Tlatitlankej okitlakamatkej itlanauatil Jesús ika tenojnotsaskiaj kuajli tlajtoltin ipan nochi tlaltikpaktli. Ipan xiuitl 47, tokniuan chanejkej Antioquía okintitlankej Pablo iuan Bernabé matenojnotsatij ipan okseki kalpamej. Yejuamej otenojnotskej ika miyek chikaualistli. Oyajkej ipan miyek kalpamej tlen nokauaj Asia Menor ken Derbe, Listra niman Iconio.

Pablo iuan Bernabé nochimej kinnojnotsayaj: akin kipiayaj miyek tomin niman akin xtlaj kipiayaj, akin telpokamej niman akin iuejueyimej. Miyekej okiselijkej tlen melauak itech Cristo. Ijkuak Pablo iuan Bernabé kinojnotstoyaj Sergio Paulo, tekiuaj itech Chipre, se akin kichiuaya naualyotl okiyejyeko kinteltis. Pablo okijli tlakatl: “Jehová mitsixnamiki”. Nimantsin, yejua okipolo itlachialis. Ijkuak Sergio Paulo okitak yejuin, opeuj tlaneltoka.

Pablo iuan Bernabé nochiuiyan tenojnotsayaj: techajchan, kampa tlanemakalo, ipan ojtli niman ipan sinagogas. Ijkuak nemiyaj Listra, okipajtikej se tlakatl akin xueliya nejnemiya. Akin okitakej yejon milagro, okinemilijkej ika yejuamej katkaj tajtsitsintin niman okiyejyekojkej kinueyichiuaskej. San ika, Pablo iuan Bernabé okinteltijkej niman okimijlikej: “¡San xkueyichiuakan toTajtsin! Tejuamej san titlakamej”. Kuakon sekimej judíos okichiujkej ika akin ompa chantij makitlauelitakan Pablo. Kuakon okitemojmotlakej, okitechiuilankej niman okikixtijkej itech ueyikalpan pampa kinemiliayaj ika yomijka. San ika ¡Pablo yoltoya! Nimantsin tokniuan oyajkej okipaleuitoj niman oksejpa okuikakej kampa ueyikalpan. Sakin Pablo onokuep Antioquía.

Ipan xiuitl 49, Pablo oksekan oyaj otenojnotsato. Sakin ijkuak onokuep okimitato tokniuan itech Asia Menor, oyaj otenojnotsato kuajli tlajtoltin hasta Europa. Yejua oyaj Atenas, Éfeso, Filipos, Tesalónica niman oksekan. Silas, Lucas niman se telpochtli itoka katka Timoteo iuan oyajkej. San sekan otekitkej niman ijkon otlapaleuijkej manochijchiuakan tlanechikoltin niman machikaujtokan ipan intlaneltokil. Pablo onokauj kalpan Corinto se xiuitl uan tlajko, ijkon okinyolchikauj tokniuan. Yejua tenojnotsaya, temachtiaya niman kintlajkuilouiliaya tlanechikoltin. Noijki tekitiya: kinchijchiuaya tlen ika nokajkaltiayaj. Sakin, Pablo oksejpa onokuep Antioquía.

Sakin ipan xiuitl 52, Pablo ika yexpa oyaj oksekan otenojnotsato. Yejua opeuj Asia Menor niman oyaj tlakpakopa, oajsik hasta Filipos niman sakin otemok Corinto. Pablo ouejkauj seki xiuitl ipan Éfeso ompa temachtiaya, tepajtiaya niman kipaleuiaya tlanechikojli. Yejua noijki kinmachtiaya miyekej ipan se kaltlamachtijli. Melak miyekej okikakej niman okipatlakej tlen kichiuayaj. Ijkuak Pablo miyekan yotenojnotska kuajli tlajtoltin, oksejpa onokuep Jerusalén.

Ipan ueyikalpan Filipos nemiya se ichpochtli siuatlakeuajli akin kipiaya se xkuajli espíritu. Yejuin xkuajli espíritu kichiuaya ika ichpochtli makimati tlen panoskia ika tlayekapan niman itekouan kitlaniyaj melak miyek tomin itechkopa. Ijkuak Pablo niman Silas oajsikej Filipos, ichpochtli kintokatinemiya miyek tonajli. Xkuajli espíritu kichiuaya matsajtsi: “¡Yejuin tlakamej itekipanojkauan toTajtsin Akin ueyixtika!”. Sakin, Pablo okijli xkuajli espíritu: “Ika itokayo Jesús, nimitsnauatia xkisa itech ichpochtli”. Niman xkuajli espíritu okis.

Ijkuak itekouan ichpochtli okitakej ika xok ueliskiaj kitlaniskej tomin itechkopa, melak okualankej. Yejuamej okintechiuilantiajkej Pablo niman Silas kampa tekiuajkej niman okimijlikej: “Yejuin tlakamej xkitlakamatstokej tlanauatijli niman kajmantinemij tokalpan”. Tekiuajkej otlanauatijkej makinuijuitekikan Pablo niman Silas niman makintsakuakan. Tlajpixketl itech cárcel okinuikak tlaxomolko, kampa melak tlayouatikak. Noijki okintlalili imauan niman imikxiuan ipan cepo.

Pablo niman Silas opeujkej kikuikatlaliliaj Jehová niman akin ompa tsauktoyaj okinkakej. Ijkuak tlajkoyeuajli, melak chikauak otlalolin hasta okiolini cárcel. Puertas otlapoujkej niman cepos iuan cadenas tlen nochimej ika masalijtoyaj opetonkej. Tlajpixketl okalak kampa tlaxomolko niman okitak ika puertas tlapojtoyaj. Pampa kinemiliaya ika nochimej akin tsauktoyaj yocholojkaj, kuakon okontilan se espada niman ika nomiktiskia.

Kuakon, Pablo chikauak otsajtsik: “¡Maka itlaj xmochiuili! Tinochimej nikan tinemij”. Tlajpixketl onotlalo kampa Pablo niman Silas niman imixpan onotlakuankets. Yejua okintlajtolti: “¿Tlenon noneki nikchiuas niman ijkon nimakisas?”. Yejuamej okijlikej: “Tejua niman mochanejkauan noneki nenkineltokaskej Jesús”. Kuakon, Pablo niman Silas opeujkej kinmachtiaj itech Jehová, niman tlajpixketl iuan ichanejkauan onoapolaktijkej.

Timoteo katka se telpochtli akin nemiya ipan tlanechikojli Listra. Itaj griego katka niman inan judía. Eunice, inan Timoteo, niman Loida, iabuela, opeujkej kimachtiaj itech Jehová ijkuak ok konetl katka.

Ijkuak Pablo oyaj Listra ika okpa otenojnotsato, okitak ika Timoteo yemelak kintlasojtlaya tokniuan niman nochipa kinekiya kinpaleuis. Pablo okijli Timoteo iuan mauiya matenojnotsati. Ika yolik Pablo okipaleui Timoteo kuajli matemachti niman matenojnotsa kuajli tlajtoltin.

Espíritu santo kinyekanaya Pablo niman Timoteo nochiuiyan kampa yayaj. Se yeuajli, ipan se tlatlachalistli, se tlakatl okijli Pablo mauiya Macedonia makinpaleuiti. Kuakon Pablo, Timoteo, Silas niman Lucas ompa otenojnotsatoj niman okinpeualtijkej tlanechikoltin.

Ipan ueyikalpan Tesalónica tlen onka Macedonia, miyekej tlakamej niman siuamej otlaneltokakej itech Cristo. San ika, sekimej judíos kinexikolitayaj Pablo niman akin iuan nouikayaj. Yejuamej okinsentlalijkej akin xkuakualtin niman okintechiuilantiajkej ixpan tekiuajkej, akin yotlaneltokakaj. Judíos tsajtsiyaj: “¡Yejuin tlakamej kixnamikij Roma!”. Pablo niman Timoteo ueliskiaj kinmiktiskiaj, yejua ika oyajkej Berea ika tlayoua.

Akin chantiyaj Berea melak kinekiyaj kikakiskej kuajli tlajtoltin, niman miyekej griegos niman judíos otlaneltokakej. San ika, ijkuak seki judíos akin oualeujkej Tesalónica okipeualtitoj tlauejli, Pablo oyaj Atenas. Timoteo niman Silas onokaujkej Berea, ijkon kinyolchikauaskiaj tokniuan. Pablo oksejpa okititlan Timoteo mauiya Tesalónica makinyolchikauati tokniuan pampa kintlaueltokayaj. Sakin, Pablo okititlan Timoteo makinyolchikauati okseki tlanechikoltin.

Pablo okijli Timoteo: “Nochimej akin kinekij kitekichiuiliskej Jehová, kintlaueltokaskej”. Maski Timoteo okitlaueltokakej niman okitsajkej ipampa itlaneltokil, yejua melak pakiya pampa ijkon kiteititiaya ika yolmelaujkanemiya itech Jehová.

Pablo okimijli filipenses: “Nimechtitlanilijtika Timoteo. Yejua mechmachtis kenon noneki nemis se itekipanojkauj Jehová niman mechmachtis ipan nemotenojnotsalis”. Pablo kimatstoya ika ueliskia kineltokas Timoteo. Miyek xiuitl san sekan okitekichiuilijkej toTajtsin niman nochipa kuajli onouikakej.

Pablo oajsik Jerusalén, ompa otlan ika yexpa tenojnotstinemiya. Ompa okajsikej niman okitsajkej. Ika tlayoua okipix se tlatlachalistli, Jesús okijli: “Tejua kipiya ika tias Roma niman ompa titenojnotsas”. Kuakon Pablo okikixtijkej itech Jerusalén niman okuikakej Cesarea, kampa okitsajkej ome xiuitl. Ijkuak Pablo nemiya ixpan tekiuaj Festo, okijto: “Nikneki manechyolkuiti César, ipan Roma”. Festo okijli: “Tiktlajtlani tias ixpan César, kuakon itech César tias”. Kuakon okitlejkoltijkej Pablo ipan se barco tlen kuikaskia Roma. Iuan oyajkej omemej tokniuan, Lucas niman Aristarco.

Ijkuak yayaj ipan mar, opeuj chikauak ajakakiyaui niman ouejkauj miyek tonajli. Nochimej okinemilijkej ika mikiskiaj. San ika, Pablo okijto: “Tlakamej, se iluikaktekitketl onechijli ipan notemik: ‘Maka xmomojti, Pablo. Tejua tajsis Roma, niman nochimej akin mouan yauej ipan barco makisaskej’. ¡Maka xmomojtikan! Xtimikiskej”.

Oajakakiyauj 14 tonajli. Sakin okontakej atlajkotian itoka Malta. Barco oxaltlalak niman otepojpostek. San ika, nochimej 276 akin ompa yayaj oajsikej ipan atlajkotian. Sekimej oapanokej, oksekimej onopaleuijkej ika itlajkotsitsinuan barco niman ijkon xoamimijkej. Akin chantiyaj Malta okinpaleuijkej niman otlatlatijkej ijkon yejuamej onototonijkej.

Opanok yeyi metstli, niman soldados okuikakej Pablo ipan okse barco hasta Roma. Ijkuak oajsik, tokniuan okinamikitoj. Ijkuak Pablo okimitak, okitlasojkamachili Jehová niman melak onoyolchikauj. Maski Pablo tsauktoya, okikauilijkej machanti ipan se kajli tlen kitlaxtlauaya. Ompa onen ome xiuitl. Miyekej konitayaj niman yejua kinnojnotsaya itech iTekiuajyo toTajtsin niman kinmachtiaya itech Jesús. Pablo noijki kintlajkuilouiliaya tlanechikoltin tlen onkatkaj Asia Menor niman Judea. Kuajli nesi ika Jehová okitekitilti Pablo makiteijli nochiuiyan kuajli tlajtoltin.