MWAHA WA EKAAPA | MPHURELO WA NIVEKELO
Ntakhara Heeni Muluku Onnaniwopa Ovekela?
Muluku onnavaha nikhaviheryo noonthamwene.
Asinthamwene annalocihana wi yaaceererye waataana waya. Moolikana, Muluku onnaniwopa wi nloceke ni yoowo, ahulaka ephiro wi nipake onthamwene ni yoowo. Owo onnaloca: “Munamukitxana ni munamukivekela, miyano kinan’wiwani.” (Yeremiya 29:12) Vaavaa munavekelaanyu munahaala ‘omwatxamela Muluku nave owo onanwatxamelani.’ (Tiyako 4:8) Piipiliya onnaroromeliha: “Apwiya ari vakhiviru va yale anawitxhana.” (Salumu 145:18) Vaavaa nnavekelaahu moohihiyererya, onthamwene ahu ni Muluku onamunnuwa.
Muluku onnachuna wookhaviheryaani.
Yesu aaloca: “Tani wa nyuwano onanvaha mwanawe nluku, anvenke ephau? Nari ani anvahe enowa aniha anvenke ehopa? Vano nyuwo . . . mòsuwela wavaha aninyu itxhu saphama, Atithinyu ari wirimu anamutepa osuwela wavaha saphama yale anàveka!” (Mateu 7:9-11) Aai, Muluku onnoowopani wi mvekeleke ntakhara “ti yowo onokhapelelani” nave onnachuna wookhaviheryaani. (1 Pedro 5:7) Onnoowopani wi mmuleele makacamiho anyu. Piipiliya onnanleela: “Muhukhuleyeru ni etxhu. Nto mwa sothene munvekeke Muluku, ni opatxhanyerya, yeyo munakhwelanyu, mmuthamalelaka yowo.”—Filipi 4:6.
Achu aakhalano soothowa soomunepani.
Alipa oohuserya mukhalelo wa achu ahoona wi achu ancipale annoona ochuneya wa nivekelo, ophitaanyerya yaale ahinamweemererya Muluku.a Ela ennooniherya wi achu apakiwe ni soothowa soomunepani. Yesu aaloca: “Òrèriwa t’awo ari òhawa mmurimani.” (Mateu 5:3) Mukhalelo mmoha wa okhwaaniha yoothowa yeela ori oloca ni Muluku.
Wakhala wi noheemererya nwopelo wa Muluku wa ovekela, mphurelo taani nnahaalaahu okhalano?
[Nsu na vathi]
a Otholathola weeriweno mu 2012 wohooniherya wi 11 porsento a achu ahinamweemererya Muluku a Estatu Unitu annavekela ekwaha emoha va mweeri.
[Yooleeliherya va epaaxina 5]
“Apwiya ari vakhiviru va yale anawitxhana.”—Salumu 145:18
[Eruku va epaaxina 5]
Nivekelo Nnaphitaanyerya Eheeni?
Piipiliya onnooniherya wi nivekelo ninnavolowela makhalelo mancipale a okumi ahu. Nivekelo ninnaphitaanyerya ichu iha:
Olokoha “Kòlokoha yotxheka aka; nkivinthe yonanara aka.”—Salumu 32:5.
Othamalela “Ti worera omuthamala Yehova.”—Salumu 92:1, Nlakano Nahihano.
Ocicimiha “Kinamwàtxitximiha Apwiya elukuluku yothene; ntxitximiho naya nnamukhala mwano mwaka elukuluku yothene.”—Salumu 34:2.
Oveka Ikano “Muketxiheke mphironi mwa ikano sanyu, ntakhara sinnakisivela.”—Salumu 119:35.
Oveka Ikuru “Murukunuwe ni mukiwehe, mukimorele ikharari, munvahe mulapeli anyu ikuru.”—Salumu 86:16.