Mwaathanle Asinthamwene Anyu Mmahiku Yaala Ookuchula
“Wátána wonanara onnapahula makhalelo órera.”—1 AKOR. 15:33.
MACIPO: 73, 119
MWAAHAALA WAAKHULA HAI?
Waataana woonanara waakumiherye eheeni wa Aisarayeli?
Ntakhara heeni akapuro a Yehova anaphwanela othela “nyenya mwa Apwiya”?
Taani nnaphwanelaahu waataanano?
1. Elukuluku taani nnakhalaahu hiihaano?
NNAKHALA mu ilukuluku sookacamiha. Piipiliya onaloca elukuluku epacenrye mu eyaakha ya 1914 ntoko “mahiku ókutchula.” Mu “ilukuluku sohósha” sinnakhumelela ichu soonanaraxa seiyo sahintonko okhumelela. (2 Tim. 3:1-5) Nyenya, elapo ennatitelela onanara, woona wi Piipiliya aaloherya wi “atchu ónanara ni ówoka, enarwa-yimunanararu okhala wokhala.”—2 Tim. 3:13.
2. Tiheeni enooniheryiwa mmathatelo a elapo yeela? (Moone eruku yoopacerya.)
2 Vooloca sa mathatelo, achu ancipale annoona nave anneera ichu seiyo Piipiliya onaloceiye ntoko nlala, ocapaheya, onamulosiwe, naari meerelo makina oonanara. Mmukhalelo mukina, Interneti, marehereryo a televisau, ixilema, ni miyaha sa irevista wiiliwiili sinnooniherya nlala ni ocapaheya mmukhalelo wawunlaana. Meerelo yaawo khalai yooniwa okhala oohiphwanelela anneemereryiwa mmapuro makina. Nyenya meerelo awo haneemereryiwa ni Muluku.—Mwaalakhanye Aroma 1:28-32.
3. Yaale anakhala mwawiiwanana ni malakiheryo a Soorempwa anooniwa hai?
3 Oomuchara a Yesu a nsana noopacerya yaanasepa mathatelo oonanara. Nthowa na yeeyo ni meecelo aya oomuluku, awo yaanahooxiwa ni wiiciwa ni akina. Murummwa Petro aarepa: “Mummo taneraya yotikiniha wi hamunatchimakano ophiyerya oyeheryeya wiwo wa marimélelo, enawerelani opwalu.” (1 Pet. 4:4) Mmahiku ahu tho, yaale anakhala mwawiiwanana ni malakiheryo a Muluku anooniwa ntoko oothanyeya a elapo yeela. Mwawaaceererya, “othene yawo enakhwela okhala óthamalela mukumini mwa Kristu Yesu enarwa-yona sohósha.”—2 Tim. 3:12.
“WÁTÁNA WONANARA ONNAPAHULA MAKHALELO ÓRERA”
4. Olopola taani Piipiliya onanivaheiye vooloca sa elapo yeela?
4 Soorempwa sinnaalopola yaale anachuna weera yookhwela ya Muluku wi ehisivele elapo yeela ni meerelo aya. (Mwaalakhanye 1 Yohane 2:15, 16.) Mukhalelo wa malapelo, miyaha sa elapo, ni wa maroca wa elapo yeela—ophitaanyerya miselo saya—sinahooleliwa ni “muluku a mahiku yala a vathi vano” Satana Musaserya. (2 Akor. 4:4; 1 Yoh. 5:19) Ntoko Akiristu, nnaphwanela waathanla asinthamwene ahu. Masu a Muluku annaloca eparipari ela yookhweleya: “Muhiwokiwe; wátána wonanara onnapahula makhalelo órera.”—1 Akor. 15:33.
5, 6. Nnaphwanela osepa waataana ni achu taani, nave ntakhara heeni?
5 Wi nsepe onanariha meecelo ahu aphaama, hinnaphwanela waataana ni yaale anapaka ichu soonanara. Eyo henataphulela pahiru yaale oohiroromela nyenya tho yaale analoca wi annamulapela Yehova eniiha ehiiwelelaka malamulo awe. Wakhala wi Mukiristu ohuuwela mu epahu yeela nave ahicharuwa, hinnaphwanela otitelela waataanano.—Aro. 16:17, 18.
6 Wakhala wi ninnaataana ni yaale ahiniiwelela malamulo a Muluku, nnahaala weerano yoonanara wi neemereryiwe ni yaawo. Ntoko yootakiherya, wakhala wi ninnaataana ni muchu oocapaheya, nnahaala opaka mararuwo. Eyo enneereya ni Akiristu awiiveleela, nave akina a yaawo ahiikariwa mmulokoni nthowa nawi hiyaacharunwe. (1 Akor. 5:11-13) Wakhala wi hacharunwe, mukhalelo aya onahaala okhala ntoko yoole waalociwe ni Petro.—Mwaalakhanye 2 Petro 2:20-22.
7. Taani nnaphwanelaahu waataanano?
7 Naamwi nichunaka okhala eepewe ni yaale ahinachariha malamulo a Muluku, hinnaphwanela okhala asinthamwene aya. Yaahaala okhala yoonanara Namoona a Yehova opaka onthamwene ni muchu ohiri kapuro awiiveleela ni oororomeleya a Muluku nave ohinacicimiha malakiheryo Awe. Wooniherya ororomeleya Weekiristu echu yookhweleyaxa opwaha waataana ni yaawo ahinakhala mwawiiwanana ni malamulo a Yehova. Waataana wahu onaphwanela okhala pahiru ni yaale aneera yookhwela ya Muluku. Yesu aaloca: “Vawi mutchu yowo anera yokhwela ya Muluku, yowo ti munnaka, ni murokora, ni amai.”—Mar. 3:35.
8. Onthamwene woonanara waavolowenle hai Aisarayeli akhalai?
8 Sookhumelela soonanara sa onthamwene woonanara saahooneya ni Aisarayeli. Vaavaa Yehova aawooponleiye mookapuroni o Yiikuputu nave aahoolela mu Elapo ya Nlakano, aahaaleela vooloca sa waakhaliha yaawo yaakhala mu elapo yeeyo: “Weyano ohikokhoreke ohòlo wa amuluku aya nave ohiwepeseke yawo. Ohitxhariheke sòkhovelela saya, nto omaliheke ni opweseke iruku s’amuluku aya. Mukèpeseke miyanoru, Apwiya Muluku.” (Muk. 23:24, 25) Voocharela, Aisarayeli ancipale hiyaiwelenle sooleeliherya seiyo Muluku aavanheiye. (Sal. 106:35-39) Nthowa na okhala oohiroromeleya wa Muluku, Yesu aaloca ntakhara yaawo: “Vano empanyu enamukhala milepe.” (Mat. 23:38, BNM) Yehova aahaakhooca Aisarayeli, athaamiha mareeliho awe wa muloko muvyaani wa Akiristu.—Saw. 2:1-4.
MUTHOKORORYE NI EPHOOLE YEEYO MUNAALAKHANYAANYU NAVE MUNOONAANYU
9. Ntakhara heeni miselo sa elapo yeela inahaalaaya okhala soopahula?
9 Miselo sincipale sa elapo yeela sinnapahula makupa oomunepani a Akiristu. Ichu seiyo hisaano yoolakelela ya oteka nroromelo mwa Yehova ni soororomeliha sawe. Opwaha yeeyo, sinooniherya elapo yoonanara ya Satana ni sookhwela saya. Mwawiihiiha nnaphwanela okhalano ephoole etokweene wi nihithanle miyaha seiyo saahaala otannya “minkhela yelapo ya vathi.”—Tito 2:12.
10. Tiheeni enahaala weereya ni miselo soonanara sawaalakhanya ni sa woona?
10 Moohilekela, miselo soonanara sawaalakhanya ni sa woona inahaala omala. Soothene inahaala omala vaavaa elapo yeela enalamuleliwa ni Satana enahaalaaya opahuliwa. Masu a Muluku annaloca: “Nave elapo ya vathi ennavira ni minkheláya; nyenya yowo onerano okhwela wa Muluku onnikhalelaru okhala wokhala.” (1 Yoh. 2:17) Moolikana, namarepa a salmo aahiipa: “Ntakhara awera sonanara tiniriaya ekwasiwe: Nyenya yawo enamuweheryerya Yehova, yawo tinirwe yakhele elapo ya vathi. Vahanle vakhani nave ónanara enamala no: Ahe, onarwa-wanyiheryasha epuro awe, nave herwa-ekhala. Nyenya awitchachala tiniriaya yakhele elapo ya vathi; Nave enatheyano murechele wawacha.” Ophiyerya elukuluku taani? “Ekhaikhai tiniriaya yakhele elapo ya vathi, Yikhalelaru mummo okhala wokhala.”—Sal. 37:9, 11, 29.
11. Muluku onavaha hai yoolya yaphaama yoomunepani wa achu?
11 Moohiyana ni miselo sa elapo, marehereryo a Anamoona a Yehova mmahiku yaala ookuchula annavaha miselo seiyo inaceenyerya meecelo anahoolela wookumi woohimala. Mu nivekelo wa Yehova, Yesu aaloca: “Nyenya okumi wohimala ti ola, wi yasuwele Nyuwo Mulukuru éparipari, ni Yesu Kristu yowo mwámurummanyu.” (Yoh. 17:3) Moorweela wa marehereryo awe, Tiithi ahu a wirimu onnavahererya yoolya yeeyo enateka makupa oomunepani. Mareeliho a mukhalelo taani nryaahuno, okhalano irevista, iproxura, aliivuru, ixilema ni ipaaxina sa interneti seiyo inaceenyerya malapelo eeparipari! Marehereryo a Muluku wiiliwiili annavahererya tho mithukumano opwaha miloko 110.000 veelaponi yoothene. Mmithukumano mikhaani ni mitokotoko, ninnathokororya miselo inarweela Mpiipiliya, seiyo inateka nroromelo mwa Muluku ni sooloherya sawe.—Ahe. 10:24, 25.
MUTHELE “NYENYA MWA APWIYA”
12. Mutharihe ekano ya othela “nyenya mwa Apwiya.”
12 Waathanla asinthamwene ti yookhweleya xaxaxa wa Akiristu ari aciye anachuna othela. Mwawooneya, Masu a Muluku annanlopola: “Muhikhale ómakiwa mu nipisini vamoha ni óhiroromela óvuhana; vawi ekhaikhai eni ekawane hai ni yohikhale ekhaikhai? Akhweya omwaleya oni wátáne hai ni epiphi?” (2 Akor. 6:14) Piipiliya onnaalopola akapuro a Muluku yaawo anamwaavya oothelana wi ethele “nyenya mwa Apwiya,” yeeyo enataphulela othelana pahiru ni muchu ori mulapeli a Yehova awiiveleela, oopatisiwa onakhala mwawiiwanana ni yeeyo Soorempwa inahusihaaya. (1 Akor. 7:39) Moorweela wa othelana ni muchu a nroromelo, Akiristu annakhala asinthamwene a yaawo ari akapuro awiiveleela, nave Yehova onahaala waakhaviherya wooniherya nroromelo naya.
13. Nlamulo taani vooloca sa othela Muluku aavanheiye Aisarayeli?
13 Yehova oosuwela yeeyo eri yaphaama wa akapuro awe, nave onnooniherya moonelo awe vooloca sa othela. Moone nlamulo nookwakwaleya aavanheiye Aisarayeli moorweela wa Moose. Vooloca sa maloko oorukurerya yaawo yahaamulapela Yehova—Aisarayeli yaaleeliwa: “Muhatheleke athiyana aya: Muhahiye wi aninyu asithiyana etheliweke t’asilopwana a yawo, nave aninyu ehatheleke ana aya asithiyana. Mwera hihà, awo anamwahuweliha aninyu wi ehikitxhareke nave anan’wepesa amuluku akina. Apwiya anamunanariwa ni nyuwo, nave vohilekela anamotolosani.”—Malam. 7:3, 4, BNM.
14, 15. Ohichariha ohoolela wa Yehova waakumihenrye eheeni wa Soolomoni?
14 Omapacereryo wa omwene wa Soolomoni, aaveka miruku, nave Muluku amvaha miruku sincipale. Mwene Soolomoni aakhala muchu oovuwa ntoko mwene amiruku mu elapo yoothene. Chiryene, vaavaa mwene a mwaamuthiyana a elapo ya Sapa aamuxekunryeiye Soolomoni, aatikhina: “Miyano nkawerya wemererya, nto vano kirùlaka kihona ni mitho aka. Nkàthariheliwe nari mano eriyari ya seiya kinonaka. Miruku sà ni orèla wà iri mitokotokosa opwaha ihe kìwaka.” (1 Mam. 10:7, BNM) Yaweereya ya Soolomoni, ennooniherya yeeyo enakhumelela vaavaa muchu ohinachariheiye nlamulo na Muluku na ohithelana ni mmalapo.—Ekle. 4:13.
15 Opwaha ichu soothene Muluku aapankeiye ntakhara yoowo, Soolomoni haacharinhe nlamulo na Muluku na ohithelana ni athiyana a maloko oorukurerya, yaawo yahaamulapela Yehova. Soolomoni “àhathela athiyana antxipale a ilapo ikina” nave aahaathela athiyana 700 nave aakhalano asimpwana 300. Ni yookhumelela taani? Uuluvanleiye, “àwepesa amuluku a asariye, . . . Salomoni àvirikanya ochuna w’Apwiya.” (1 Mam. 11:1-6, BNM) Yootakiherya yoonanara ya Soolomoni yaananariha miruku sawe nave yaamweeriha okhala ocai wa malapelo eeparipari. Ela yoolopola wa Akiristu yaawo anuupuwela othelana ni muchu ohinamusivela Yehova!
16. Ekano taani ya Soorempwa enaphariheleya wa akapuro a Muluku arino oothelana oohiroromela?
16 Hanka wakhala wi muchu okhanle mulapeli a Yehova athenle nave nlelo oothelana awe heemerenrye eparipari? Piipiliya onnaloca: “Hihátho athiana nyu, mwawiwelelani asíyanyu a nyuwo mkhatinyu; wi, akinatho yáhiwelelaka masu, yahileketchiwe ehikhanleno masu ni mukhalo wa athiana.” (1 Pet. 3:1) Masu ala anaaloca athiyana Eekiristu, nyenya masu mamohamoha annaphariheleya wa alopwana tho akhanle alapeli a Yehova ethenle. Ekano ya Piipiliya ti yookwakwaleya: Mukhale mutheli aphaama, nave mukhale mwawiiwanana ni malakiheryo vooloca sa othela. Oothelana ancipale ari oohiroromela anneemererya eparipari nthowa na woona matorokelo a oothelana aya vaavaa aniiwelelaaya malamulo a Muluku.
MWAATAANE NI YAALE ANAMUSIVELA YEHOVA
17, 18. Ntakhara heeni Noowa ni Akiristu a nsana noopacerya yaavuluwa mu makuchuwelo a mukhalelo wa ichu yaakhalaaya?
17 Onthamwene woonanara onnananariha makhalelo aphaama, nyenya waataana waphaama onnakumiherya makhalelo aphaama. Mmuthokororye Noowa, aakhanle mu elapo yoonanara, nyenya haarino nchuno na waapaka anamakhala a elapo yeeyo asinthamwene awe. Mu elukuluku yeeyo, “Apwiya yàhòna wi mwelaponi atxhu yànvira ekhalaka ònanara murima. Mupuwelo aya ni otxhuna waya wàri opaka sònanara mahiku othene.” (Map. 6:5) Muluku aalakelela omaliha mukhalelo yoole woonanara ni yaawo yaatannya moorweela wa maahi mancipale. Nyenya, “Nowe àri muchu awokololowa . . . nave mmetxeloni mwawe ànamusiveliha Muluku.”—Map. 6:7-9, BNM.
18 Mweeparipari Noowa haapanke onthamwene ni achu yaawo. Owo ni amusi awe athanu napiili yaaweiwa opaka muteko yoowo Muluku aavanheiye, wa ompaka mwaaceya. Mu elukuluku emohamoha, Noowa aari tho “mulipa-olaleya ékhaikhai.” (2 Pet. 2:5) Muteko wa Noowa wa olaleerya, ompaka mwaaceya, ni waataana ni emusi saamweeriha okhala ooweiwa apakaka ichu sinamuhakalaliha Muluku. Ntoko yookhumelela, Noowa ni emusi awe yaavuluwa mu Maahi Mancipale. Ninnathamalela woona wi oothene yeehu nri anamwane a yaawo yaamurumenle Yehova—Noowa, mwaariye, anamwane awe ni asaaraya. Moolikana, nroromelo ni wiiwelela saahaakhaviherya Akiristu a nsana noopacerya okhala ocai wa achu oohiroromela ni ovuluxiwa mu otoloxiwa wa Yerusalemu ni mukhalelo wa ichu wa Ayuuta mu 70 E.K.—Luka 21:20-22.
19. Wi neemereryiwe ni Muluku, tiheeni nnaphwanelaahu opaka?
19 Ntoko alapeli a Yehova nnaphwanela omutakiherya Noowa, ni emusi awe ni wiiwelela wa Akiristu a nsana noopacerya. Hannaphwanela opaka makupa a mukhalelo yoola woonanara nyenya nipake onthamwene ni macikhwi a annihu ni arokora oororomeleya. Okhala ni yaale anahooleliwa ni miruku sa Muluku enahaala onikhaviherya okhala ‘awíthipela mu nroromelo’ mu ilukuluku seiya sookacamiha. (1 Akor. 16:13; Masi. 13:20) Nave muupuwele ewehereryo ahu yootikhiniha! Wakhala wi nohaathanla asinthamwene ahu mmahiku yaala ookuchula nnamukhala ophiyerya omakuchuwelo wa mukhalelo yoola ni ovolowa mu elapo evyaani yeekhaikhai ya Yehova yeeyo eri vakhiviru!