Muteko wa Anamoona a Yehova Onaliveliwa Hai?

Muteko ahu wa elapo yoothene onaliveliwa ni sooveleela soochuna sa muchu mukhateiye orweela wa yaawo ari Anamoona a Yehova.a Ikaaxa sa sooveleela sinnaphwanyeya mmapuro a mithukumano sahu, nave mikhalelo mikina sa opaka sooveleela sinnaphwanyeya mu esaiti ahu donate.jw.org. Mu esaiti yeela, sinnavahereryiwa mikhalelo soohiyana sa opaka sooveleela, mwawiihiiha, muchu onanwerya othanla opaka sooveleela ntakhara muteko wa elapo yoothene, ntakhara soothowa sa vanipuroni, naari soopiili.

Anamoona a Yehova hanamveka tiisimu, naari oveleela ikhorowa ilakeleliwe wi iveleeliweke. (2 Korinto 9:7) Hiyaano hinnaviriha eparatho wi iheliwemo ikhorowa mmithukumano sahu, naari atokweene ahu hanaveka ikhorowa wi ekhaviherye muteko wa opatiso, elukuluku ya makhwelo, ekasamentu, naari wi epake muteko mukina. Hiyaano hinnakanyaara ikhorowa moorweela wa otumiha yoolya, otumiha ichu, naari opaka echu ekina, naari mano hinnaaveka achu opaka sooveleela. Hinnamwaramwaxa sooleeliherya vooloca sa opaka sooveleela. (Mateu 6:2-4) Mu isaiti sahu ni soolaleeryiwa, hisaamo soolokoha vooloca sa oveka ikhorowa.

Mweeri ti mweeri, miloko sa Anamoona a Yehova annapaka soolokoha vooloca sa ikhorowa aryaayano, variyari va mithukumano saya, seiho inaperekhiwa wa achu oothene. Soolokoha sa ikhorowa sinnaalakhanyeryiwa wiiliwiili wi nroromele wi sooveleela sinnaphariheliwa moophwanelela.—2 Korinto 8:20, 21.

Mikhalelo sa Opaka Sooveleela

• Ikaaxa sa sooveleela: Nyuwaano munanwerya opaka sooveleela sa ikhorowa naari exeeki mu ekaaxa enaphwanyeya mu Ipa sa Omwene, Ipa sa Mithukumano sa Ekulucu ni sa Miceche, naari mapuro makina weiwo inapakiwawo mithukumano sahu.

• Opaka sooveleela mu interneti: Mu ilapo sincipale, nyuwaano munanwerya opharihela makupa ala “Faça um donativo para as Testemunhas de Jeová” wi mpake sooveleela moorweela wa kartau o panku, ovonya ikhorowa moorweela wa ekonta anyu yo panku, naari opharihela mikhalelo mikina.b Anamoona a Yehova akina annathanla ‘wiikuheryaka makupa aya’ mweeri ti mweeri moorweela wa opaka marehereryo a oveleela moohihiyererya epharihelaka mikhalelo seiha.—1 Korinto 16:2.

  

• Soovaha soolakeleliwa: Mikhalelo mikina sa opaka sooveleela sinnachuneya wiirehererya woosiilo nave/naari mwawiiwanana ni malamulo. Marehereryo yaala ananweemereryaani ophura mixokho inavahiwa mu elapo anyu. Ancipale aaphura moorweela wa waavya osuwela phaama vooloca sa sooveleela awo anaweryaaya opaka eri akumi naari inaphariheliwa amanle muchu okhwa. Khwoo, mveke nikhaviheryo epeteli ya Anamoona a Yehova ya elapo anyu vooloca sa sooleeliherya sawaaceererya wakhala wi munnachuna opaka sooveleela seiho inavolowela:

  • ikonta sa opanku

  • okhapeleliwa ni marehereryo a opaka sooveleela woosiilo

  • muhakhu

  • ichu ni ikhorowa ipoleiwale

  • soochuna ni ororomeleya

Wa sooleeliherya sawaaceererya vooloca sa mikhalelo sa opaka sooveleela inaphwanyeya mmukuma anyu, moone makupa, “Faça um donativo para as Testemunhas de Jeová.”