Nisiuj itech Babel onkatka se ueyikalpan itoka katka Ur, ompa xkiueyichiuayaj Jehová, kinueyichiuayaj miyekej tajtsitsintin. San ika, nemiya se tlakatl ipan Ur akin san Jehová kiueyichiuaya. Itoka katka Abrahán.

Jehová okijli Abrahán: “Xkaua mochan iuan mochanejkauan niman xuiya kampa nimitsititis”. Noijki okijli: “Timochiuas se ueyikalpan, niman nikinmakas tlen kuajli miyekej tlaltikpakchanejkej ipan nochi  tlaltikpaktli mopampa”.

Abrahán xkimatiya kanon kititlantoya Jehová, san ika, tlaneltokaya itech. Abrahán; isiuauj, Sara; Taré akin itaj niman isobrino Lot okitlakamatkej Jehová ijkuak okiyektlalijkej tlen kipiayaj niman opeuj yauej uejka.

Abrahán kipiaya 75 xiuitl ijkuak yejua niman ichanejkauan oajsikej kampa toTajtsin kinekiya. Itoka katka Canaán. Ompa toTajtsin okinots Abrahán niman okijli: “Nochi yejuin tlajli tlen tikita moyeualiyan, nikinmakas mokoneuan”. San ika, Abrahán iuan Sara melak iuejueyimej katkaj niman xkipiayaj nion se inkoneuj. ¿Kenon kichiuaskia Jehová tlen yokijtoka?

Abrahán iuan Sara ikipiayaj miyek xiuitl ika ononamiktijkaj. Yejuamej okikaujteujkej se kuajli ikal tlen kipiayaj Ur niman aman san nokajkaltiayaj. San ika, Sara xokualan pampa tlaneltokaya itech Jehová.

Sara melak kinekiya kipiyas ikoneuj, yejua okijli Abrahán: “Tla notekipanojkauj Agar kipiyaskia ikoneuj, kentla nokoneuj yeskia”. Sakin, Agar okipix se ikoneuj. Okitokayotijkej Ismael.

Miyek xiuitl sakin, ijkuak Abrahán kipiaya 99 xiuitl niman Sara 89, yeyimej tlakamej okintlajpalotoj. Abrahán okinnots manoseuikan niman matlakuakan itsintlan se kojtli. ¿Tikmati akinomej katkaj? ¡Katkaj iluikaktekitkej! Yejuamej okijlikej Abrahán: “Xiuitl tlen uajlauj, ken ipan yejuin tonajli, tejua iuan mosiuauj nenkipiyaskej nemokoneuj”. Sara uajtlakaktoya kalijtik. Ijkuak okikak yejon, ipan iyojlo ouetskak niman otlanemili: “¿Yemelak uelis nikpiyas nokoneuj maski melak inilamajtsin?”.

Ipan okse xiuitl, Sara okipix ikonetsin ijkon ken iiluikaktekitkauj Jehová okijtoka. Abrahán okitokayoti Isaac, tlen kijtosneki “uetskani”.

Ijkuak Isaac kipiaya kanaj makuijli xiuitl, Sara okitak ika Ismael kipijpinaujtiaya. Yejua kinekiya kitlajpiyas ikoneuj, kuakon okitlajtlanilito Abrahán uejka makintitlani Agar iuan Ismael. Kachtopa, Abrahán xokinek kichiuas. San ika, Jehová okijli Abrahán: “Xkaki Sara. Nejua niktlajpiyas Ismael. San ika, nochi tlen yonikijto, ipampa Isaac nochiuas”.

Lot chantiya Canaán, iuan itío Abrahán. Inyolkauan xok ueliyaj san sekan nemiskej pampa melak yonomiyekilijkaj. Kuakon, Abrahán okijli Lot: “Xok uelis san sekan tinemiskej. Nimitstlajtlanilia xtlapejpeni kanon tikneki tias niman nejua oksekan nias”. ¿Xmelak ika Abrahán yolkuajli katka?

Lot okitak tlajli nisiuj ueyikalpan Sodoma tlen melak kualtsin katka. Melak onkatka atl niman tlaxoxojkan. Kuakon okitlapejpeni ompa onchantis niman okinuikak ichanejkauan.

Akin chantiyaj Sodoma niman ueyikalpan Gomorra tlen nisiuj onkatka, melak xkuakualtin katkaj. Ika yejon, toTajtsin okijto kinxoxotonis. San ika, toTajtsin kinekiya kimakixtis Lot niman ichanejkauan, ika yejon okintitlan ome iluikaktekitkej makimijlitij: “¡Xmotlasiuitikan! ¡Xkisakan itech yejuin ueyikalpan! ¡Jehová kixoxotonis!”.

Lot xnimantsin okis, ok uejkauiya. Ika yejon, iluikaktekitkej okajsikej ipan ima Lot, isiuauj iuan ichpochuan niman okinkixtijkej nimantsin itech ueyikalpan. Okimijlikej: “¡Xcholokan! ¡Ijkon xnenmikiskej niman maka xontlachiakan tlakuitlapan! Tla nemontlachiaj tlakuitlapan nenmikiskej”.

Ijkuak oajsikej ipan ueyikalpan itoka Zóar, Jehová okichiuj mauetsiki tlitl niman azufre ipan Sodoma niman Gomorra. Yejon ome ueyikalpamej opopoliujkej. Isiuauj Lot xokitlakamat Jehová, oontlachix tlakuitlapan niman onokuep teistatl. San ika, Lot niman ichpochuan omakiskej pampa okitlakamatkej Jehová. Melak onoyolkokojkej ika inchanejkauj xotetlakamat. San ika, pakiyaj  pampa okitlakamatkej itlanauatiluan Jehová.

Abrahán okimachti ikoneuj Isaac makitlasojtla Jehová niman makineltoka nochi tlen kijtoua. San ika, ijkuak Isaac kipiaya kanaj 25 xiuitl, Jehová okitlajtlanili Abrahán makichiua itlaj tlen melak ouijtika. ¿Tlenon katka?

ToTajtsin okijli Abrahán: “Nimitstlajtlanilia, xkuika mosentekoneuj niman xnechuentlalili ipan se tepetl tlen nokaua Moria”. Abrahán xkimatiya tleka Jehová okitlajtlanili yejon. Maski ijkon, yejua otetlakamat.

Uajmostla ika kualkan, Abrahán okinuikak Isaac niman ome itlakeualuan ipan tepetl tlen nokaua Moria. Yeyi tonajli sakin, ouel okitakej tepemej. Abrahán okimijli itlakeualuan makinchiakan, pampa yejua iuan Isaac ontlauentlaliskiaj. Abrahán okitkik cuchillo niman ikoneuj okimamalti tlikojtli. Isaac okitlajtolti itaj: “¿Kanon nemi yolki tlen tikuentlaliskej?”. Abrahán okinankili: “Nokoneuj, Jehová techmakas”.

Ijkuak oajsikej ipan tepetl, okichijchiujkej se tlaixpan. Kuakon Abrahán okimasalo niman okikxisalo Isaac. Sakin okitlejkolti kampa kiuentlaliskia.

Abrahán okajsik cuchillo. Kuakon, iiluikaktekitkauj Jehová okuajtsajtsili itech iluikak: “¡Abrahán! ¡Maka itlaj tikchiuilis mokoneuj! Aman nikmatstika ika tikpiya motlaneltokil itech toTajtsin pampa otiknek tikuentlalis mokoneuj”. Kuakon, Abrahán okitak se borrego tlen saliujtoya kampa tlakoyoj. Yejua nimantsin okimakauj Isaac niman okiuentlali borrego.

Itech yejon tonajli ika tlayekapan, Jehová okitokayoti Abrahán ken akin iuan nouika. ¿Tikmati tleka? Abrahán okichiuj nochi tlen Jehová okitlajtlanili maski xkasikamatiya tleka kitlajtlaniliaya yejon.

Jehová oksejpa okijli Abrahán: “Nimitsteochiuas niman nikinmiyekilis mokoneuan”. Yejuin kijtosnekiya ika ipampa ichanejkauan Abrahán, Jehová kinteochiuaskia nochimej akin kipiyaj kuajli inyojlo.