1-3. Makoho taani achu anapakaaya vooloca sa okhwa, nave maakhulo taani ikerexa sinavahaaya?

PIIPILIYA onnaloherya wi “horwa okhalavotho okhwa” omwaahiyu. (Wupulula 21:4) Mmwaha 5 noohuserya wi woopola onneeriha wi nikhaleno okumi woohimala. Nyenya nlelo achu annakhwa. (Eklesiyaste 9:5) Mwawiihiiha, ninnakhumelela nikoho nla noochuneya, Tiheeni eneereya ni hiyaano nakhwa?

² Naakhulo na nikoho nla ti noochuneya xaxaxa vaavaa onakhweiye oosiveliwa ahu. Hiyaano ninniikoha: ‘Okele woowi? Owo onnanoona? Onanwerya onikhaviherya? Nnarwa nimoona wanaawiili?’

³ Ikerexa sinnavaha maakhulo oohiyanahiyana. Ikina inahusiha wi wakhala wi muchu onneera saphaama, onaya wirimu nave wakhala wi onneera soonanara, onaya ohooxiwa omooroni. Ikina inaloca wi mwakhwa munahaala othatuwa munepa ni okhala vamoha ni ahima anyu akhwile. Nave ikina inaloca wi mmanle okhwa munaya othorihiwa, ni muyariwe wanaawiili, naari okookela okhalano ekumi ni mwiili mukina, akhweya okhala muchu mukina naari mwaaxinama.

4. Muupuwelo taani ikerexa iha iryaayano vooloca sa okhwa?

⁴ Ikerexa seiha, inakhala wi inahusiha ichu soohiyana, nyenya soothene irino muupuwelo mmoha. Sinahusiha wi muchu akhwa, yookhalavo echu ehinakhwa. Apwanne eparipari?

TI WOOWI NNAYAAHUWO NAKHWA?

5, 6. Tiheeni eneereya vaavaa nnakhwaahu?

⁵ Yehova oosuwela yeeyo eneereya ni hiyaano vaavaa nnakhwaahu, nave onleela wi vaavaa muchu onakhweiye, okumi awe woomala. Okhwa ti woohiyana ni okumi. Vaavaa muchu onakhweiye, muupuwelo ni waanyiherya wawe honatitelela okhala mmapuro makina.a Vaavaa nnakhwaahu hiyaano hannoona, hanniiwa, naari hannuupuwela echu.

⁶ Mwene Soolomoni aarepa wi “akhwile hanasuwelaru etxhu.” Ale akhwile haano osivela naari wiica, ntakhara “mmahiyeni honeriwamo etxhu nave mwemo hiwamo wupuwela, osuwela ni miruku.” (Mwaalakhanye Eklesiyaste 9:5, 6, 10.) Nave Salumu 146:4 onnanleela wi vaavaa muchu onakhweiye, “sawupuwela sawe” sinnakhwa.

TIHEENI YESU AALONCEIYE SA OKHWA

7. Yesu aalikanyinhe okhwa ni eheeni?

⁷ Vaavaa nthamwene awe Lasaro aakhwileiye, Yesu aaloca wa ohuserya awe: ‘nthamwene ahu Lázaro onamukona.’ Nyenya yeeyo Yesu aalonceiye tahi wi yaataphulela wi Lasaro aamwiichuuwa. Voocharela Yesu aaloca: “Lázaro òkhwa.” (Yohani 11:11-14) Mwawiihiiha Yesu aalikanyiha okhwa ni okona. Owo haalonce wi Lasaro ori wirimu naari wi ori ni ahima awe akhwile khalai. Nave haalonce wi Lasaro onoona ekoi omooroni naari wi ooyariwa wanaawiili ntoko muchu naari mwaaxinama. Nyenya waari ntoko wi Lasaro aamurupa. Soorepa ikina sinnalikanyiha okhwa ni okona. Piipiliya onnaloca wi vaavaa Estefano iiphiweiye, “árupa” mookhwani. (Saweriwa T’arummwa 7:60, Nlakano Nahihano) Murummwa Paulo aarepa wi Akiristu akina “árupa” mookhwani.​—1 Korinto 15:6; NN.

8. Nnasuwela hai wi Muluku haapatunxe achu wi ekhweeke?

⁸ Apwanne Muluku aampatunxe Aatamu ni Haava wi ekhweeke? Hooye! Yehova aahaapatuxa wi ekhale okhala wookhala ni ekumi yoophaameya. Vaavaa Yehova aapatunxeiye achu, ahaavaha nchuno na okhala elukuluku yoothene. (Eklesiyaste 3:11) Asitiithi hanachuna owoonaka anamwane aya yiiceliwaka naari okhwa, Yehova tho onoona mmukhalelo mmohamoha wa hiyaano. Nyenya, woona wi Muluku onipatunxe wi nikhaleke okhala wookhala, ntakhara heeni nnakhwaahu?

NTAKHARA HEENI NNAKHWAAHU?

9. Ntakhara heeni nlamulo Yehova aamvanheiye Aatamu ni Haava hinaari noovila wiiwelela?

⁹ Mu emaca ya Eeteni, Yehova aamuleela Aatamu: “Oni onalya sawima sa miri sa mmatxani, nto ohilye sawima sa mwiri yole onasuweliha yaphama ni yonanara. Walya sa yowo onamukhwa.” (Maphatxuwelo 2:9, 16, 17) Nlamulo nla nawiiweya hinaari noovila ochariha, nave Yehova aakhalano ophwanelela wa omuleela Aatamu ni Haava yeeyo eri yaphaama ni yoonanara. Mu omwiiwelela Yehova, awo yahaala wooneiha wi annacicimiha otokweene wa Yehova. Awo tho yaahaala wooneiha othamalela waya wa soothene awo yaakhenlaaya wa Yehova.

10, 11. (a) Satana aamuwonke hai Aatamu ni Haava? (b) Ntakhara heeni hiwaarivo olevelela wa yeeyo yeeraaya?

¹⁰ Moothananiha, Aatamu ni Haava yaathanla ohimwiiwelela Yehova. Satana aamukoha Haava: “Txhiri Muluku oholèlani wi muhilyeke sawima sa miri iri mmatxani?” Haava aamwaakhula: “Hoye, hiyano novahiwa olya sawìma sa miri sa mmatxani! Muluku onihìhale pahi olya sawima sa mwiri ori veri v’ematxha, ariki: ‘Muhilyeke sawima sa mwiri yowo, nari mano muhiphareke, vawi muhikhwe.’”​—Maphatxuwelo 3:1-3.

¹¹ Satana aaloca: “Tahi eparipari wi mwalya munamukhwa, ti wi, Muluku òsuwela wi mwalya sawima iho mìtho anyu anamuhuleya, munamukhala ntoko yowo: munamusuwelaka yorèra ni yonanara.” (Maphatxuwelo 3:4-6) Satana aachuna wi Haava uupuweleke wi aanaphwanela olakelela meekheiye yeeyo eri yaphaama ni yoonanara. Mu elukuluku yeeyo, owo aamuwoka vooloca sa yeeyo yaahaala weereya waakhanle wi hiiwelenle. Satana aamuleela Haava wi haahaala okhwa, mwawiihiiha Haava aalya yawiima nave amvaha tho iyawe. Aatamu ni Haava yaanasuwela wi Yehova ahaaleela wi ehilye yawiima ele. Vaavaa yaalyilaaya, awo yaathanla ohiiwelela nlamulo nle nawiiweya. Nthowa na olya, awo yaahooniherya ohimucicimiha Tiithi aya oosivela a wirimu. Hiwaarivo olevelela wa yeeyo yenraaya!

12. Ntakhara heeni ohiiwelela wa Aatamu ni Haava waamututhula Yehova?

¹² Ohicicimiha taani asitiithi ahu oopacerya yoonihenryaaya wa Mpatuxa aya! Mwii moone hai wakhanle wi mohiilipixerya wi mumphuwe mwaninyu, nave ohoolo waya amwaryeya ahineera yeeyo munachunaanyu? Eyo henii etuthule murima anyu?

13. Tiheeni Yehova aachuneiye oloca vaavaa aareiye “vantxhupini onamukòkelavo”?

¹³ Vaavaa yaamuchekenlaaya Yehova, Aatamu ni Haava yaayeleela ekari ya okhalano okumi yoohimala. Yehova aamuleela Aatamu: “Ntakhara weyano wa ntxhupi nave vantxhupini onamukòkelavo.” (Mwaalakhanye Maphatxuwelo 3:19.) Ela yaataphulela wi Aatamu ahaala okookela okhala nchupi, hiiha ntoko ahaakumve opatuxiwa. (Maphatxuwelo 2:7) Amanle Aatamu ocheka, owo aakhwa nyenya aarimeela.

14. Ntakhara heeni nnakhwaahu?

¹⁴ Waakhanle wi Aatamu ni Haava aamwiiwelela Muluku, yaahaala okhala ophiyerya olelo. Nyenya nthowa na ohimwiiwelela Muluku, awo yaacheka, nave ekhwa. Yoocheka eri ntoko ereca yooraveya, yeeyo nramvaahu wa Asitiithi ahu oopacerya. Oothene niyariwe oocheka, nave ti nthowa nene nnakhwaahu. (Aroma 5:12) Nyenya ela hiyaari yookhwela ya Muluku wa achu. Muluku haachunne wi achu ekhweeke, nyenya Piipiliya oniichana okhwa ntoko “mwitxana.”​—1 Korinto 15:26.

EPARIPARI ENNANITAPHULA

15. Ti mwawiihai osuwela eparipari vooloca sa alipa ookhwa enanitaphulaaya?

¹⁵ Eparipari vooloca sa okhwa yoontaphula wa mahusiheryo mancipale atheru. Piipiliya onnanihusiha wi akhwile hanoona wiicela naari wuukhuwa. Hannawerya olocano, naari awo hanawerya oloca ni hiyaano. Hannawerya waakhaviherya, naari awo hanawerya onikhaviherya. Awo hanawerya onihooxa, hiyaano tho hannaphwanela owoovaka. Mwawiihiiha, ikerexa sincipale sinaloca wi alipa ookhwa aakhalano ekumi mmapuro makina nave wi hiyaano nnanwerya waakhaviherya vaavaa nnavahaahu ikhorowa sahu wa mapaatiri naari asitokweene a ikerexa. Nyenya vaavaa nnasuwelaahu eparipari vooloca sa alipa ookhwa, hinnahaala ohuwelihiwa ni sawootha seiho.

16. Soowoka taani ikerexa sincipale inahusihaaya vooloca sa okhwa?

¹⁶ Satana onnapharihela ikerexa wi aniwoke ni oneeriha nuupuweleke wi alipa ookhwa aakhalano okumi. Ntoko yootakiherya, ikerexa sincipale inahusiha wi vaavaa nnakhwaahu, yookhala echu ehinakhwa yeeyo enakhalano okumi mmakupa makina. Ekerexa anyu enahusiha hiiha, naari wi enahusiha yeeyo Piipiliya onaloceiye sa alipa ookhwa? Satana onnapharihela wootha wi aamwalanye achu ni Yehova.

17. Ntakhara heeni nihusiheryo na waahooxa achu omooroni ninnamunyemula Yehova?

¹⁷ Mahusiheryo a ikerexa sincipale annamunyemula Muluku. Ntoko yootakiherya, ikina inahusiha wi achu oonanara anahaala ohooxiwa omooroni elukuluku yoothene. Nihusiheryo nla ninnamunyemula Yehova. Owo harwa aahooxa achu mmukhalelo yoola! (Mwaalakhanye 1 Yohani 4:8.) Mwahaala omoona hai muchu yoowo wi amulake mwanawe, onasuka mata awe vamooroni? Nyuwo mwahaala omoonaka muchu owo okhala awuuma murima. Himukii muchune omusuwela. Satana onachuna wi nimooneke Yehova mmukhalelo yoowo!

18. Ntakhara heeni hannaphwanela owoovaka alipa ookhwa?

¹⁸ Ikerexa sikina inahusiha wi muchu akhwa, owo onakhala munepa. Ikerexa seiha inahusiha wi nnaphwanela ocicimiha naari woova minepa seiho, ntakhara iho sinanwerya okhala asinthamwene ahu naari amwiicani ahu. Achu ancipale anneemererya owoka yoola. Annawoova alipa ookhwa, ophiyerya waalapela yaawo omuhiya Yehova. Muupuwelele wi alipa ookhwa hanoona naari hanuupuwela echu, hannaphwanela owoovaka. Yehova ti Mpatuxa ahu. Owo Muluku eeparipari, nave nnaphwanela omurumeelaka yoowo pahiru.​—Wupulula 4:11.

19. Osuwela eparipari vooloca sa alipa ookhwa enanikhaviherya hai?

¹⁹ Nasuwela eparipari vooloca sa alipa ookhwa, ninnakhala ootaphuwa wa soowoka sa ikerexa. Eparipari ennakhaviherya wiiwexexa phaama yoolaiherya yootikhiniha ya Yehova vooloca sa okumi ahu ni omwaahiyu.

20. Tiheeni nnahaalaahu ohuserya mu mwaha onacharela?

²⁰ Mu iyaakha sincipale khalai, kapuro a Muluku awiichaniwa Yupu aakoha: “Mutxhu okhwile onnakòka akhala?” (Yobi 14:14) Onnaweryeya chiryene muchu okhwile okookela okhala mukumi? Muluku onnanivaha naakhulo noohakalaliha Mpiipiliyani. Nnahaala woona mu mwaha onacharela.

1-3. Oothene hiyo na akapuro a eheeni, nave Yehova onii anoopole hai?

MWAANYIHERYE wi nyuwaano moowaleliwa mukaaripooso nthowa na echu muheenraanyu. Himwaano echu yaweera wi moopoliwe. Enakhala ntoko wi himwaano ewehereryo, hiyaavo munaweryaanyu weera. Nyenya mmanle oyeleela ewehereryo, munnasuwela wi ookhala orino ikuru sa owoopolani nave oororomeliha wookhaviheryaani! Mwaahaala okhala hai?

² Oothene na akapuro a okhwa. Moohipwacha yeeyo nneeraahu, hannawerya okophola. Nyenya Yehova ookhalano ikuru sa onoopola mu okhwa. Nave owo oolaiherya wi “mwitxana òmaliherya ovothiwa ti okhwa.”​—1 Korinto 15:26.

³ Mwaanyiherye otaphuwa munahaalaanyu okhalano vaavaa muhinahaalaanyu woovaka okhwa! Nyenya tahi wi Yehova onahaala oviihavo okhwa pahiru. Owo tho onahaala waaviiha achu oothene yaale akhwile. Mwaanyiherye yeeyo enahaalaaya otaphulela wa nyuwo. Owo oolaiherya wi “othene akhwile anamuhuhumuwa.” (Isaiya 26:19) Ti yeeyo Piipiliya oniichaneiye ovinya mookhwani.

VAAVAA ONAKHWEIYE OOSIVELIWA AHU

4. (a) Tiheeni enii enilipihe vaavaa amusi ni asinthamwene anakhwaaya? (b) Taani yaari asinthamwene akina a Yesu?

⁴ Vaavaa onakhweiye mmusi naari nthamwene, wiicela onakhala otokweene ni woohivileleya. Ninnayeleela ewehereryo. Hannawerya weera echu wi nimviihe ole okhwile. Nyenya Piipiliya onnanilipiha. (Mwaalakhanye 2 Korinto 1:3, 4.) Hankooni nthokororye yootakiherya emoha enooniherya wi Yehova ni Yesu annachuna waaviiha yaale akhwile. Vaavaa Yesu aareiye veelaponi yavathi, owo aanamuxekurya wiiliwiili Lasaro ni murokora awe, Marta ni Mariya. Oothene yaari asinthamwene a Yesu. Piipiliya onii: “Yesu ànàkhwela Marta, munnawe Mariya ni Lázaro.” Nyenya nihiku nikina Lasaro aakhwa.​—Yohani 11:3-5.

5, 6. (a) Tiheeni Yesu eenreiye vaavaa aawooneiye amusi ni asinthamwene a Lasaro yinlaka? (b) Ntakhara heeni ennanihakararya osuwela mukhalelo Yesu onooneiye okhwa?

⁵ Yesu aanachuna omuhakararya Marta ni Mariya. Vaavaa Marta iiwaleiye wi Yesu aanarwa, owo aamuthikirerya. Aatepa ohakalala aamoonneiye Yesu, nyenya aalocano: “Pwiya, warì vava munnaka hakakhwile.” Marta uupuwela wi Yesu aatepa olekela ophiya. Vaavaa Yesu aamonneiye Mariya, anlaka, eyo yaamuthananiha, nave tho aahinla. (Yohani 11:21, 33, 35) Owo ahoona wiicela otokotoko onarweela mu omuyeleela oosiveliwa mookhwani.

⁶ Osuwela mukhalelo Yesu onooneiye okhwa, ennanivaha nihakararyo. Nave Yesu ori ntoko Atiithi awe. (Yohani 14:9) Yehova ookhalano ikuru sa omaliha okhwa okhala wookhala, nave ti yeeyo onahaaleiye weera moohilekela.

“LÁZARO, KHUMELÁ VATE!”

7, 8. Ntakhara heeni Marta haachuna wi nluku naaciyeliweno nihiye na Lasaro niviihiwevo, nyenya tiheeni Yesu eenreiye?

⁷ Yesu aaphiya onihiyeni aavithiwewo Lasaro, mulako wa nihiye nlo waaciyeliwe ni nluku ntokweene. Yesu aaloca: “Vìhanvo nluku.” Nyenya Marta haachuna wi niviihiwevo, ntakhara yaaviravo “mahiku masese” nave mwiili wa Lasaro waahuuca. (Yohani 11:39) Owo haasuwela yeeyo Yesu aahaaleiye weera.

⁸ Yesu aaloca wa Lasaro: “Khumelá vate!” Yeeyo Marta ni Mariya yoonnaaya yaari yootikhiniha. Piipiliya onii: “Nave yole ari òkhwa àvinya, ahuruweliwe inani ni mata ene ni ikuwo.” (Yohani 11:43, 44) Lasaro aakookiheryiwa ekumi wanaawiili! Owo aakookela okhala ni amusi vamoha ni asinthamwene awe. Awo yaanawerya omukhuphaarela, omphara, ni ochekulano. Ela yootikhiniha etokhweene! Yesu aamviiha Lasaro.

“NAHANO VINYÁ”

9, 10. (a) Taani aamvanhe Yesu ikuru wi aaviihe achu? (b) Ntakhara heeni saweereya sa ovinya mookhwani ti soochuneya wa hiyo?

⁹ Apwanne Yesu aaviiha achu ni ikuru sawe? Hooye. Ahaakumve omviiha Lasaro, Yesu aavekela wa Yehova, nave Yehova aamvaha ikuru sa omviiha Lasaro. (Mwaalakhanye Yohani 11:41, 42.) Lasaro tahi aari yooworu aaviihiwe. Piipiliya onnanleela sa nahano a iyaakha 12 yoowo iiceliwa. Atiithi awe, Xairo, hiyaarino ewehereryo, nave yaamwaavya Yesu wi ampenuxe mwanawe. Owo aari mwanawe mmoharu. Elukuluku yeeyo aaloceiye ni Yesu, aarwa mulopwana aloca ariki: “Mwana-à amwamuthiyana òkhwa. Onamùkhulelani muhusiha?” Nyenya Yesu aaloca wa Xairo: “Ohòve etxhu, ororomele pahi.” Voocharela yaaya vaate va Xairo. Yaacamelaka vaate, Yesu aanawiiwa achu yinlaka. Yesu aalocano: “Munanlelani? Mwana ola hakhwile, onamurupa!” Xairo ni amwaariye hiiyiiwexenxe yeeyo Yesu aachuneiye oloca. Yesu aahaakumiherya vaate achu oothene, nave aamukuxa Xairo ni mwaariye avolowano mpa aareiyemo mwaana. Yesu aaphara ntata na mwaana owo nave aalocano: “Nahano vinyá!” Mwaanyiherye ohakalala wa asitiithi awe vaavaa owo aaviihiweiye nave apacerya weeca! Yesu aamviiha mwanaya amwaamuthiyana. (Marko 5:22-24, 35-42; Luka 8:49-56) Ovinyerya nihiku nenle oya ohoolo, vaavaa yanwehaaya mwanaya, yaanuupuwela yeeyo Yehova eenreiye orweela wa Yesu.a

¹⁰ Yaale Yesu aaviihaleiye, ohoolo waya yaakhwa. Nyenya saweereya seiha nnaalakhanyaahu ti soochuneya wa hiyo ntakhara sinnanivaha ewehereryo yeeparipari. Yehova onnachuna waaviiha achu, nave owo onahaala weerano.

TIHEENI NNAHUSERYAAHU ORWEELA WA SAWEEREYA SA OVINYA MOOKHWANI

11. Tiheeni Eklesiyaste 9:5 onanihusiheiye vooloca sa Lasaro?

¹¹ Piipiliya onnaloca mookwakwaleya wi “akhwile hanasuwelaru etxhu.” Ti yeeyo yeeren’ye ni Lasaro. (Eklesiyaste 9:5) Hiiha ntoko Yesu aalonceiye, yaakhanle ntoko wi Lasaro aamukona. (Yohani 11:11) Elukuluku yeeyo aareiye mmahiyeni, Lasaro haasuwelaru “etxhu.”

12. Nnasuwela hai wi Lasaro aaviihiwa chiryene?

¹² Vaavaa Yesu aamviihaleiye Lasaro, achu ancipale yaahoona yeeyo. Ophiyerya tho amwiicani a Yesu yaanasuwela wi owo aheera yootikhiniha yeela. Lasaro aari mukumi, nave eyo yaanavaha onamoona wi chiryene aaviihiwa mookhwani. (Yohani 11:47) Nave tho, achu ancipale yaanaya omuxekurya Lasaro, nave ntoko yookhumelela, awo yaapacerya weemererya wi Yesu aarumihiwe ti Muluku. Amwiicani a Yesu hiyaasiveliweno yeela, mwa yeeyo yaalakelela omwiipha Yesu vamoha ni Lasaro.​—Yohani 11:53; 12:9-11.

13. Ntakhara heeni nnaphwanelaahu ororomela wi Yehova onahaala waaviiha alipa ookhwa?

¹³ Yesu aaloca wi “othene ari mmahiyeni [anuupuweleliwa]” enarwa eviihiwa. (Yohani 5:28) Ela enataphulela wi oothene yaale Yehova onawuupuweleiye anahaala okookela okhala akumi. Nyenya wi Yehova amviihe muchu, owo onaphwanela wuupuwelela ichu soothene sa muchu owo. Apwanne owo ookhalano owerya yoowo? Aai, wirimu sookhalawo itheneeri macikhwi macikhweene. Piipiliya onaloca wi Yehova oosuwela nsina na emoha ti emoha. (Mwaalakhanye Isaiya 40:26.) Woona wi owo onnawerya wuupuwelela nsina na etheneeri ti etheneeri, moohikhwa minikwa owo onanwerya wuupuwelela makhalelo oothene a yaale onahaaleiye waaviiha. Echu yoochuneyaxa, ti yawi Yehova mpatuxa a ichu soothene, mwawiihiiha ninnasuwela wi owo ookhalano ikuru sa waakookiherya okumi yaale akhwile.

14, 15. Masu a Yupu ananihusiha eheeni vooloca sa ovinya mookhwani?

¹⁴ Mulopwana oororomeleya Yupu aanaroromela wi alipa ookhwa anahaala oviihiwa. Owo aakoha: “Mutxhu okhwile onnakòka akhala?” Voocharela owo aaloca wa Yehova: “Nyuwano munamukitxhana nave miyano kinamwakhula; nyuwano munamwèliwa murima ni miyano, ntakhara mukipatunse.” Aai, Yupu aanasuwela wi ennoorwa elukuluku yeeyo Yehova onahaaleiye waaviiha alipa ookhwa.​—Yobi 14:13-15.

¹⁵ Ewehereryo ya ovinya mookhwani henoohakalalihaani? Akhweya munanwerya okoha, ‘Hanka vooloca sa amusi ni asinthamwene aka akhwile, apwanne anahaala oviihiwa tho?’ Ti yoohakalaliha wa hiyo osuwela wi Yehova chiryene onnachuna waaviiha alipa ookhwa. Vooloca sa taani anahaala oviihiwa nave enii ekhaleke woowi, hankooni noone yeeyo Piipiliya onaloceiye.

AWO ENARWA ‘YIWA NSU NAWE, NAVE ANAMUKHUMAMO’

16. Yaale enii eviihiwe wi ekhaleke veelaponi yavathi, okumi wa mukhalelo taani anahaalaaya okhalano?

¹⁶ Khalai, yaale yaaviihiwe yaakookela okhala ni amusi aya vamoha ni asinthamwene aya veelaponi yeela yavathi. Ela tho enahaala weereya omwaahiyu, nyenya eyo enahaala okhala yoohakalalihaxa. Ntakhara heeni? Ntakhara yaale anahaala oviihiwa wi ekhaleke veelaponi yavathi anahaala okhalano ekari ya okhalano ekumi yoohimala ni ohikhwa wanaawiili. Nave anahaala okhala mu elapo yoohiyana ni yeela nnakhalaahumo olelo. Hikhalavo ikhoco, nlala, naari wiiceliwa.

17. Taani anahaala oviihiwa?

¹⁷ Taani anahaala oviihiwa? Yesu aaloca wi “othene ari mmahiyeni [anuupuweleliwa] aneraya yiwe nsu nawe, . . . anamukhumamo.” (Yohani 5:28, 29) Nave liivuru a Wupulula 20:13 onnanleela: “Ephareya yàhavelèla alipa òkhwa aya yari mwemmo. Hihatho okhwa ni elapo ya alipa òkhwa sàhavelèlatho alipa òkhwa aya.” Aai, macikhwi macikhweene a achu anahaala oviihiwa. Murummwa Paulo aaloca tho wi oothene “ékhaikhai ni óhikhala ékhaikhai” anahaala oviihiwa mookhwaani. (Mwaalakhanye Saweriwa T’arummwa 24:15, Nlakano Nahihano.) Ela enataphulela eheeni?

18. Achu “ékhaikhai” anahaala oviihiwa mookhwani taani?

¹⁸ Achu “ékhaikhai,” anaahiwa akapuro a Yehova oororomeleya yaawo yaakhanle Yesu ahaakumve orwa veelaponi yavathi. Ntoko Noowa, Aaparahamu, Saara, Moose, Rute, ni Estere, anahaala oviihiwa wi ekhaleke veelaponi yavathi. Nyuwaano munahaala waalakhanya saweereya sa alopwana yaala ni athiyana mu Ahebri ecima 11. Hanka vooloca sa akapuro ahiihaano a Yehova yaawo anakhwa mmahiku ahu yaala? Awo tho achu “ékhaikhai,” nave anahaala tho oviihiwa.

19. Achu “óhikhala ékhaikhai” taani? Ekari taani Yehova onahaaleiye waavaha?

¹⁹ Achu “óhikhala ékhaikhai,” anaahiwa yaale yaahirino ekari ya omusuwela Yehova ophiyerya okhwa waya. Naamwi ekhwile, Yehova haacuwanle. Owo onahaala waaviiha, nave anahaala okhalano ekari ya ohuserya vooloca sa Yehova ni omurumeela yoowo.

20. Ntakhara heeni achu oothene akhwile heviihiwa?

²⁰ Apwanne ela enataphulela wi oothene yaale akhwile anahaala oviihiwa? Hooye. Yesu aaloca wi achu akina heviihiwa mookhwani. (Luka 12:5) Taani onahaala olakelela wakhala wi muchu onnaphwanela oviihiwa naari hooye? Yehova muthoriha ookuchula, nyenya Yehova tho oomweera Yesu okhala “muthoriha a akumi ni atxhu òkhwa.” (Saweriwa T’arummwa 10:42) Amutakhali ahinacharuwa henii eviihiwe mookhwani.​—Moone Yooleeliherya 19.

OVINYA MOOKHWANI OYA WIRIMU

21, 22. (a) Oviihiwa oya wirimu enataphulela eheeni? (b) Taani aari oopacerya oviihiwa wi aye wirimu?

²¹ Piipiliya tho onnanleela wi achu akina anahaala okhala wirimu. Vaavaa muchu onaviihiweiye wi akhaleke wirimu, owo hanaviihiwa arino mwiili ntoko muchu. Owo onaviihiwa ntoko munepa.

²² Yesu aari muchu oopacerya waakhela mukhalelo yoowo wa ovinya. (Yohani 3:13) Emanle mahiku mararu Yesu akhwile, Yehova aamviiha Yesu. (Salumu 16:10; Saweriwa T’arummwa 13:34, 35) Yesu haaviihiwe arino mwiili ntoko muchu. Murummwa Pedro aaloca wi Yesu “òkhwa mmwilini, nto òvinya mokhwani mmunepani.” (1 Pedro 3:18) Yesu aakookiheryiwa okumi ntoko yoopatuxiwa yakuru yoomunepani! (1 Korinto 15:3-6) Nyenya Piipiliya onnanleela wi Yesu hakhala mukhateiye.

23, 24. Taani ari a “muhuwo mukhani” yaawo Yesu aalonceiye, nave ancipale anahaala okhala woowi?

²³ Ahaakumve okhwa, Yesu ahaaleela oohuserya awe oororomeleya ariki: “Kinnaya woreheryelani mpuro.” (Yohani 14:2) Ela enataphulela wi oomuchara akina a Yesu yaahaala oviihiwa wi yakhaleke ni yoowo wirimu. Anahaala okhala akavi? Yesu aaloca wi yahaala okhala a vakhaani, “muhuwo mukhani.” (Luka 12:32) Murummwa Yohani ooloca waaca waya vaavaa owo aalonceiye wi Yesu aheemela “vamwako Siau. Ni [yowo] yàkhalavo atxhu matxikhwi nsana nimoha ni matxikhwi makhumi masese ni masese [144.000].”​—Wupulula 14:1.

²⁴ Akiristu Yaala 144.000 apacenrye oviihiwa liini? Piipiliya onnanleela wi eyo yaahaala weereya Kiristu apacenrye olamulela wirimu. (1 Korinto 15:23) Hiyaano nnakhala mu elukuluku yeeyo, nave ancipale a Akiristu yaala 144.000 aaviihiwa, nave hiihaano ari wirimu. Yaale nlelo ari veelaponi yavathi ni yaale anakhwa mmahiku ahu yaala annaviihiwa moohilekela wi eye wirimu. Nyenya, achu ancipale anahaala oviihiwa omwaahiyu wi ekhale Mparataiso veelaponi yeela yavathi.

25. Tiheeni nnahaalaahu ohuserya mmwaha onacharela?

²⁵ Moohilekela, Yehova onahaala owoopola achu oothene mu okapuro wa okhwa, nave okhwa horwa okhala! (Mwaalakhanye Isaiya 25:8.) Nyenya ale anaya wirimu, tiheeni anahaalaaya weeraka weiwo? Piipiliya onnaloca wi awo anaya olamulelaka ni Yesu mu Omwene. Nnahaala ohuserya sincipale vooloca sa Omwene yoola mmwaha onacharela.