaataaniha ni “anna” a elapo yoothene.​—1 Petro 2:17.

Iha sinnanikhaviherya winnuwa makupa oomunepani. AIsarayeli tho yaanaphura moorweela wa ‘wiwa phama’ masu a Soorepa yaataphuleliwa wa yaawo. (Nehemiya 8:8, 12, BNM) Hiyaano tho ninnacicimiherya mahusiheryo a Piipiliya nnaakhelaahu mmithukumanoni mwahu. Mathipelo a muru wa muthukumano ori woothene onarweela Mpiipiliyani. Moorweela wa miyaha sa vanlakani, miyaha soohiyeryana, ni sawooniherya, ninnahuserya weerano yookhwela ya Muluku mu okumi ahu. Ninnakhaviheryeya vaava nniiwaahu saweereya sa yaale avoonthe makacamiho mu ilukuluku seiya soovila. Mmithukumano sa muceche sa mahiku mararu, itrama sinnanikhaviherya wiiwexexa miyaha sa Piipiliya ni onihusiha ikano soophara muteko. Mithukumano soothene, onnapakiwa opatiso wa yaale anchuna wooniherya wiiveleela waya wa Muluku.

• Ntakhara heeni mithukumano mitokotoko ti ilukuluku soohakalaliha?

• Mphurelo taani munahaalaanyu ophwanya mwaya omuthukumanoni mutokotoko?

Ahaakumve okhwa, Yesu aahiloca: “Mitchaka eyo ya Omwene enarwa-elaleyeryiwa velaponi yothene ya vathi vano, ekhale namona wa atchu a maloko othene; nave vavo enarwa-ephiya makutchuwelo.” (Mateyu 24:14) Mano ela yaahaala weereya mwawiihai? Moorweela wa ochariha yootakiherya ya Yesu ovanheiye ari veelaponi yavathi.​—Luka 8:1.

Hiyaano ninneererya owaavya achu mu ichoko saya. Yesu aahaahusiha oohuserya awe olaleerya michaka saphaama empa ni empa. (Mateyu 10:11-13; Saweriwa Tarummwa 5:42; 20:20) Alaleeryi yaale a nsana noopacerya yaanakaweliwa mapuro wi yalaleeryewo. (Mateyu 10:5, 6; 2 Akorinto 10:13) Olelo tho, muteko woolaleerya wa Anamoona a Yehova ori wooreheryeya phaama, nave muloko ori woothene onnakaweliwa mapuro a olaleerya. Ennanikhaviherya waakhwaniha nlamulo na Yesu wi “n’laleyerye wa atchu, nave nere namona.”​—Saweriwa Tarummwa 10:42.

Ninniilipixerya owaavya achu weiwo anaphwanyeyaayawo. Yesu tho oovaha yootakiherya ya olaleerya wa achu mmapuro a vanlakani vene, ntoko muxerexere mwa eniya naari veehimeni. (Marko 4:1; Yohane 4:5-15) Hiyaano ninnavaanela ni achu vooloca sa Piipiliya mmapuro ari oothene nnaweryaahu​—muramphani, mmisikani, onaweliwawo ikaaro, naari ni telefone. Hiyaano tho, ninnakhalano ekari ya waalaleerya amwaacamani, asinthamwene oomutekoni, asinthamwene ooxikola, ni amusi ahu. Mukhalelo yoola wa wiilipixerya wahu onneeriha wi achu masana masaneene veelaponi yoothene yavathi yiiwe michaka yaphaama ya “ovulusha wawe.”​—Salmo 96:2.

Munnamuupuwela muchu mwaahaalaanyu omulaleerya michaka saphaama sa Omwene wa Muluku ni otaphulela mukhalelo inamvolowelaaya? Muhivithe michaka iha sa eweheryeryo wa achu akina. Mwaaleele awo mwa waakuveya!

• “Mitchaka” taani yaphaama sinaphwanela olaleeryiwa?

• Anamoona a Yehova anachariha mwawiihai yootakiherya ya olaleerya wa Yesu?

Nsu nawi “piyoneero” wiiliwiili nnaaloca yaale anapacerya woona mapuro naari ohulela ephiro wi akina echare. Yesu aari ntoko piyoneero, aaruule veelaponi yavathi wi aphare muteko onavaha okumi ni ohulela ephiro ya ovuluxa. (Mateyu 20:28) Olelo, oomuchara awe annamutakiherya yoowo moorweela wa omaliha elukuluku yincipale yaapakaka ‘oohuserya.’ (Mateyu 28:19, 20) Akina annawerya opaka makupa mmuteko yoola wa opiyoneero.

Piyoneero muchu onalaleerya elukuluku yoothene. Anamoona a Yehova oothene alipa oolaleerya michaka saphaama. Nyenya, akina annakhweiha okumi aya wi erumeele ntoko mapiyoneero a elukuluku yoothene, emalihaka iwora 70 mweeri ti mweeri mmuteko wa olaleerya. Wi yaakhwaniherye, ancipale annavukula elukuluku anamalihaaya omutekoni waya. Akina annathanliwa wi erumeele ntoko mapiyoneero avameekhaaya mu mapuro onachuneyawo alipa oolaleerya ancipale, emalihaka iwora 130 naari soopwaha mweeri ori woothene mmuteko wa olaleerya. Mapiyoneero annahakalala ni mukhalelo wa okumi wookhweya, eroromelaka wi Yehova onahaala waakhaviherya ni sookhwela saya soomwiilini. (Mateyu 6:31-33; 1 Timoteo 6:6-8) Wa yaale ahinawerya okhala mapiyoneero a elukuluku yoothene ananwerya orumeela ntoko mapiyoneero ookhaviherya yaacereryaka muteko aya wa olaleerya ophiyerya iwora 30 naari 50 miyeeri soothene.

Omusivela Muluku ni achu Ennamulipixa piyoneero. Ntoko Yesu, ninnasuwela wi olelo achu ancipale haano ewehereryo mmakupa oomunepani. (Marko 6:34) Nyenya hiyaano nookhalano nsuweliho nnawerya waakhaviherya yaawo, ni waavaha ewehereryo yoolipa vooloca sa muhoolo. Waasivela amwaacamani ennamweeriha piyoneero ovaha elukuluku ni ikuru sawe wi aakhaviherye akina osuwela michaka yaphaama. (Mateyu 22:39; 1 Atesalonika 2:8) Ntoko yookhumelela, nroromelo nawe ninnalipa, onnamwaacamela Muluku, nave onnapuha ohakalala otokotoko.​—Saweriwa Tarummwa 20:35.

• Piyoneero taani?

• Tiheeni enaweeriha akina okhala mapiyoneero a elukuluku yoothene?

Mahusiheryo oomuluku ovinyerya khalai echu yavameekhaaya wa Anamoona a Yehova. Mahusiheryo a vameekhaaya annavahiwa wa yaale analaleerya Omwene mmuteko wa elukuluku yoothene wi ewerye ‘okhwaniherya oruméla’ waya.​—2 Timoteo 4:5.

Exikola ya Muteko wa Opiyoneero. Omakuchuwelo wa muyakha woopacerya wa muteko wa elukuluku yoothene, anna ni arokora annawompwa ovolowa exikola ya mahiku mathanu nammoha mu Empa ya Omwene eri vakhiviru. Yoolakelela aya ori waakhaviherya mapiyoneero omwaacamela Yehova, okhalano mavyakelo mmakhalelo oothene a orummwa, ni otitelela muteko aya ni nroromelo.

Exikola ya Alaleeryi a Omwene. Mu miyeeri miili exikola ela ennaavyakiha mapiyoneero oophwanelela yaawo ivelenle ohiya empa aya ekulucu wi erumeele weiwo oriwo othowa otokweene. Awo annaloca ni murima woothene, “Miyano kiri okhalene! Mukirume!”emutakiheryaka Mulaleeryi mutokotoko, Yesu Kiristu. (Isaiya 6:8, BNM; Yohane 7:29) Othaamela elapo ekina onavolowela okhweiha makhalelo a okumi, sookhovelela, mukhalelo wa elapo, naari yoolya enamukhala yoohiyana vancipale ni yeeyo naakhovelenlaahu. Ophiyerya tho onahaala okhala woochuneya ohuserya elocelo evyaani. Exikola ela ennaakhaviherya anna ni arokora ari aciye ni atheli, a iyaakha opacerya 23 ophiyerya 65, wi yaaceererye makhalelo oomunepani yaawo anahaalaaya ochuna mu orummwa waya ni mavyakelo yaawo anahaala waakhaviherya ophariheliwa vancipale ni Yehova vamoha ni marehereryo awe.

Exikola ya Piipiliya ya Kiliyati. Masu a Eheepri, “Kiliyati” anataphulela “nikhaviheryo na onamoona.” Ovinyerya 1943, exikola ela epacenryaaya, opwaha anna 8.000 akwaaxe exikola yeela yaarumihiwa ntoko mamisiyonaariyo wi evahe onamoona “ophiyerya okutchuwenlayawo elapo” ni mphurelo mutokotoko. (Saweriwa Tarummwa 13:47) Vaavaa anna oopacerya ovyakihiwa yaaphinyaaya o Peru, hiwaariwo muloko. Vano sookhalawo opwaha miloko 1.000. Vaavaa mamisiyonaariyo yaapacenryaaya orumeela o Xapau, alaleeryi yaariwo hiyaakhwana khumi mu elapo yeele. Vano aakhalawo alaleeryi opwaha 200.000. Miyeeri mithanu sa ovyakihiwa o Kiliyati onaphitaanyerya ohuserya wawiiseela wa Masu a Muluku. Yaale anarumeela ntoko mapiyoneero avameekhaaya naari mamisiyonaariyo, ari ofiliyale naari muteko waweeceeca, annawompwa ovolowa mu exikola yeela wi yaaceererye mavyakelo yaawo anahaala waakhaviherya okhala ootikitheryeya ni okhaviherya muteko wa elapo yoothene.

• Tiivi eri Yoolakelela ya Exikola ya Muteko wa Opiyoneero?

• Taani onathanleliwa ovolowa Exikola ya Alaleeryi a Omwene?