MWAHA WA EKAAPA | MPHURELO WA NIVEKELO

NIVEKELO Nnookhaviheryaani Hai?

Muhaakumve ovolowa mmutekoni, akhweya munniikoha: ‘Tuuvi okhanle mphurelo aya?’ Apwanne ti woonanara opaka nikoho nenla vooloca sa nivekelo? Hooye. Hiyaano ninnachuna osuwela mphurelo aya. Mulopwana oororomeleya Yupu aakoha: “Kamwiichana Muluku, apwanne onamukaakhula?”​—Yobi 9:16, Tradução do Novo Mundo.

Mmwaha ovirale, noothokororya sawooniherya sa wi ovekela tahi pahiru muhapo wa malapelo naari murece wa ohakalaliha muupuwelo. Muluku eeparipari onnawiriyana chiryene mavekelo. Wakhala wi ninnavekela moophwanelela ni wa ichu saphaama, owo onahaala oniwiriyana. Owo onnaniwopa waataana ni yoowo. (Tiyako 4:8) Mwawiihiiha, tiheeni enahaala okhumelela wakhala wi ninnavekela? Hankooni noone sookhumelela sene.

Murecele mmuupuweloni.

Vaavaa makacamiho anakhumelelaaya mu okumi anyu, munnakhala ookukhumuwa ni makacamiho? Mweelukuluku yeeyo, Piipiliya onnanceenyerya ‘ohihiyererya ovekela’ ni ‘onvekaka Muluku’ mu soothene. (1 Tesalónika 5:17; Filipi 4:6) Piipiliya onnaniroromeliha wi wakhala wi noovekela, “muretxele wa Muluku, onapwaha miruku sothene, onamukhapelela mirima [sahu] ni mupuwelo [ahu].” (Filipi 4:7) Nnahaala okhala oomaaleleya moorweela wa omuleela Tiithi ahu a wirimu sawuukhula sahu. Owo onnanceenyerya mu Salumu 55:23: “Mwàreye Apwiya miritxi sanyu, awo anamukhala ikuru sà.”

Achu oohaalakhanyeya orukurerya elapo annapuha murecele yoowo. Hee Ran, o Koreya Oohico, onnaloca: “Naamwi kirino makacamiho matokweene, kavekela kinnoona okhala ootaphuwa nave kinnoona wi kinnakhalano ikuru sa ovilela.” Sesilia, o Filipina oriye: “Woona wi ka maai, kinnuukhuwa vancipale ni anaaka ni amama aka awuuluvala. Nyenya moorweela wa nivekelo, kinnawerya ovilela nihiku nnihiku. Koosuwela wi Yehova onahaala okikhaviherya waakhapelela.”

Nihakalaliho mu soohooxa.

Nyuwaano munnahooxeya ni makacamiho akhweya ereca naari epahu? Ovekela wa “Muluku a nihakalaliho nothene” enahaala wooruhelaani murecele. Piipiliya onnaloca wi Muluku “onnanihakalaliha mwa masoso ahu othene.” (2 Korinto 1:3, 4) Elukuluku Yesu aareiye awuukhuwa, “àkokhora nave ànavekela.” Tiivi yaari yookhumelela? “Àhoneya munkelo a wirimu, wi amulipihe murima.” (Luka 22:41, 43) Mulopwana mukina oororomeleya Nehemiya aahooxeya ntakhara achu oonanara yaawo yaachuna omuhiiha opaka muteko wa Muluku. Nehemiya aavekela avekaka olipa murima. Saweereya soocharela sinnooniherya wi Muluku aamukhaviherya ovootha woova wawe ni okhumelela phaama mmuteko awe. (Nehemiya 6:9-16) Rexinalto, onakhala o Kana onnaloca yaweereya awe: “Vaavaa kinavekelaaka xaxaxa mmakacamiho, kinnakhala oomaaleleya nthowa na oloca makacamiho aka ni yoowo onawerya okikhaviherya ni okihakararya.” Aai, Muluku onnanilipiha vaavaa nnavekelaahu wa yoowo.

Miruku sa Muluku.

Soolakelela ikina nnapakaahu sinanwerya onivolowela ni oosiveliwa ahu. Nnii nipake hai soolakelela saphaama? Piipiliya onii: “Akhanle, mwa nyuwo ohiri ni miruku [xaxaxa mmakacamiho], aveke wa Muluku, wona wi owo onnàvaha atxhu othene ni murima woleva, ahikhalenle nrima.” (Tiyako 1:5) Wakhala wi ninnavekela nivekaka miruku, Muluku onahaala opharihela munepa awe waweela wi onikhaviherye opaka soolakelela saphaama. Chiryene, nnanwerya oveka munepa waweela ntakhara Yesu onnaniroromeliha wi Tiithi ahu a wirimu onahaala waavaha “Munepa Wawela yawo ananveka”!​—Luka 11:13.

Yesu tho aahoona okhala woochuneya oveka nikhaviheryo na Tiithi awe vaavaa aapakeiye soolakelela itokweene. Piipiliya onnanleela wi vaavaa aachuneiye waathanla alopwana 12 wi ekhale arummwa awe “àkhala weiwo ohiyu wothene anvekelaka Muluku.”​—Luka 6:12.

Moolikana ni Yesu, ancipale olelo annalipiheya vaavaa anoonaaya mukhalelo Muluku onaakhuleiye sooveka saya sa opaka soolakelela saphaama. Rexina, onakhala o Filipina, onnaloca makacamiho aakumanneiyeno, ntoko ovakulela emusi awe amanle omuyeleela iyawe, oyeleela muteko ni makacamiho a waaphuwa anamwane. Tiheeni enamukhaviherya opaka soolakelela saphaama? Owo onnathariha: “Kinaroromela nikhaviheryo na Yehova orweela wa nivekelo.” Kwapena, o Kana onnaloca nthowa naamweerinhe oveka nikhaviheryo na Muluku: “Kaayeleela muteko wa oteka waakiliva phaama.” Uupuwelaka soothanla sawe, owo ooloca: “Wiiliwiili kaanavekela wa Yehova kivekaka ohoolela wi kipake yoolakelela yaphaama.” Owo onnaaceererya: “Kinnalipiheya woona wi Yehova aakikhaviherya othanla muteko onakeemererya okhapelela soothowa saka soomunepani ni soomwiilini.” Nyuwaano tho munanwerya ophura ohoolela wa Muluku moorweela wa ovekela vooloca sa miyaha inavolowela onthamwene anyu ni yoowo.

Nooromola mphurelo wa vakhaani nivekelo nnavahaaya. (Wi musuwele mphurelo mukina, moone ekaaxa “Mphurelo wa Nivekelo.”) Nyenya wi mpuhe mphurelo yoola, munaphwanela omusuwela Muluku ni yookhwela awe. Wakhala wi munnachuna, ninnoocenyeryaani wi mwaaveke Anamoona a Yehova wi yookhaviheryeeni omuhuserya Piipiliya.a Ela echu yoopacerya wi mmwaacamele “Awiwa nivekelo.”​—Salumu 65:2, NN.

[Nsu na vathi]

[Yooleeliherya va epaaxina 7]

“Mwàreye Apwiya miritxi sanyu, awo anamukhala ikuru sà.”​—Salumu 55:23

[Eruku va epaaxina 7]

Mphurelo wa Nivekelo

Murecele mmuupuweloni “Muhukhuleyeru ni etxhu. Nto mwa sothene munvekeke Muluku, ni opatxhanyerya yeyo munakhwelanyu, mmuthamalaka yowo. Nave muretxele wa Muluku onapwaha miruku sothene, onamukhapelela mirima sanyu ni mupuwelo anyu mwa Yesu Kristu.”​—Filipi 4:6, 7.

Nihakalaliho na Muluku “Atxitximihiwe Muluku Tithi a Apwiya ahu Yesu Kristu, Tithi a Ikharari ni Muluku a nihakalaliho nothene. Yowo onnanihakalaliha mwa masoso ahu othene.”​—2 Korinto 1:3, 4.

Malakiheryo a opaka soolakelela sa miruku “Akhanle, mwa nyuwo ohiri ni miruku, aveke wa Muluku, wona wi owo onnàvaha atxhu othene ni murima woleva, ahikhalenle nrima.”​—Tiyako 1:5.

Nikhaviheryo na ovootha saweeha “Nvekeleke wi muhuwele n’wehiwani.”​—Luka 22:40.

Oleveleliwa soocheka “Hiha, atxhu aka kithanlenlaka, yarukunusa murima, yakivekela ni yahiya merelo aya ònanara wi yàsyeke okhwela waka, miyano, wirimu, kinamwawiriyana, kinamulevelela sotxheka saya.”​—2 Matharihelo 7:14.

Mukhalelo wa waakhaviherya akina “Ovekela wa mutxhu awokololowa oneriwa ni nthithi, wotepa okhalano ikuru.”​—Tiyako 5:16.

Olipiheya mavekelo yaakhuliwa “Apwiya yàhi [wa Soolomoni]: Miyo kihiwa mavekelo à.”​—1 Mamwene 9:3.