MWAHA WA EKAAPA | MPHURELO WA NIVEKELO
Apwanne Ookhala Onwiriyana?
Achu akina anuupuwela wi ovekela oyeleela elukuluku, wi haavo onwiriyana. Akina annavekela nyenya anoona wi hanaakhuliwa. Muchu yoowo ohinamweemererya Muluku, aamwaanyiherya nave aavekela: “Mukoonihe eneneeryo ya vakhaani.” Voocharela aaloca wi Muluku aari “oomaala ene.”
Piipiliya onnaniroromeliha wi ookhala Muluku eeparipari yoowo onwiriyana mavekelo. Piipiliya ookhalano masu ala a achu akhalai: “Apwiya [Muluku] anamomorelani ikharari ni anamokhaviheryani nyuwano mwawitxhanaru.” (Isaiya 30:19) Yoorepa ekina ya Piipiliya enii: “Annàsivela Apwiya mavekelo a atxhu òrèra murima.”—Masiposipo 15:8.
Piipiliya ookhalano saweereya sa achu yaawo mavekelo aya yaakhuliwe. Yoorepa emoha enaloca wi Yesu “avekela . . . anvekelaka yowo awerya onvulusa” nave “àhakhuleliwa.” (Ahebri 5:7) Sootakiherya ikina inaphwanyeya mu Daniyeli 9:21 ni 2 Matharihelo 7:1.
Ntakhara heeni achu akina anoona wi mavekelo aya hanaakhuliwa? Wi mavekelo ahu ewiriyaniwe, nnaphwanela omvekelaka Muluku a Mpiipiliya, Yehova,a ohiya wa muluku mukina naari makholo akhalai. Muluku onachuna wi nimvekeke “etxhu ntoko okhwela wawe”—ichu oneemereryeiye. Wakhala wi ninnavekela mmukhalelo yoowo, Muluku onnaniroromeliha wi “onnaniwa.” (1 Yohani 5:14) Mwawiihiiha, wi mavekelo ahu ewiriyaniwe, nnaphwanela omusuwela Muluku a Mpiipiliya ni yookhwela awe.
Achu ancipale annoona wi nivekelo ori ntoko muhapo wa malapelo nave wi Muluku onnawiriyana ni waakhula mavekelo. Isaki o Keniya onnaloca: “Kaavekela kivekaka omwiiwexexa Piipiliya, voocharela muchu mmoha aakaacamela nave aakivaha nikhaviheryo kaachunaaka.” Hilda o Filipina, aanachuna ocharuwa omulya soona. Amanle wiilipixerya, iyawe aamuleela ariki: “Ntakhara heeni ohinavekelaawe wa Muluku?” Hilda aapharihela ekano ela nave onnaloca: “Ti wootikhiniha mukhalelo Muluku aakikhavihenryeiye. Kaapacerya oyeleela nchuno na omulya soona. Vano koocharuwa.”
Apwanne Muluku onnachuna wookhaviheryaani ni makacamiho anyu yaawo aniiwanana ni yookhwela awe?
[Nsu na vathi]
a Yehova nsina na Muluku ntoko nnooniheryiwaaya Mpiipiliya.
[Yooleeliherya va epaaxina 4]
Yesu aavekela wa Tiithi awe, nave “àhakhuleliwa.”—Ahebri 5:7