Famaʼeleʼö Nitema Yohane
14 Aefa daʼö, uʼila no mozizio Nono Mbiri-biri+ ba Hili Ziona,+ fao awönia zi 144.000.+ No tesura ba gangangora döinia ba töi Namania.+ 2 Ba urongo li moroi ba mbanua si yawa hulö handro-handro nidanö sabölö-bölö ba hulö gari mbanua sirata. Nirongogu andrö göi hulö li niha sato sanunö samoli harafa. 3 Laʼanunöisi zinunö, hulö zinunö si bohou+ föna dadaoma ba föna kerubi si daöfa+ awö ndra satua sokubaloi.+ Ha si 144.000+ nihöli Lowalangi moroi ba gulidanö zi tola moʼanunöisi sinunö daʼö. 4 Yaʼira andre niha si lö orudu ba ndra alawe ba hulö nono alawe ira.+ Lö laböhöli woloʼö Ono Mbiri-biri gofu hezo möi ia.+ No muhöli ira+ moroi ba gotalua niha gulidanö ba tobali ira siaʼa mbua+ nibeʼe sumange khö Lowalangi ba khö Nono Mbiri-biri. 5 Lö irai falimo ira ba lö mosinegu.+
6 Uʼila malaʼika böʼö si hombo ba dalu mbanua. Iʼohe duria somuso dödö si lö tebulö ba ifaʼema ba ngawalö soi, ba ngawalö mado, banua, hegöi li.+ 7 Ebua linia wangumaʼö, ”Miʼataʼufi Lowalangi ba mifolakhömi ia, börö me no irugi inötö khö Lowalangi ba wanguhuku niha gulidanö.+ Miʼangalulu khö Lowalangi Somböi banua si yawa, tanö, asi,+ ba umbu nidanö.”
8 Aefa daʼö, tohare malaʼika si dua imane, ”No adudu!+ No adudu Mbabilona Sebua.+ No ifabadugö ba ngawalö soi niha fefu agu andrö khönia, yaʼia daʼö fangisönia ba wohorö!”*+
9 Tohare malaʼika si tölu imane, ”Na so zangalulu ba gurifö samuʼi andrö+ hegöi ba nadu andrö khönia, ba na so zanema tandra andrö ba gangangora mazui ba dangara,+ 10 labadu göi nagu wönu Lowalangi. Daʼa nagu sohau-hau nifaduwa ba mako wönunia.+ Tehuku ira ba galitö hegöi ba mbalera+ föna malaʼika niʼamoniʼö ba föna Nono Mbiri-biri. 11 Ba numalö zimbo andrö miyawa sagötö faʼara.+ Gofu haniha zangalulu ba gurifö samuʼi andrö hegöi ba nadu andrö khönia, simanö göi niha sanema tandra döinia,+ lö tebato wanguhuku yaʼira bongi maʼökhö. 12 Börö daʼö, moguna anau gölö niha niʼamoniʼö.+ Yaʼira andre niha soloʼö oroisa Lowalangi ba lö tebulö mamati+ ira khö Yesu.”
13 Ba urongo li siʼao moroi ba mbanua si yawa imane, ”Sura daʼa: Yaʼahowu zi no mate si ha sambua ba khö Zoʼaya+ iʼotarai iadaʼa. Imane khöra eheha niʼamoniʼö enaʼö molombase ira me no erege dödöra wohalöwö, börö me lö muʼolifugö fefu zi no lafalua.”
14 Aefa daʼö, uʼila lawuo safusi ba no modadao zi hulö nono niha yawania.+ No ifake dakula anaʼa ba no igogohe zabi satarö.
15 Tohare malaʼika tanö böʼö moroi ba naha niʼamoniʼö ba gosali. Ebua li malaʼika andrö wehede khö zi dadao yawa ba lawuo imane, ”Faligoi zabimö ba börögö wamasi, börö me no irugi inötö wamasi. No asoso mbasitö ba gulidanö.”+ 16 Ifaligoi zabinia si dadao ba lawuo andrö ba mamasi ia ba gulidanö.
17 Aefa daʼö, tohare malaʼika tanö böʼö moroi ba naha niʼamoniʼö ba gosali si so ba zorugo. No igogohe göi zabi satarö.
18 Ba tohare zui malaʼika tanö böʼö moroi ba naha wanunu sumange, ba mamatörö ia ba galitö. Ebua linia wangumaʼö khö malaʼika sololohe sabi satarö andrö, ”Faligoi zabimö satarö ba owuloi nagu ba gulidanö börö me no asoso mbuania.”+ 19 Ifaligoi zabinia malaʼika andrö ba wangowuloi bua nagu ba gulidanö. Aefa daʼö, ifazaumba ba naha wamera agu sebua, si no amaedola wönu Lowalangi.+ 20 Lahundra-hundra mbua nagu daʼö baero mbanua, ba mangele ndro moroi ba naha wamera agu andrö irugi falalawa mbawa kudo, faʼaröunia mato 296 kilometer.*