Awo Yaarepa Vooloca sa Yesu

We onnawoona alopwana ala va eruku?— Ala ti Mateyu, Marko, Luka, Yohane, Petro, Yaakopo, Yuuta, ni Paulo. Alopwana ala yaakhala elukuluku emohamoha ni Yesu, nave ala aarepa vooloca sa Yesu. Haya nihuserye sincipale vooloca sa yaala.

Araru a yaawo yaari oohuserya yaawo yalaleerya ni Yesu. We onnaasuwela taani yaala araru?— Mateyu, Yohane, ni Petro. Murummwa Mateyu ni Yohane aamusuwela phaama Yesu, nave awo tho ahaarepa aliivuru analoca sa okumi wa Yesu. Murummwa Yohane oomurepa tho liivuru oniichaniwa Yawupulula nave tho ikaarata raru siniichaniwa Yohane Oopacerya, Yohane Anaawiili, ni Yohane Aneeraru. Murummwa Petro oorepa ikaarata piili heiho siri Mpiipiliyani. Iha siniichaniwa Petro Oopacerya ni Petro Anaawiili. Mu ekaarata awe yanaawiili, Petro oorepa vooloca sa elukuluku yeeyo Yehova aalonceiye ni Yesu orweela wirimu ariki: ‘Ola ti mwanaka oosiveliwa aka, mwa yoowo kinnahakalalano.’

Alopwana akina va eruku yeela aanihusiha tho vooloca sa Yesu mu aliivuru yaawo yaarempaaya. Mmoha a yaawo ti Marko. Akhweya owo aakhalavo vaavaa Yesu aaphariweiye nave aahoona soothene seereyaka. Mukina a yaawo ti Luka. Owo aari mulipa-murece akhweya owo aahikhala Mukiristu Yesu amanleene okhwa.

Akina apiili amurempe Piipiliya yaawo we onawoonaawe va eruku yeela yaari anna akhaani a Yesu. We woosuwela masina aya?— Masina aya ti Yaakopo ni Yuuta. Voopacerya awo hiyaamweemererya Yesu. Awo yuupuwela wi Yesu aari naanepa. Nnya vahoolo vaya awo yaamuroromela Yesu nave ekhala Akiristu.

Oomurepa a Piipiliya mukina ookuchula onamoonaawe va eruku ela ti Paulo. Ahaakumve okhala Mukiristu, nsina nawe naari Saulo. Owo aanawiica Akiristu ni anaahooxa yaawo. We woosuwela tiheeni emweerinhe Paulo okhala Mukiristu?— Nihiku nimoha Paulo eeca mukwaha mootutuxa, mphironi muchu aaloca ni yoowo orweela wirimu. Owo aari Yesu! Yesu aamukoha Paulo: ‘Ntakhara heeni onaahooxaawe yaale anakiroromela?’ Vahoolo vaya, Paulo aacharuwa nave aakhala Mukiristu. Paulo ohaarepa aliivuru khumi naxexe a Mpiipiliyani, Aroma ophiyerya Ahebri.

Hiyaano ninnamwaalakhanya Piipiliya mahiku oothene, tahi hiiha?— Moorweela wa omwaalakhanya Piipiliya, hiyaano ninnahuserya ichu sincipale vooloca sa Yesu. Onnachuna ohuserya sincipale vooloca sa Yesu?—