Taani ori Mwene a Omwene wa Muluku?

• Oothanliwa ni Muluku. “Miyo koomwiiyaathi mwene aka . . . Miyo kinoovaha weyo: maloko oothene wi ekhale awaa enesha, nave elapo yoothene wi ekhale yawaa.”—Salumu 2:6, 8.

• Mukelampa wa Mwene Tavite. “Tiwi, nooyareliwa mwaana; noovahiwa mwaana mwamulopwana . . . Olamula wawe okaamwinnuwaru, murece awe homalaru. Onamukilaathela munyukhu wa Tavite, alamulaka wi atikitherye omwene awe.”—Isaiya 9:5, 6 [Isaías 9:6, 7, TNM].

• Ooyariwa o Petelehemu. “Petelehemu . . . veeri vaa onarwa akhumelela mmoha anii akhale mulipa oolamula . . . ikuru sawe inamusuweliwa mwiilapo ikina soorakamela.”—Mikeya 5:1, 3 [Miqueias 5:2, 4, TNM].

• Ookhoociwa ni achu ni wiiphiwa. “Aari oothanyeya ni oonyemuwa nave hinaampwacha. . . . Owo aahommwa wa nthowa na ohiiwelela wahu, nave aanyanyaliwa wa nthowa na soopahula sahu.”—Isaiya 53:3, 5.

• Ooviihiwa mukhwani ni oocicimihiwa. “Hamurwa muhiya okumi aka onihiyeni, hamurwa mweemererya wi oosiveliwa anyu uuce. . . . Nave murecele woohimala ontatani wanyu.”—Salumu 16:10, 11.

Yesu Kristu Mwene Oophwanelela

Mmiyaha sa achu oothene, pahiru muchu mmoha tonaphwanelela mikhalelo seiya sa okhala Mulamuleli oophwanelela; muchu owo ti Yesu Kristu. Mweeparipari, munkeelo aaloca ni Mariya, amannya a Yesu. “Apwiya Muluku, anammuvaha munyukhu woomwene wa nikholo nawe Tavite, . . . nave omwene awe horwa omala tho.”—Luka 1:31-33.

Yesu hantonko okhala mulamuleli veelaponi yavathi. Naamwi hiiha, owo onahaala waalamulela achu orweela wirimu ntoko Mwene a Omwene wa Muluku. Tiheeni enamweeriha okhala Mulamuleli oophwanelela? Muthokororye yeeyo Yesu aapankeiye ari veelaponi ya vathi.

• Yesu aanaapwacha achu. Yesu aahaakhaviherya alopwana ni athiyana, amiravo ni awunnuwelavo, moohipwacha mikhalelo saya naari sookhalano. (Mateu 9:36; Marko 10:16) Vaavaa mulipa a mareca aavenkeiye wi: “Mwaakhwelaka munam’werya okireherya,” Yesu aamoriwa ikharari nave aampenuxa.—Marko 1:40-42.

• Yesu oonihusiha mukhalelo wa omuhakalaliha Muluku. Owo aahiloca: “Nyuwo hamunawerya omulapa Muluku ni olapa muhakhu.” Owo aahilocatho wi nnaphwanela waakhalihaka akina hiihaa ntoko nnachunaahu wi enikhalihe. Mwawaaceererya, owo aahooniherya wi Muluku onnasiveliwa ohiya pahiru wa yeeyo nnapakaahu nyenyatho mukhalelo nnuupuwelaahu ni moonelo ahu. Mwa yeeyo, wi nimuhakalalihe Muluku, nnaphwanela ovareryela murima ahu. (Mateu 5:28; 6:24; 7:12) Yesu aahicicimiherya wi naariki nikhale oohakalala chiryene, nnaphwanela ohuserya yeeyo Muluku onachuneiye wi nipake nave voocharela neereno.—Luka 11:28.

• Yesu aahihusiha yootaphulela ya osivela. Masu ni saweera sa Yesu saakhalano ikuru nave saatannya mirima sa alipa oowiriyana awe. “Mucici wa achu waatikhina ni oohusiha wawe, ntakhara aahusiha yaawo ntoko muchu oowerya olamula.” (Mateu 7:28, 29) Owo aahaahusiha: “Mwaakhweleke amwiicani anyu.” Owo aahiphiyerya ovekela ntakhara akina yaawo yaarino murici wa okhwa wawe: “Atithi, mwakhurumuwele yawo, vawi henasuwela yeyo eneraya.”—Mateu 5:44; Luka 23:34; NN.

Moophaameya Yesu onnaphwanelela okhala Mulamuleli eelapo yoowo ori ookhaviherya ni eepewe. Nyenya ti liini owo onahaaleiye opacerya olamulela?