MWAHA WA EKAAPA | MPHURELO WA NIVEKELO

Ntakhara Heeni Achu Annavekela?

“Miyaano kaari mutokweene a mapokha. Kaanavekela wi kikhaleno ekari ya ovootha. Eyo hetonko weereya.”​—Samuwele,a Keniya.

“Ikwaha soothene oxikola naanapaka mavekelo naahusihiwaahu.”​—Teresa, Filipina.

“Kinnavekela vaavaa kinakumanaaka ni makacamiho. Kinnavekela wi kileveleliwe soocheka ni okhala Mukiristu aphaama.”​—Matalena, Kana.

Sooloca sa Samuwele, Teresa, ni Matalena sinnooniherya wi achu annavekela ntakhara mathowa mancipale, makina oocicimiheya opwaha a akina. Mavekelo a achu akina teeparipari; nyenya a akina anatikitheryeya mu soochuna sa muchu mukhateiye. Moohipwacha, wakhala wi anavekela wi evire mu weehiwa oxikola, wi nikhuuru na mapokha nnaasivela nivoothe, wi Muluku aakhaviherye mu okumi wa echoko naari ni mathowa makina, macikhwi aachu annoona ochuneya waya ovekela. Chiryene, otholathola onnooniherya wi ophiyerya tho achu ahirino malapelo annapaka mavekelo moohihiyererya.

Nyuwaano munnavekela? Wakhala wi ti hiiha, tiheeni munavekaanyu? Moohipwacha wakhala wi mookhalano yookhovelela ya ovekela naari hooye, munaphwanela wiikoha: ‘Apwanne mavekelo annakhaviherya? Ookhala onwiriyana?’ Namarepa mmoha ooloca wi ovekela ori ntoko “murece . . . naari weera echu enamuhakararya muchu.” Achu a nikhuuru na ekumi aakhalano moonelo mmohamoha, yoonaka ovekela ntoko “mukhalelo mukina wa oloola.” Apwanne achu yaawo anavekela annaphwanya mphurelo mukina opwaha omaaleleya mmuupuweloni?

Moohiyana, Piipiliya onnooniherya mavekelo ohiya ntoko mukhalelo wa oloola. Owo onnanleela wi ookhala chiryene onwiriyana mavekelo anapakiwa mmukhalelo waphaama nave ntakhara ichu saphaama. Apwanne ela eparipari? Hankooni noone sawooniherya sene.

[Nsu na vathi]