Mutitelele Wuupuwelela Ichu Soomunepani

“Othokororye otitela seiho, wi atxhu othene yoneke winnuwa wa murima-à.”​—1 TIMÓTEO 4:15.

MACIPO: 57, 52

MUNOONA HAI?

Wuupuwelela onataphulela eheeni?

Ichu taani saphaama nnaphwanelaahu wuupuwelelaka?

Nnaphura hai orweela wa wuupuwelela Masu a Muluku mahiku oothene?

1, 2. Tiheeni enaahiyaniha achu ni axinama?

OCOOPARE wa muchu ti wootikhiniha. Ntoko yawooniherya, achu aakhalano mavyakelo a ohuserya elocelo. Nave elocelo ennanikhaviherya waalakhanya, orepa, oloca ni wiiwexexa yeeyo nnawiriyanaahu. Ennanikhaviherya tho ovekela ni omwiipela Yehova. Soothene seiya sinnanihiyaniha ni axinama. Alipa oohuserya hanasuwela phaama ti mwawiihai ocoopare onaweryaaya weera ichu seiya sootikhiniha.

² Owerya opharihela elocelo yamahala ya Yehova. (Salumu 139:14; Wupulula 4:11) Owo tho oonivaha yamahala ekina enanihiyaniha ni axinama. Achu apatuxiwe “vomulatxa Muluku.” Nookhalano othanla wootaphuwa, ela ti wi, opaka soolakelela sahu. Nave nnanwerya olakelela opharihela elocelo wi nimurumeele ni omuhakalaliha Yehova.​—Maphatxuwelo 1:27.

3. Tiheeni Yehova onivanheiye wi nikhale a miruku?

³ Yehova ohooniherya mukhalelo wa omurumeela ni omucicimiha moorweela wa onivaha Piipiliya. Piipiliya anteero naari makupa awe onnaphwanyeya mu ilocelo soopwaha 2.800. Vaavaa nnuupuwelelaahu yeeyo Piipiliya onaloceiye, nnahaala opacerya wuupuwela ntoko Muluku onuupuweleiye. (Salumu 40:5; 92:5; 139:17) Nave muupuwelo wa Yehova onnaneeriha okhala a miruku ni onikeriha wookumi woohimala.​—Mwaalakhanye 2 Timóteo 3:14-17.

4. Wuupuwelela onataphulela eheeni, nave makoho taani nnahaalaahu othokororya?

⁴ Wuupuwelela onataphulela wuupuwela echu ni waanyiherya mwawiiseela. (Salumu 77:12; Masiposipo 24:1, 2) Ninnaphura vancipale vaavaa nnuupuwelelaahu yeeyo nihusenryaahu sa Yehova ni Yesu. (Yohani 17:3) Mmwaha yoola anahaala waakhuliwa makoho ala: Mukhalelo taani wa waalakhanya onahaala onikhaviherya wuupuwelela? Tiheeni nnaphwanelaahu wuupuwelela? Nave tiheeni enahaala onikhaviherya wuupuwelelaka moohihiyererya ni ohakalalano?

MPHWANYE MPHURELO MU OHUSERYA WANYU

5, 6. Tiheeni enahaala wookhaviheryaani wuupuwela ni wiiwexexa yeeyo mwaalakhannyaanyu?

⁵ Moosuwela wi sookhalavo ichu muneeraanyu ohiri woochuneya wuupuwela? Ichu ntoko omumula, weeca naari weeciha ecika. Moohiciha, akhweya munanwerya waalakhanya muhuupuwenle. Akhweya munnuupuwela ichu ikina mwaalakhanyaka. Tiheeni munaphwanelaanyu weera wi musepe ohuupuwelela? Ti woochuneya oteteiwa ni yeeyo munaalakhanyaanyu ni wuupuwelela yootaphulela aya. Vaavaa munaphiyaanyu omakuchulo wa eparakrafo naari wa muru mukhaani, mmaale nave muupuwelele yeeyo mmanlaanyu waalakhanya. Muupuwelele yeeyo muhusenryaanyu, nave mwiiwexexe.

⁶ Alipa oohuserya ahoona wi ti wookhweya wuupuwelela echu yeeyo naalakhannyaahu moovuwa. Mpatuxa ahu oosuwela yeela, ti nthowa nene aamulenleiye Yosuwa wi amwaalakhanye liivuru a Nlamulo ni ‘wupuwelela.’ (Mwaalakhanye Yosuwa 1:8.) Omwaalakhanya Piipiliya moovuwa enahaala wookhaviheryaani wuupuwela ichu sincipale.

7. Elukuluku taani yoophwanelela wuupuwelela sa Piipiliya? (Moone eruku yoopacerya.)

⁷ Ti woochuneya wiilipixerya wi nuupuwelele yeeyo nnahuseryaahu. Mwa yeeyo ti waphaama wuupuwelela mu elukuluku muhiri oovelavela va nipuro noomaaleleya, weiwo ihiriwo ichu inahaala owuukhulaani. Namarepa a Salumu Tavite uupuwelela vaavaa aahuhumuweiye ohiyu. (Salumu 63:6) Yesu, yoowo aari oophaameya, aanathanla mapuro oomaaleleya wi uupuwelele ni ovekela.​—Luka 6:12.

ICHU SAPHAAMA WI MUUPUWELELE

8. (a) Tiheeni nnaphwanelaahu wuupuwelela? (b) Yehova onoona hai vaavaa nnalocaahu sa yoowo wa akina?

⁸ Mwawaacererya ni yeeyo munaalakhanyaanyu Mpiipiliyani, sookhalavo ichu ikina munaphwanelaanyu wuupuwelela. Ntoko yootakiherya, vaavaa munoonaanyu soopatuxa sootikhiniha sa Yehova, mwiikohe: ‘Ela enakihusiha eheeni vooloca sa Yehova?’ Muupuwelo yoowo onahaala oweerihaani omuthamalela Yehova mu nivekelo. Nave munahaala ochuna oloca moonelo anyu ni akina. (Salumu 104:24; Saweriwa T’arummwa 14:17) Yehova onnoona nave onnahakalala vaavaa nnuupuwelelaahu ni oloca sa yoowo wa mukina ni mukhwaawe. Piipiliya onnaniroromeliha: “Yàrempwa yale anàsuwela Apwiya ni anatxitximiha [naari wuupuwelela] otokwene aya.”​—Malakiya 3:16.

9. (a) Tiheeni Paulo aamulenleiye Timoteo wi uupuweleleke? (b) Tiheeni nnaphwanelaahu wuupuwelela vaavaa nniireheryaahu ntakhara olaleerya?

⁹ Murummwa Paulo aamuleela Timoteo wi uupuweleleke mukhalelo malocelo awe, meecelo awe ni ohusiha wawe waavolowelaaya akina. (Mwaalakhanye 1 Timóteo 4:12-16.) Nyuwaano tho munanwerya wuupuwelela ichu seiya. Ntoko yootakiherya, ti woochuneya wuupuwelela vaavaa munareheryaanyu yoohuserya ya Piipiliya. Mmuupuwele muhuserya anyu nave mwaavye nikoho naari niphwanaphwaniho nnahaala omukhaviherya oya vahoolo. Vaavaa muniireheryaanyu mmukhalelo yoola, nroromelo nanyu ninnalipa nave munnakhala muhusiha aphaama a Piipiliya. Munahaala tho ophura moorweela wa wuupuwelela muhaakumve oya mmuteko wa olaleerya. (Mwaalakhanye Esdra 7:10.) Akhweya mwaalakhanye nikupa na liivuru a Saweriwa T’arummwa wi yookhaviheryeeni okhala a mvai mu orummwa. Muupuwele tho soorepa sa Mpiipiliya munachunaanyu opharihela mu nihiku nenlo ni soolaleeryiwa mulakelenlaanyu ovaha. (2 Timóteo 1:6) Nwuupuwele achu a ekulucu ni yeeyo munayaanyu oloca wi yaasivele. Vaavaa muniireheryaanyu mmukhalelo yoola, munahaala owerya ompharihela phaama Piipiliya wi mvahe onamoona.​—1 Korinto 2:4.

10. Ichu taani ikina saphaama nnaphwanelaahu wuupuwelela?

¹⁰ Echu taani ekina munaphwanelaanyu wuupuwelela? Wakhala wi munnarepela vaavaa onalociwaaya mwaha wa vanlakani mmulokoni naari mmithukumano mitokweene, mwiivahe elukuluku wi muuluulele. Vaavaa muneeraanyu ela, mwiikohe: ‘Tiheeni kaahusenryaaka orweela wa Masu a Muluku ni marehereryo awe?’ Muupuwelele tho miyaha sa miyeeri soothene sa Mulipeleli ni Despertai! ni soolaleeryiwa ivyaani ivonyiwe mmuthukumano wa muceche. Vaavaa munamwaalakhanyaanyu Anuário, mwamala waalakhanya yaweereya mwiichuuwele, muupuwelele wi evolowe mmurimani mwanyu. Mwaawaalakhanyaka soolaleeryiwa, mucekeke makupa oochuneya naari murepele. Ela enahaala wookhaviheryaani vaavaa muniireheryaanyu wi mpake ekwaha yookookela, okukhula naari oloca mwaha. Opwaha soothene, vaavaa munuupuwelelaanyu yeeyo mwaalakhannyaanyu, munnahiya wi etannye murima anyu ni omuthamala Yehova mu nivekelo nthowa na yeeyo muhusenryaanyu.

MUUPUWELELE MITEKO SA MULUKU MAHIKU OOTHENE

11. Liivuru taani oochuneyaxa nnaphwanelaahu omuupuwelela, nave eyo enii enikhaviherye hai? (Moone tho masu a vathi.)

¹¹ Piipiliya liivuru oochuneyaxa nnaphwanelaahu omuupuwelela. Hanka wakhala wi nihiku nammoori moowatiihiwa okhalano Piipiliya?a (Moone masu a vathi.) Haavo onawerya woowatiihaani wuupuwelela ichu muryaanyuno mmuupuweloni, ntoko soorepa sawoosivelaani naari macipo a Omwene. (Saweriwa T’arummwa 16:25) Munepa wa Muluku onahaala wookhaviheryaani wuupuwela ichu muhusenryaanyu, seiyo inahaala wookhaviheryaani okhala oororomeleya.​—Yohani 14:26.

12. Tuuvi ori mukhalelo mmoha wa orehererya omwaalakhanya wanyu Piipiliya mahiku oothene?

¹² Tuuvi ori mukhalelo mmoha wa orehererya omwaalakhanya wanyu Piipiliya mahiku oothene? Akhweya mahiku makina munanwerya waalakhanya ni wuupuwelela waalakhanyiwa wa Piipiliya wa Exikola ya Orummwa Woomuluku. Mahiku makina munanwerya waalakhanya Michaka sa Mateu, Marko, Luka ni Yohani ni wuupuwelela yeeyo Yesu aalonceiye ni aapankeiye. (Aroma 10:17; Ahebri 12:2; 1 Pedro 2:21) Nookhalano tho ekaruma enathariha saweereya sa okumi wa Yesu moocharelana. Ekaruma eyo enamookhaviheryaani ophura orweela wa owaalakhanya wanyu aliivuru a Michaka.​—Yohani 14:6.

NTAKHARA HEENI WUUPUWELELA TI WOOCHUNEYA?

13, 14. Ntakhara heeni ti woochuneya otitelela wuupuwelela vooloca sa Yehova ni Yesu, nave eyo enahaala oneeriha weera eheeni?

¹³ Omuupuwelela Yehova ni Yesu enanwerya omukhaviherya muchu okhala a wiichwa ni okhalano nroromelo noolipa. (Ahebri 5:14; 6:1) Muchu ohinuupuwelela vooloca sa Muluku onahaala oyeleela onthamwene awe ni Yehova naari omukhooca yoowo. (Ahebri 2:1; 3:12) Yesu aaloca wi wakhala wi hiniwiriyanne naari weemererya Masu a Muluku ni “murina waphama ni wawiwelela,” hinii ‘nivilele.’ Ohiya yeeyo, naahaala “oteteiwa, na muhakhu ni na opuha sa elapo ela.”​—Luka 8:14, 15.

¹⁴ Mwawiihiiha, hankooni ntitelele wuupuwelela sa Piipiliya ni omusuwela phaama Yehova. Ela enahaala onikhaviherya otakiherya mikhalelo sawe ni omuchu awe. (2 Korinto 3:18) Nnaphwanela otitelela ohuserya sincipale vooloca sa Tiithi ahu a wirimu ni omutakiherya okhala wookhala. Hiyaavo echu yoochuneyaxa opwaha yeela!​—Eklesiyaste 3:11.

15, 16. (a) Munaphura hai orweela wa wuupuwelela sa Yehova ni Yesu? (b) Ntakhara heeni ikwaha ikina ti woovila wuupuwelela, nave ntakhara heeni nnaphwanelaahu wiilipixerya?

¹⁵ Wuupuwelela sa Yehova ni Yesu enamookhaviheryaani okhapelela mvai ntakhara eparipari. Mvai anyu onahaala waalipiha anna ni achu munaaphwanyaanyu mu olaleerya. Nave vaavaa munuupuwelelaanyu yeeyo Yehova oweerenleiyeni orweela wa ovaha mukucho wa Yesu, munahaala otitelela ocicimiha onthamwene anyu ni Muluku. (Aroma 3:24; Tiyako 4:8) Munna Marko a Afrika Oohico yoowo aamalinhe iyaakha raru mukariposo nthowa na nroromelo nawe onnaloca: “Wuupuwelela onanwerya olikanyihiwa ni weeceeca mmapuro ooreera. Vaavaa nnuupuwelelaahu ichu soomunepani, ninnaphwanya ichu ivyaani vooloca sa Muluku ahu Yehova. Mu ilukuluku ikina vaavaa kinakhalaaka awuukhuwa ni omwaahiyu, kinnamukuxa Piipiliya nave kinnuupuwelela Soorepa. Eyo ennakikhaviherya okhala oomaaleleya.”

¹⁶ Okumi mweelapo yeela ti woosareya makacamiho ophiyerya wi onakhala woovila okhalano elukuluku ya wuupuwelela miyaha sa Piipiliya. Patrick, munna o Afrika aaloca: “Muupuwelo aka ori ntoko ekaaxa irimo michaka soohiyana hiyana, soochuneya ni soohichuneya seiyo inaphwanela waalakhanyiwa mahiku oothene. Vaavaa kinatholatholaaka yeeyo eri mmuupuweloni mwaka, ikwaha sincipale kinnaphwanya ‘sotxhuna sintxipale,’ nave kinnavekela wa Yehova wi kiwerye wuupuwelela ni muupuwelo waweela. Kinnamaliha elukuluku yincipale wi kipacerye wuupuwelela ichu soomunepani, nave weerano eyo ennakaacameliha ni Yehova. Ennahula muupuwelo aka wi kiiwexexe phaama eparipari.” (Salumu 94:19) Aai, ninnaphura vancipale vaavaa nnaalakhanyaahu ni wuupuwelela sa Piipiliya mahiku oothene.​—Saweriwa T’arummwa 17:11.

MUKHALELO WA OPHWANYA ELUKULUKU

17. Munii mphwanye hai elukuluku ya wuupuwelela?

¹⁷ Akina annavinya wooxixelo wi yaalakhanye, yuupuwelele ni ovekela. Akina aneerano othana. Nyuwaano akhweya munnasiveliwa omwaalakhanya Piipiliya ohiyu muhaakumve okona. Akina anasiveliwa omwaalakhanya wooxixelo ni wuuluula ehaakumve okona. (Yosuwa 1:8) Echu yoochuneya ori ‘ophura phama elukuluku’ anyu, ela ti wi, omaliha elukuluku vakhaani ni ichu soohichuneya wi niwerye wuupuwelela Masu a Muluku mahiku oothene.​—Éfeso 5:15, 16.

18. Tiheeni Piipiliya onaroromeliheiye wa yaale anuupuwelela Masu a Muluku mahiku oothene ni opharihela yeeyo anahuseryaaya?

¹⁸ Piipiliya onnaroromeliha wi Yehova onahaala waareeliha yaale anuupuwelela Masu awe ni yaale aniilipixerya opharihela yeeyo anahuseryaaya. (Mwaalakhanye Salumu 1:1-3.) Yesu aaloca: “Òrèriwa toko, t’ale aniwa masu a Muluku ni enakhapelela”! (Luka 11:28) Wuupuwelela Masu a Yehova mahiku oothene enahaala oruuha ncicimiho wa yoowo. Neerano yeeyo, Yehova onahaala oniliva ni ohakalala hiihaano ni okumi woohimala mweelapo evyaani.​—Tiyako 1:25; Wupulula 1:3.

[Nsu na vathi]

[Ekaaxa va epaaxina 31]

MASU ATHARIHIWE

Wuupuwelela ichu soomunepani: Muupuwelele soopatuxiwa naari echu mwaalakhannyaanyu Mpiipiliya naari mu soolaleeryiwa sahu. Musuwele echu taani munahuseryaanyu vooloca sa Yehova ni Yesu, mukhalelo wa waatakiherya, ni mukhalelo wa waakhaviherya akina. Ela ennawaataanihaani ni Yehova