Ipan Egipto, ichanejkauan Jacob okimixmatkej kentla israelitas. Sakin ijkuak yomijkaj Jacob niman José, se yenkuik faraón opeuj tekiuajti. Yejua nomojtiaya ika israelitas nochiujtoyaj melak kojtikej xijkon ken egipcios. Ika yejon, Faraón okichiuj ika israelitas matekitikan ken tlakeualtin. Okinchiualti makichijchiuakan miyek xantli niman melak kintekimiktiaya. Maski israelitas melak kintekimiktiayaj, nomiyekiliayaj. Pampa Faraón xokuelitak yejon, otlanauati makinmiktikan nochimej tlakakonetsitsintin. ¿Tiknemilia kenon melak nomojtiayaj israelitas?

Se siuatl israelita itoka katka Jokébed okipix se tlakakonetsintli melak kualtsin. Pampa kinekiya kitlajpiyas, okitlali ijtik se chikijtli niman okiyan ipan atentli Nilo kampa onkatka miyek akatl. Míriam, ikniuj yejuin konetsintli nemiya nisiuj, ijkon kitaskia tlenon panoskia.

Ichpoch faraón onaltiko ipan atentli niman okitak chikijtli. Ijtik okinexti se konetsintli akin chokaya niman okikneli. Míriam okitlajtolti: “¿Tikneki maniktejtemoti se siuatl akin mamitsiskaltili?”. Ijkuak ichpoch faraón okijto ika kema, Míriam okuajuikak inan. Ichpoch faraón okijli Jokébed: “Xkuika yejuin konetsintli, xnechiskaltili, nimitstlaxtlauilis”.

Ijkuak konetl onoskalti, Jokébed okuikili ichpoch faraón, yejua okitokayoti Moisés niman okiskalti kentla ikoneuj. Moisés onoskalti ken ikoneuj faraón niman ueliskia kipiyas nochi tlen kinekiskia. San ika, xkeman okilkauj Jehová. Moisés kimatiya ika xkatka egipcio, katka israelita. Niman okitlapejpeni kitekichiuilis Jehová.

Ijkuak kipiaya 40 xiuitl, Moisés okitlapejpeni kipaleuis ikalpan. Se tonajli okitak se egipcio kiuisokiya se tlakeuajli israelita. Ijkuak okitak yejon, Moisés okimikti egipcio ijkuak chikauak okiuisok. Niman okixalpacho. Ijkuak Faraón okimat, okiyejyeko kimiktis Moisés san ika yejua ocholoj uejka, oyaj Madián. Ompa Jehová okitlajpix.

Moisés ochantik Madián 40 xiuitl. Ompa ononamikti niman okipix ikoneuan. Se tonajli, ijkuak kitlajpiaya iborregos nisiuj tepetl Sinaí, okitak itlaj tlen okimojkatlachialti. Se uitskojtli tlikuitika, san ika, ¡xtlatlaya! Ijkuak Moisés ononisiui, niman ijkon kuajli kitas, okikak se tlajtojli tlen okis ijtik uitskojtli tlen okijto: “¡Moisés! Maka sa xmonisiui. Xmokixtili mokakuan pampa tiijkatok ipan tlajli chipauak”. Jehová akin kinotstoya ika se iluikaktekitketl.

Moisés onomojti kuakon onoxayakatlapacho. Tlajtojli okijto: “Yonikitak kenon tlajyouiyaj israelitas. Nikinmakixtis intech egipcios niman nikinuikas kampa tlakualkan. Tejua tikyekanas nokalpan niman tijkixtis itech Egipto”. ¿Tiknemilia kenon Moisés melak otlamojkaitak?

Moisés okitlajtolti: “¿Tlenon nikijtos tla kalpan nechtlajtoltia akinon onechtitlan?”. ToTajtsin okinankili: “Xkimijli ika Jehová, iTajtsin Abrahán, iTajtsin Isaac, niman iTajtsin Jacob omitstitlan”. Moisés okijli: “¿Niman tla kalpan xnechkaki?”. Jehová okititi ika kipaleuiskia. Okijli makitlajkali itlakouj ipan tlajli. Kuakon, ¡itlakouj onokuep kouatl! Ijkuak Moisés okikitski kouatl ipan ikuitlapil, oksejpa onokuep tlakotl. Jehová okijli: “Ijkuak tikchiuas yejuin milagro, tikteititis ika onimitstitlan”.

Moisés okijto: “Nejua xueli kuajli nitlajtoua”. Jehová okijli: “Nejua nimitsijlis tlenon tikijtos, niman niktitlanis mokniuj Aarón mamitspaleui”. Aman ika kimatstoya ika Jehová kipaleuiskia, onokuep Egipto niman okuikak isiuauj niman ikoneuan.

Egipcios okinchiualtijkej israelitas matekitikan ken tlakeualtin. Jehová okititlan Moisés niman Aarón makijlitij Faraón: “Xkauili nokalpan mauiya, ijkon uelis nechueyichiuas ipan tlaluaktli”. Pampa noueyimatiya Faraón okijli: “Xnechajmana tlen Jehová kijtoua niman xnikinkauilis mauiyan israelitas”. Kuakon Faraón okinchiualti melak chikauak matekitikan. Jehová itlaj kimachtiskia Faraón. ¿Tikmati kenon okichiuj? Okititlan majtlaktli tlajyouilistin ipan Egipto. Jehová okijli Moisés: “Faraón xnechkaki. Ika kualkan yas kampa atentli Nilo. Xuiya niman xkijli ika pampa xokikauili mauiya nokalpan, atl tlen onka ipan nochi atentli Nilo nokuepas yestli”. Moisés okitlakamat niman okitato Faraón. Kuakon Faraón okitak ijkuak Aarón okiuitek Nilo ika itlakouj niman atentli onokuep yestli. Atentli opeuj molonia, atl xok ouel yakaj okonik niman michimej omijkej. San ika, Faraón ok xkinekiya kinkauilis israelitas mauiyan.

Opanok chikome tonajli, Jehová oksejpa okititlan Moisés makijliti Faraón: “Tla xtijkauilia nokalpan mauiya, Egipto temis ika temomej”. Aarón okajkok itlakouj niman temomej nochiuiyan onosemoyaujkej. Kinnextiayaj ijtik kaltin, tlapechtin niman ipan tlen tlakuayaj. ¡Temomej nemiyaj nochiuiyan! Faraón okijli Moisés makitlajtlanili Jehová makitelti tlajyouilistli. Faraón okijto ika kinkauiliskia israelitas mauiyan. Kuakon Jehová okitelti tlajyouilistli, niman egipcios opeuj kisentlaliaj temomej tlen yomijkaj, miyek okinnechikojkej. Melak otlamoloniak. San ika, oksejpa, Faraón xokikauili kalpan mauiya.

Kuakon Jehová okijli Moisés: “Aarón makiuiteki tlajli ika itlakouj niman tlalpoktli nokuepas jejenes noso sayolintsitsintin tlen tekuaj”. Nimantsin nochiuiyan onosemoyaujkej jejenes. Sekimej egipcios okijlikej Faraón: “Yejuin tlajyouilistli ualeua itech inTajtsin”. San ika, Faraón xokinkauili israelitas mauiyan.

Moisés niman Aarón okijlitoj Faraón tlen toTajtsin okimijli: “Tla xtijkauilia mauiya nokalpan, nimitstitlanilis ipan mopaís uejueyimej sayolimej”. Melak miyekej sayolimej okalajkej ijtik inkaluan egipcios: akin kipiayaj tomin niman akin xkipiayaj. Nochiuiyan nemiyaj sayolimej, san ika, ipan Gosén kampa nemiyaj israelitas, xnemiyaj. Yejuin ika naui tlajyouilistli niman okseki tlen sakin opanokej san egipcios okintlajyouiltijkej. Faraón okitlajtlanili Moisés: “Xtlajtlanili Jehová makinkixti yejuin sayolimej. Kuakon mokalpan uelis yas”. San ika, ijkuak Jehová okinkixti, Faraón xokichiuj ken okijtoka. ¿Kemantika nopatlaskia Faraón?

Jehová okijto: “Tla Faraón xkikauilia mauiya nokalpan, inyolkauan egipcios kualoskej niman mikiskej”. Uajmostla yolkamej opeuj mikij. San ika, inyolkauan israelitas xomijkej. Maski ijkon Faraón onoueyimat, xokinek komintitlanis.

Kuakon Jehová okinauati Moisés mauiya kampa Faraón niman makixini tlikonextli ipan ajakatl. Tlikonextli onokuep tlalpoktli ipan ajakatl niman oxiniko inpan egipcios. Tlalpoktli okichiuj ika egipcios niman inyolkauan makipiyakan tsotsomej tlen temalkisaj. Maski ijkon, Faraón xokinkauili israelitas mauiyan.

Jehová oksejpa okititlan Moisés makijliti Faraón: “¿Ok xtijkauilia nokalpan makisa? Mostla nikchiuas matesiui”. Uajmostla, Jehová okititlan tesiujtli, tlitl niman okichiuj matlakomoni. Xkeman ijkon kiyauiya Egipto. Okijtlako nochi kojtin niman tlen okitokakej, san ika, xtlaj opanok Gosén. Faraón okijto: “¡Xtlajtlanili Jehová makitelti! Kuakon uelis nenyaskej”. San ika, ijkuak onotelti kiyaujtli niman tesiujtli, Faraón xokichiuj tlen okijto.

Kuakon Moisés okijto: “Aman chapolimej kikuaskej nochi tlen okikauj tesiujtli”. Melak miyekej chapolimej okikuajkej nochi tlen onokauj itech tlen okitokakej niman kojtin. Faraón okijli: “Xtlajtlanili Jehová makinkixti chapolimej”. San ika, maski Jehová okinkixti chapolimej, Faraón ok onoueyimat.

Jehová okijli Moisés: “Xkajkokui moma iluikak”. Nimantsin otlayouatiak. Yeyi tonajli, egipcios xtlaj ouel okitakej. San israelitas kipiayaj tlauijli kampa nemiyaj.

Faraón okijli Moisés: “Tejua niman mokalpan uelis nenyaskej. San nemoyolkauan nenkinkaujteuaskej”. Moisés okinankili: “Kipiya ika tikinuikaskej toyolkauan pampa tikinuentlaliliskej toTajtsin”. Faraón okualankatsajtsik: “¡Xkisa! Tla oksejpa nimitsita, nimitsmiktis”.

Moisés okijli Faraón ika xok kiyejyekoskia oksejpa kitas, san ika, ijkuak iyaskia okijli: “Ipan tlajkoyeuajli, nochimej kachtopa tekoneuan itech Egipto, ken ikoneuj faraón hasta inkoneuan tlakeualtin, mikiskej”.

Jehová okimijli israelitas: “Xyektlalikan tlakuajli tlen san ipan yejon tonajli nenkichijchiuaskej. Xmiktikan se borrego noso se chivo tlen makipiya se xiuitl niman iyesyo xtlalilikan iyeualiyan nemopuerta. Xtliuatsakan nakatl, xkuakan ika pan tlen xonakok. Xkakitokan nemotlaken, nemokakuan niman xtlamachiatokan. Yejuin yeuajli nimechmakixtis”. ¿Tiknemilia kenon melak opajkej israelitas?

Ipan tlajkoyeuajli, iiluikaktekitkauj Jehová oyaj ipan nochi kaltin tlen onkatkaj Egipto. Ipan puerta kampa xkipiaya yestli akin kachtopa tekoneuj omik. San ika, iluikaktekitketl okinpanaui kaltin tlen kipiayaj yestli. Ipan nochi ifamilias egipcios, akin miyek tomin kipiayaj niman akin xkipiayaj, omik se inkoneuj. San ika, xomik ikoneuj nion se israelita.

Noijki ikoneuj faraón omik. Faraón xok okixiko. Nimantsin okimijli Moisés iuan Aarón: “¡Xkisakan! ¡Xuiyan niman xueyichiuakan nemoTajtsin! ¡Xkinuikakan nemoyolkauan niman xuiyan!”.

Yejon yeuajli ometstonak, israelitas ouajkiskej Egipto, xexeliujtoyaj ken familias niman uejueyimej familias. Nemiyaj 600,000 israelitas tlakamej, noijki miyekej siuamej niman kokonej. Imiuan okiskej miyekej akin xkatkaj israelitas, yejuamej noijki kiueyichiuaskiaj Jehová. ¡Aman kema, israelitas omakiskej!

Nochi xiujtin, sa noijki tlakuajli kichijchiuaskiaj ken okichijchiujkaj ijkuak omakiskej niman ijkon kilnamikiskiaj kenon Jehová okinmakixti. Okitokayotijkej Pascua.

Ijkuak Faraón okikak ika israelitas yokiskaj itech Egipto, onoyolkuep ika okinkauili mauiyan. Kuakon okinnauati isoldados: “¡Xkinyektlalikan nochi carros tlen ika titlaixnamikij, niman matikimasitij! ¡Xtikinkauiliskiaj mauiyan!”. Yejua iuan isoldados opeuj kintlaueltokaj israelitas.

Jehová kiyekantoya ikalpan ika se moxtli ika tonajli niman tlitl ika yeuajli. Yejua okinuikak itech mar Rojo niman okimijli ompa manokajkaltikan.

Sakin israelitas okitakej ika Faraón niman isoldados kintlaueltokayaj. Xueliskiaj choloskiaj. Imixpan kipiayaj mar Rojo niman inkuitlapan uajlayaj egipcios. Kuakon opeuj kitsajtsiliaj Moisés: “¡Timikiskej! Xtitechkixtiskia itech Egipto”. San ika, Moisés okimijli: “Maka xmomojtikan. Xtlamachiakan niman xkitakan kenon Jehová techmakixtis”. ¿Xmelak ika Moisés chikauak tlaneltokaya itech Jehová?

Jehová okimijli israelitas makikuiteuakan kampa onokajkaltijkaj. Yejon yeuajli, Jehová okejkuani moxtli niman aman egipcios xeliujtoyaj itech israelitas. Kampa egipcios onkatka tlayoualyotl. San ika, israelitas kipiayaj tlauijli.

Jehová okijli Moisés makajkokui ima ixpan mar. Kuakon Jehová okichiuj nochi yeuajli chikauak maejeka. Mar onotlajkoxelo niman itlajkotian onochiuj kentla se ojtli. Nochimej israelitas onejnenkej ipan tlajli tlen uajki hasta ijkuak okisatoj, itsajlan itepanuan atl tlen yonokuiteujkaj.

Isoldados faraón okintlaueltokakej israelitas ipan tlajli tlen uajki. Kuakon Jehová okichiuj ika egipcios maka makimatikan tlen kichiuaskej. Okichiuj ika inruedas icarros makisakan. Soldados otsajtsikej: “¡Matiuiyan! Jehová tlaixnamiktok inpampa”.

Jehová okijli Moisés: “Xkajkokui moma ixpan mar”. Nimantsin, atl tlen onochiujkaj ken tepantin inpan ouajtoyauj egipcios. Faraón niman isoldados omijkej. Nion se xomakis.

Ijkuak yokipanauijkaj mar, nochimej okiueyichiujkej toTajtsin ika yejuin tlakuikajli: “Xkuikatilikan Jehová, pampa melak onoueyili. Caballo niman akin ipan yauj okintlajkal ijtik mar”. Ijkuak kalpan nokuikatiaya, siuamej nijtotiayaj niman kitsotsonayaj panderetas. Nochimej melak pakiyaj pampa aman yemelak omakiskej.

Yopanoka kanaj ome metstli ika israelitas yokiskaj itech Egipto, oajsikej ipan tepetl Sinaí niman ompa onokajkaltijkej. Jehová okijli Moisés matlejko ipan tepetl, niman okijli: “Nejua onikinmakixti israelitas. Tla nechtlakamatij niman kimejyeuaj notlanauatiluan, nochiuaskej nokalpan tlen melak tlasojti”. Moisés ouajtemok niman okimijli israelitas tlen Jehová okijlika. ¿Kenon otlanankilijkej? Yejuamej okijtokej: “Tikchiuaskej nochi tlen Jehová yotechijli”.

Moisés oksejpa otlejkok ipan tepetl. Ompa Jehová okijli: “Ipan yeyi tonajli, nikinnotsas. Xkimijli maka kiyejyekoskej tlejkoskej ipan tepetl Sinaí”. Moisés ouajtemok niman okimijli israelitas manoyektlalikan niman ijkon kikakiskiaj Jehová.

Yeyi tonajli sakin, israelitas okitakej ika ipan tepetl tlapetlaniya niman tlamoxtemiya. Noijki okikakej ken chikauak otlakomon niman okakistik se kuakoujtli. Kuakon, Jehová ouajtemok ipan tepetl itlajkotian tlitl. Israelitas melak onomojtijkej. Nochi tepetl tlapachiujtoya ika poktli niman melak chikauak otlalolin. Ken kakistiya kuakoujtli melak tlejkotiaya. Kuakon Jehová okimijli: “Nejua niJehová. Xkipiya nenkiueyichiuaskej okseki tajtsitsintin”.

Moisés otlejkok ipan tepetl niman Jehová okimakak itlanauatiluan tlen kimakaskia ikalpan itech kenon nonekiya kiueyichiuaskej niman noyekanaskej. Moisés okimijkuilo yejuin tlanauatiltin niman okinpouili israelitas. Yejuamej onotlajtolkaujkej iuan toTajtsin, okijtokej: “Tikchiuaskej nochi tlen Jehová yotechijli”. San ika ¿kema kichiuaskiaj?

Jehová okijli Moisés: “Xtlejko ipan tepetl kampa ninemi. Nikijkuilos notlanauatiluan ipan temej patlaujkej niman nimitsinmakas”. Moisés otlejkok niman ompa onokauj 40 tonajli niman 40 yeuajli. Ijkuak ompa nemiya, Jehová okijkuilo Majtlaktli Tlanauatiltin ipan ome temej patlaujkej niman okinmakak Moisés.

Israelitas opeuj kinemiliaj ika Moisés yokinkaujteujka. Yejuamej okijlikej Aarón: “Tiknekij yakaj akin matechyekana. ¡Xtexchijchiuili se tatajtsin!”. Aarón okimijli: “Xnechmakakan oro tlen nenkipiyaj”. Yejua okipat oro niman okichijchiuj se uakaxkonetl. Kalpan okijto: “¡Yejuin uakaxkonetl yejua totajtsin akin otechkixti itech Egipto!”. Opeuj iluichiuaj niman kiueyichiuaj uakaxkonetl tlachijchiujtli ika oro. Tlen okichiujkej xkuajli katka, ¿tleka? Pampa israelitas iuan onotlajtolkaujkaj Jehová ika san yejua kiueyichiuaskiaj, san ika, aman xkichiujtoyaj.

Jehová okitak tlen panotoya niman okijli Moisés: “Xontemo kampa nemi kalpan. Israelitas xnechtlakamatstokej niman kiueyichiujtokej se tatajtsin xmelauak”. Moisés ouajtemok itech tepetl, niman kinuajkuiya yejon ome temej patlaujkej.

Ijkuak nonisiuiaya kampa nemiyaj, Moisés okikak ika nokuikatijtoyaj. Ijkuak oajsik, okitak nitotijtoyaj niman notlakuanketstoyaj ixpan uakaxkonetl. Moisés melak okualan, okintlajkal temej patlaujkej tlen kitkiya niman otlajtlapankej. Nimantsin okixoxotoni uakaxkonetl. Kuakon okitlajtolti Aarón: “¿Kenon omitstlaneltokiltijkej niman ijkon xchiua yejuin tlen melak xkuajli?”. Aarón okijto: “Maka xkualani, kuajli tikimixmatstok. Kinekiyaj se intajtsin, ika yejon, onikontlajkal oro ipan tlitl, ¡niman okis yejuin uakaxkonetl!”. Aarón xkipiaya ika kichiuas yejon. Moisés oksejpa otlejkok ipan tepetl niman okitlatlaujti Jehová makintlapopolui israelitas.

Jehová okintlapopolui akin kinektoyaj kitlakamatiskej. ¿Ueli tikita tleka melak nonekiya ika israelitas makitlakamatikan itlayekanalis Moisés?

Ijkuak Moisés nemiya ipan tepetl Sinaí, Jehová okijli makichijchiua tabernáculo. Yejuin kaltlakentli melak tlasojti katka. Ompa israelitas ueliskiaj kiueyichiuaskiaj toTajtsin. Noijki, ueliskiaj kitkiskej tabernáculo maski san kanon yaskiaj.

Jehová okijli: “Xkijli kalpan makitemaka tlen uelis ika tlapaleuis manochijchiua tabernáculo”. Israelitas okitemakakej oro, plata, cobre, temej tlen kualtsitsintin niman okseki tlen patioj. Noijki okitemakakej ichkatl, lino, inkuetlaxio yolkamej niman miyek okseki tlemach. Yejuamej melak okinejkej kitemakaskej, ika yejon Moisés okimijli: “¡Ionka nochi kech noneki! Maka sa itlaj xkuajkuikan”.

Miyekej tlakamej niman siuamej akin melak ueltoyaj otlapaleuijkej manochijchiua tabernáculo. Jehová okinmakak tlamachilistli ika kuajli makichiuakan itekiyo. Sekimej kichijchiuayaj ikpatl, tlakentin ika ikpatl noso kitlaliliayaj tlakentin ikpatl. Oksekimej kinyektlaliayaj temej kualtsitsintin, tekitiyaj ika oro noijki ika madera.

Kalpan okichijchiuj tabernáculo ijkon ken Jehová okimijli. Ijtik tabernáculo onkatkaj Santo niman Santísimo, yejuin okixelojkej ika se cortina melak kualtsin tlen okichijchiujkej. Ijtik Santísimo onkatka caja tlen tetlalnamiktia tlajtolkaualistli, tlachijchiujtli ika oro niman kojtli itoka acacia. Ijtik Santo onkatka se candelabro tlachijchiujtli ika oro, se mesa niman se tlaixpan kampa kipojkixtiayaj tlen ajuiyak. Ikiyauatenko, kipiaya se fuente tlachijchiujtli ika cobre niman se ueyi tlaixpan. Caja tlen tetlalnamiktia tlajtolkaualistli kintlalnamiktiaya israelitas ika yonokaujkaj ika kitlakamatiskej Jehová.

Jehová okitlapejpeni Aarón niman ikoneuan matekitikan ken teopixkej ipan tabernáculo. Nonekiya kitlajpiyaskiaj tabernáculo niman ompa kiuentlaliliskiaj Jehová. San ueyi teopixketl, Aarón, ueliya kalakiya ijtik Santísimo. Sejpa ipan se xiuitl kalakiya niman tlauentlaliaya ipampa itlajtlakoluan, intlajtlakoluan ichanejkauan niman intlajtlakoluan israelitas.

Israelitas otlan kichijchiuaj tabernáculo ijkuak yopanoka se xiuitl ika yokiskaj Egipto. Aman kipiayaj kanon kiueyichiuaskej Jehová.

Jehová okitlali se moxtli ikuatipan tabernáculo, ijkon okiteititi ika okiyolpakti. Tla moxtli ompa nokauaya, israelitas nokauayaj kampa nemiyaj. San ika, tla moxtli tlejkouaya kimatiyaj ika nonekiya nejkuaniskej, kuakon kipepetoniayaj tabernáculo niman kitokayaj moxtli.

Israelitas okiskej itech tepetl Sinaí. Okipanauijkej tlaluaktli itoka Parán hasta oajsikej Cadés. Ompa Jehová okijli Moisés: “Xkintitlani 12 tlakamej, se itech sesentetl uejueyimej familias, maichtakatlachiatij Canaán, tlajli tlen nikinmakas israelitas”. Kuakon Moisés okintlapejpeni 12 tlakamej niman okimijli: “Xuiyan Canaán, xkitatij itlal tla tlatlakitia. Xkitakan tla tlaltikpakchanejkej kojtikej noso ka, tla san nokajkaltiaj noso tla chantij ipan ueyikalpamej”. Yejuamej oyajkej Canaán, Josué iuan Caleb teuan tlapoualtin katkaj.

Ijkuak yopanoka 40 tonajli, ichtakatlachixkej ouajnokuepkej. Kuajkuiyaj higos, granadas niman uvas. Yejuamej okijtokej: “Tlajli melak tlatlakitia, san ika, tlaltikpakchanejkej melak kojtikej niman iueyikalpanuan kipiyaj tepantin uejkapamej”. Kuakon Caleb okijto: “¡Tejuamej uelis tikintlaniskej! Nimantsin matiuiyan”. ¿Tikmati tleka ijkon okijto Caleb? Pampa yejua niman Josué tlaneltokayaj itech Jehová. San ika, oksekimej majtlaktli ichtakatlachixkej okijtokej: “¡Ka! ¡Tlaltikpakchanejkej melak uejkapamej! Innakastlan tinesiyaj kentla chapolimej”.

Israelitas onosiaujkaujkej. Opeuj kualanij niman onoijlikej: “Matiktejtemokan okse akin matechyekana niman matokuepakan Egipto. ¿Tleka san tonmikiskej Canaán?”. Josué iuan Caleb okijtokej: “Xtlakamatikan Jehová niman maka xmomojtikan. Jehová techtlajpiyas”. San ika, israelitas xokinkakisnejkej. Niman okiyejyekojkej kinmiktiskej Josué iuan Caleb.

¿Tlenon okichiuj Jehová? Yejua okijli Moisés: “Yonikchiuj miyek inpampa israelitas maski ijkon, ok xnechtlakamatij. Yejua ika, nikinkauas 40 xiuitl ipan tlaluaktli hasta mamikikan. San inkoneuan niman Josué iuan Caleb nemiskej ipan tlajli tlen onikimijli nikinmakas”.

Sakin, ijkuak israelitas ok nemiyaj ipan tlaluaktli, Coré, Datán, Abiram niman 250 tlakamej okixnamijkej Moisés. Yejuamej okijlikej: “¡Melak yonentechsiauitijkej! ¿Tleka kipiya ika titechyekanas niman Aarón yes ueyi teopixketl? Jehová xsan nemi mouan iuan Aarón, noijki touan nemi”. Jehová xokuelitak yejon. ¡Okitak kentla yejua kixnamiktoskiaj!

Moisés okimijli Coré niman akin kitokayaj: “Xuajlakan mostla ipan tabernáculo niman xkuajkuikan tlen ika nentlapojkixtiaj niman xtemiltikan ika tlen ajuiyak. Jehová techititis akinon yokitlapejpeni”.

Uajmostla, Coré niman 250 tlakamej onosentlalijkej iuan Moisés ipan tabernáculo. Opeuj kitlatiaj tlen ajuiyak ken teopixkej yeskiaj. Jehová okimijli Moisés iuan Aarón: “Xmoxelokan itech Coré niman itech akin kitokaj”.

Coré oyaj ipan tabernáculo kampa nemiya Moisés, san ika, Datán, Abiram niman inchanejkauan xokinejkej yaskej. Jehová okimijli israelitas manoxelokan itech inkajkaluan Coré, Datán niman Abiram. Israelitas nimantsin onoxelojkej. Datán, Abiram niman inchanejkauan onotelketskej ikalakiyan inkajkaluan. Kuakon, ¡sa nimantsin tlajli otlapouj niman okintolo! Niman kampa tabernáculo, tlitl ouajtemok niman okintlati Coré niman 250 tlakamej.

Kuakon Jehová okijli Moisés: “Xkajsi intlakouj sesentemej akin tlayekanaj ipan uejueyimej familias, niman inpan xkijkuilo intoka. San ika, ipan itlakouj familia Leví xkijkuilo itoka Aarón. Xkintlali ijtik tabernáculo, niman itlakouj akin nejua niktlapejpenis xochiyouas”.

Uajmostla, Moisés okinkixti intlakouj akin tlayekanayaj niman okimititi. Itlakouj Aarón oxochiyouak niman kipiaya almendras. Ijkon Jehová okiteititi ika yokitlapejpenijka Aarón ken ueyi teopixketl.