14 Möi Gere Hilikia, Ahika, Akhibora, Safana hegöi Asaya khö Huleda ira alawe samaʼeleʼö,+ foʼomo Zalumi ono Dikiwa ono Haraha, sondrorogö nukha. Toröi ia ba Mbanua si Bohou ba Yeruzalema, ba daʼö fahuhuo ira khönia.+ 15 Imane khöra, ”Daʼa niwaʼö Yehowa Lowalangi ndraono Gizaraʼeli: ’Fatunö ba niha samatenge yaʼami khögu, 16 ”Daʼa niwaʼö Yehowa: ’Ufalua wamakao ba nahia daʼa hegöi ba nono mbanuania, yaʼia daʼö fefu zi no muwaʼö ba mbuku si no ibaso razo Yehuda.+ 17 No laröi ndraʼo ba latunu zumange khö lowalangi böʼö+ irege numalö miyawa zimbo. Laʼafökhöiʼö dödögu ba ngawalö nifazökhi dangara.+ Börö daʼö, abölö-bölö sibai wönugu ba nahia daʼa ba lö faʼalö.’”+ 18 Hizaʼi, mimane khö razo Yehuda samatenge yaʼami ba wanofu khö Yehowa, ”Daʼa niwaʼö Yehowa Lowalangi ndraono Gizaraʼeli sanandrösa ba wehede nirongomö andrö: 19 ’Me örongo wehede Lowalangi sanandrösa ba nahia daʼa hegöi ba nono mbanuania, wa laʼelifi dania ia ba muhokha mbu niha wamaigi, iʼanemaiʼö öʼameʼegö tödö* ba mangide-ngideʼö ndraʼugö+ föna Yehowa. Ösika nukhamö,+ ba ölau meʼe fönagu. Daʼö mbörö wa ufondrondrongo niwaʼöu, iwaʼö Yehowa. 20 Uʼorudugö dania ndraʼugö khö ndra tuau,* ba lafadölö ndraʼugö ba lewatöu si fao faʼohahau dödö. Lö öʼila dania wamakao nifaluagu ba nahia daʼa.’”’” Aefa daʼö, lafaʼema khö Razo wanema li andrö.