2 TIMOTEO

1 Nejua Pablo, niiapóstol Cristo Jesús pampa toTajtsin ijkon okinek para manikteijli ika akin tlaneltokaj itech Cristo Jesús kiseliskej nemilistli. 2 Nimitsontlajkuilouilia tejua Timoteo, nokoneuj akin melak niktlasojtla.

Niktlajtlanilia toTajtsin akin toTaj niman Cristo Jesús akin toTeko, miyek tlemach mamitsmakakan,* mamitsiknelikan niman mamitsyolseuikan.

3 Niktlasojkamachilia toTajtsin niman nochipa nimitsilnamiki ijkuak miyekpa nikchiua oración ika tonajli niman ika yeuajli. Nejua chikauak niktekichiuilijtika toTajtsin ijkon ken okichijkej akin yeuejkaui onenkej niman chipauak nikpiya notlamachilis. 4 Ijkuak nikilnamiki kenon otichokak, nikneki nimitsitas para niyolpakis. 5 Pampa nikilnamiki ika titlaneltoka ika nochi moyojlo. Moabuela Loida niman monan Eunice kachtopa ijkon otlaneltokakej niman nikmatstika ika tejua noijki ijkon titlaneltoka.

6 Yejua ika, nimitsilnamiktia ika xchiua nochipa matlikuito ken se tlitl, yejon tekitl tlen toTajtsin omitsmakak ijkuak mopan onikintlali nomauan. 7 Pampa toTajtsin xotechmakak se espíritu tlen kichiua matomojtikan. Yejua otechmakak se espíritu tlen kichiua matikpiyakan poder, matitetlasojtlakan niman kuajli matitlanemilikan. 8 Kuakon, maka xpinaui titenojnotsas itech toTeko nion maka xpinaui tikijtos ika tinechixmati nejua akin nitsauktika ipampa. Tejua, xseli tlen noneki tikijyouis ipampa kuajli tlajtoltin niman xtlaneltoka itech ipoder toTajtsin. 9 Yejua otechmakixti niman otechnots para tichipajkej yeskej pero xokichiuj pampa tla itlaj otikchijkej, okichiuj pampa ijkon okinek niman pampa techiknelia maski xtechnamiki. Yejuin itlaj tlen desde yeuejkaui otechititi ipampa Cristo Jesús, 10 pero aman más kuajli yonoitak, pampa yonoteititi Cristo Jesús akin techmakixtia. Yejua yokipopolo mikilistli niman ipampa kuajli tlajtoltin, yotechititi kenon tikpiyaskej nemilistli niman se totlalnakayo tlen xijtlakaui. 11 Nejua onechtlalijkej para manitenojnotsa, para ninochiuas apóstol niman para manitemachti itech yejon kuajli tlajtoltin.

12 Yejua ika noijki nikijyouijtika nochi yejuin, pero xnipinaui. Pampa nikixmati akin itech nitlaneltoka niman kuajli nikmatstika ika yejua kejyeuas nochi tlen yonikmaktili hasta ijkuak ajsis tonajli ijkuak tetlajtlakolmakaskej. 13 Nochipa xkilnamikto yejon kuajli tlajtoltin tlen tepaleuiyaj tlen nejua onimitsijli. Xteititi ika titlaneltoka niman titetlasojtla ijkon ken kichiuaj akin tlaneltokaj itech Cristo Jesús. 14 Ika espíritu santo tlen topan onka, xtlajpiya yejon tesoro tlen yomitsmaktilijkej.

15 Yetikmati ika nochimej on tlakamej akin ualeuaj Asia yonechtlalkauijkej, hasta Figelo niman Hermógenes. 16 Niktlajtlani ika toTeko makimikneli akin chantij ichan Onesíforo, pampa yejua miyekpa onechyolchikauj, xopinauj ijkon kichiuas maski nisasalijtika ika cadenas nikan kampa nitsauktika. 17 Ijkuak nemiya Roma, yejua melak onechtejtemo hasta ijkuak onechnexti. 18 Niktlajtlani ika toTeko Jehová makikneli ipan tonajli ijkuak tetlajtlakolmakas. Tejua kuajli yetikmatstika nochi tlen Onesíforo okichiuj ne Éfeso.

2 Kuakon, nokoneuj, pampa Cristo Jesús mitsititia ika mitsiknelia maski xmitsnamiki xtlajtlanili toTajtsin mamitsmaka poder. 2 Niman tlen notech otijkak, tlen miyekej okijtojkej ika melauak, xkimititi on tlakamej akin yolmelajkej, ijkon, yejuamej uelis kinmachtiskej oksekimej. 3 Xseli nochi tlen noneki tikijyouis, ijkon ken se kuajli isoldado Cristo Jesús. 4 Soldados akin kinekij kiyolpaktiskej akin okintlakeuj, xnokalaktiaj ipan okse tekitl. 5 Hasta kampa nauiltiaj, san tetlani akin kichiua ijkon ken noneki. 6 Akin toka niman chikauak tekiti yejua achto noneki kikuas tlen otlak. 7 Nochipa xtlanemili itech tlen nimitsijlijtika, toTeko mitspaleuis nochi xkasikamati.

8 Xkilnamiki ika Jesucristo okikuitejkej intech akin yomikkej niman ika ualeuaya itech ichanejkauan David. Ijkon kijtouaj kuajli tlajtoltin tlen nejua nikteijlia. 9 Ipampa yejon kuajli tlajtoltin, nitlajyouijtika niman nitsauktika kentla se tlakatl akin yokichiuj itlaj tlen xkuajli. Pero itlajtol toTajtsin xsasalijtika* ika cadenas. 10 Yejua ika, nochi nikxikojtika inpampa akin yokintlapejpenijkej para yejuamej uelis kinmakixtiskej ipampa Cristo Jesús niman nochipa kinueyiteneuaskej. 11 Tejuamej uelis kuajli tikneltokaskej ika tla iuan timikij noijki iuan tinemiskej. 12 Tla nochipa titlaxikouaj, noijki iuan titlayekanaskej, tla tikijtouaj ika xtikixmatij, yejua noijki kijtos ika xtechixmati, 13 tla xtimelajkanemij, yejua ok* melajkanemis pampa xuelis kixnamikis tlen yokijto.

14 Nochipa xkimilnamiktijto yejuin. Noijki, xkimijli ixpan toTajtsin ika maka teuan manokualanikan ipampa tlajtoltin, pampa yejuin xtlaj ika tepaleui niman san kimijtlakoua akin kinkakij. 15 Xmokojtili para toTajtsin mamitsseli pampa chikauak titekiti niman maka itlaj ika xpinaui, noijki xmokojtili kuajli tiktekitiltis* itlajtol toTajtsin. 16 Pero maka xkaki tlen xtlaj ika tepaleui niman kixnamiki toTajtsin pampa yejon kichiuas ika oksekimej más makichiuakan tlen toTajtsin xkiselia. 17 Yejuin tlajtoltin más nomoyauas ijkon ken se kokolistli tlen kipalanaltia totlalnakayo. Yejon tlen okichijkej Himeneo niman Fileto. 18 Yejuin tlakamej yokikajkej tlen melauak, kijtojtinemij ika yoyolijkej akin yomikkej niman kijtlakojtinemij intlaneltok sekimej. 19 Maski ijkon, toTajtsin okichiuj kuajli matokto* tlen iyaxka,* maka manolini niman makipiya yejuin sello: “Jehová kimixmati akin iyaxkauan”* niman “Makikajkauakan tlen xkuajli nochimej akin kitekitiltiaj itoka Jehová ijkuak kichiuaj oración”.

20 Ipan se ueyi kajli xsan onokej* kontin de oro niman de plata noijki onokej de madera niman de sokitl. Sekimej kintekitiltiaj ipan se tonajli tlen ueyi kijtosneki niman oksekimej mojmostla kintekitiltiaj. 21 Kuakon, akin kintlalkauiya kontin tlen mojmostla kintekitiltiaj, kitekitiltiskej ipan se tonajli tlen ueyi kijtosneki. Yes itlaj tlen chipauak, tlen kipaleuis iteko niman kichiuas nochi tlen kuajli. 22 Yejua ika, xtlalkaui tlen kileuiya motlalnakayo pampa titelpochtli niman xchiua tlen kuajli, xtlaneltoka, xtetlasojtla niman xyolsejto. Xchijto yejuin imiuan akin kinotsaj toTeko ika nochi inyojlo.

23 Noijki, maka xmokalakti kampa nokualanijtokej ika tlen xtlaj ika tepaleui. Tikmati ika yejon kichiua más maonia tlauejli. 24 Se itlakeual toTeko xnoneki teuan nouijsokis.* Noneki nochimej kuajli kinnotsas, kuajli temachtis, noteltis ijkuak kichiuiliaj itlaj tlen xkuajli, 25 niman teijyouis ijkuak kinmachtis akin xkuelitaj tlen temachtia. Kanaj toTajtsin kichiuas manopatlakan niman kuajli makixmatikan on tlen melauak. 26 Niman ijkon oksejpa kuajli tlanemiliskej niman makisaskej itech itrampa on Diablo, pampa yejua yokimajsik yoltokej para makichiuakan tlen yejua kineki.

3 Pero noneki tikmatis ika ipan itlamiyan tonaltin melak tetekiyomakas* tlen panos niman hasta xuelis titlaxikos. 2 Pampa on gente san no yejua notlasojtlas, kitlasojtlas tomin, noueyiteneuas maski xtlaj kipiya, noueyimatis, kijtos tlen xkuajli itech toTajtsin niman intech oksekimej, xkintlakamatis itajuan, xtetlasojkamachilis niman xmelajkanemis, 3 xtetlasojtlas, xteajsikamatis, tetlajtolchijchiuilis, xuelis iselti noteltis, melak tlauele yes, xkitlasojtlas tlen kuajli, 4 tekajkayauas, xkinemilis tlen kichiuas, melak noueyimatis, más kinekis noyolpaktis niman xkinekis kiyolpaktis toTajtsin. 5 Nesis kentla kitekichiuiliskiaj toTajtsin, pero ika tlen kichiuaj kiteititiskej ika xmelauak. Maka iminuan xmouika. 6 Itech yejuamej, kisaj xkuajkualtin tlakamej akin san techan kajkalaktinemij niman kinkajkayauaj siuamej akin xchikauak intlaneltok niman kichiuaj tlajtlakojli. Yejon siuamej san kinekij kichiuaskej tlen kileuiyaj 7 niman maski nochipa nomachtijtokej, xkeman kasikamatij tlen melauak.

8 Yejuamej noijki kixnamikij tlen melauak, ijkon ken Janes niman Jambres okixnamikkej Moisés. Yejon tlakamej yoijtlakauj intlamachilis niman toTajtsin xkinselia pampa xtlaneltokaj. 9 Pero, xnochipa ijkon kichijtoskej, pampa nochimej kitaskej ika xkipiyaj intlamachilis, ijkon ken inpan opanok yejon omemej tlakamej. 10 Pero tejua tikmati niman tikchiua ijkon ken nitemachtia, ijkon ken ninemi, ijkon ken tlen nikneki nikchiuas, ken nitlaneltoka, ken niteijyouiya, ken nitetlasojtla niman ken nitlaxikoua. 11 Noijki tikmatstok kenijki melak yonitlajyoui, ken ijkuak ninemiya Antioquía, Iconio niman Listra. Onikxiko nochi yejon, niman toTeko nochipa onechmakixti. 12 Nochimej akin kinekij kitekichiuiliskej toTajtsin iuan Cristo Jesús, noijki kintlajyouiltiskej. 13 Pero akin xkuajkualtin niman akin tekajkayauaj más xkuajli tlen kichijtiaskej, tekajkayauaskej niman kinkajkayauaskej.

14 Pero tejua maka keman xkaua tlen yotiuel niman tlen omitspaleuijkej xneltoka. Ijkon xchiua pampa tikmati akinomej omitsititijkej 15 niman pampa desde ijkuak otinemiko, tikixmati itlajtol toTajtsin tlen ijkuilijtika, tlen uelis mitsmakas tlamachilistli para timakisas tla titlaneltoka itech Cristo Jesús. 16 Nochi tlen ijkuilijtika ipan Tlajkuiloltin ualeua itech toTajtsin niman tepaleuiya. Tepaleuiya para tikinmachtiskej oksekimej, para tikimititiskej tlen xkuajli kichijtokej, para tikinyektlaliskej niman para tikinpaleuiskej mauiyan ipan on kuajli ojtli. 17 Ijkon, akin kitekichiuilia toTajtsin nemis listo niman kipiyas nochi tlen noneki para kichiuas nochi tlen kuajli.

4 Ixpan toTajtsin niman Cristo Jesús, akin kintlajtlakolmakas akin yoltokej niman akin yomikkej ijkuak yejua niman iGobierno uajnesis, nimitsnauatia yejuin: 2 xtlajto itech itlajtol toTajtsin; xmotlasiuiti* ijkon xchiua maski san tlenon mapano; xkimijli oksekimej tlen xkuajli kichiuaj, xkimijli tlenon uelis inpan nochiuas niman xkimijli makichiuakan tlen kuajli. Ijkuak ijkon tikchiuas, xkimijyoui niman kuajli xkinmachti. 3 Pampa ajsis tiempo ijkuak yejuamej xkixikoskej makinmachtikan tlen tepaleui, kinekiskej kichiuaskej tlen kileuiyaj niman kintejtemoskej maestros akin san makimijlikan tlen kinekij kikakiskej. 4 Xok kikakiskej tlen melauak niman san kinkakiskej cuentos tlen xmelajkej. 5 Pero tejua nochipa kuajli xtlanemili, xtlaxiko, xtenojnotsa niman nochipa kuajli xchiua motekiyo.

6 Pampa yenechtoyajtokej kentla ijkuak kitoyauaj vino pampa kiuentlaliaj, niman yeajsis tonajli ijkuak nechmakixtiskej. 7 Yonitlauijsok ken se soldado, yotlan ika ninotlaloua niman nochipa onitlaneltokak. 8 Desde aman nechmakaskej tlen toTeko kintlayokolis akin kipiyaj kuajli inyojlo. ToTeko akin tetlajtlakolmakas yejon nechtlayokolis ijkuak ajsis tonajli, pero xsan nejua, noijki kintlayokoliskej akin sa kichiatokej manoteititi.

9 Xchiua nochi tlen nonekis para nimantsin tinechualitas. 10 Pampa Demas, akin okitlasojtlak tlen aman onka,* onechtlalkaui niman oyaj Tesalónica; Crescente oyaj Galacia, niman Tito, oyaj Dalmacia. 11 Nouan, san nemi Lucas. Xkuajuika Marcos, pampa yejua nechpaleuis maniktekichiuili toTajtsin. 12 Tíquico onikontitlan Éfeso. 13 Ijkuak tiuajlas, xnechuajkuili notlaken tlen nikui ijkuak seua, tlen onikauj ichan Carpo ne Troas. Noijki xnechinuajkuili yejon amamej mimiltikej de cuero.*

14 Alejandro, akin tekiti ika cobre, melak onechtlajyouilti. Jehová kitlajtlakolmakas. 15 Tejua noijki xmotlajpiya itech yejua, pampa melak okixnamik tlen otikteijlijkej.

16 Ijkuak kachtopa onitlajto imixpan akin tlanauatiaj xakaj onechpaleuiko, nochimej onechkajtejkej. Niktlajtlanilia toTajtsin makintlapopolui. 17 Pero toTeko kema nouan onen niman onechyolchikauj. Ijkon okichiuj para kuajli manikteijli itlajtol niman nochi pueblos makikakikan, niman onechmakixtijkej itech ikamak león. 18 ToTeko nechmakixtis itech nochi tlen xkuajli niman nechuikas kampa iGobierno ne ipan cielo. Nochipa san yejua makiueyiteneuakan. Amén.

19 Xnechintlajpalouili Prisca niman Áquila niman akin nemij ichan Onesíforo.

20 Erasto onokauj Corinto niman pampa Trófimo kualouaya onikuajkajteuj ne Mileto. 21 Xchiua nochi tlen nonekis para tiuajlas achto ika peuas seuas.

Eubulo mitsontlajpaloua, niman noijki Pudente, Lino, Claudia niman nochimej tokniuan.

22 ToTeko mamitsteochiua ipampa ken titlanemilia. Niktlajtlani mamechikneli maski xmechnamiki.