Nisura Luka
8 Lö ara aefa daʼö, möi Yesu ba mbanua sebua hegöi ba mbanua side-ide ba wanuriaigö turia somuso dödö sanandrösa ba Wamatörö Lowalangi.+ Fao zinengenia si 12, 2 hegöi ira alawe si no tefadöhö fökhö ba si no teʼefaʼö moroi ba malaʼika si lö sökhi, yaʼia daʼö Maria nifotöi Magadala. No irai teʼefaʼö ia moroi ba zi dafitu malaʼika si lö sökhi. 3 Fao göi khöra Yohana+ foʼomo zohalöwö ba gödo Herode sotöi Khuza, simanö göi Susana, ba ato ndra alawe tanö böʼö. Laʼogunaʼö fefu gokhötara ba wanolo Yesu hegöi ira sinengenia.+
4 Me itugu ato niha si tohare ba fao ira weʼamöi ba mbanua sebua, fahuhuo ia khöra iʼogunaʼö gamaedola daʼa:+ 5 ”So samösa zohalöwö ba danö, möi ia wamazaewe tanömö zinanö. Ba wamazaewenia, so danömö saekhu ba zinga lala, ba lahundra-hundra, aefa daʼö tohare wofo ahori laʼa.+ 6 So göi zaekhu ba dete gara, ba me no moliwiö, oköli lehenia börö me lö idanö.+ 7 So göi danömö saekhu ba gotalua ndruʼu sodoi. Börö waʼabölö ndruʼu sodoi, ikabi zinanö andrö.+ 8 Hizaʼi, so göi zinanö saekhu ba danö si sökhi. Me no moliwiö, mowua ia 100 winaeta.”+ Me no aefa itutunö gamaedola daʼa muʼao ia, ”Si so talinga, yamufondrondrongo.”+
9 Hizaʼi, lasofu ira nifahaʼönia hadia geluaha gamaedola daʼö.+ 10 Imane khöra, ”No mubeʼe khömi waʼaboto ba dödö si tobini andrö sanandrösa ba Wamatörö Lowalangi, hizaʼi niha böʼö ha larongo gamaedolania.+ Hewaʼae lafaigi, tobali zaya-zaya gölöra, ba hewaʼae larongo, lö laʼila geluaha.+ 11 Eluaha gamaedola andrö yaʼia daʼö: Tanömö zinanö yaʼia daromali Lowalangi.+ 12 Tanömö saekhu ba zinga lala yaʼia daʼö niha samondrongo taromali, hizaʼi tohare Gafökha iheta daromali andrö ba dödöra enaʼö lö mamati ba teʼorifi ira.+ 13 Tanömö saekhu ba gara yaʼia daʼö niha samondrongo taromali ba itemaʼö si fao faʼomuso dödö. Hizaʼi, lö mowaʼa daromali daʼö bakha ba dödöra. No irai lafaduhusi tödö, ba awuwu ira me so wanandraigö.+ 14 Tanömö saekhu ba gotalua ndruʼu sodoi yaʼia daʼö niha samondrongo taromali, hizaʼi mangoloi dödöra börö waʼaombö dödö, faʼomasi ganaʼa,+ hegöi ngawalö gisö-isö dödö ba gulidanö.+ Ikabi ira fefu daʼö ba lö mowua.+ 15 Tanömö saekhu ba danö si sökhi yaʼia daʼö niha si sökhi ba satulö tödö.+ Me no larongo daromali andrö, ibeʼe bakha ba dödönia ba mowua ia irege anau gölö.+
16 ”Lö niha sotötöwui fandru faoma karawa na no itunu mazui ibeʼe ba narö farate, hizaʼi ibeʼe yawa ba naha wandru enaʼö laʼila hagania dozi si möi yomo ba nomo.+ 17 Fefu zi tobini ahori oroma ba fefu nibalugö ahori tebokai ba laʼila niha.+ 18 Börö daʼö, mifaigi hewisa lala wamondrongomi. Ba niha si so, lanönö khönia nasa enaʼö oya,+ hizaʼi ba niha si löʼö, laheta zi no iʼokhögö ba wangumaʼönia.”+
19 Laʼondrasi Yesu ira talifusönia matua hegöi inania,+ hizaʼi tebai lafalukhaisi ia börö waʼato niha.+ 20 Lafatunö khönia, ”Hiza baero mamamö awö dalifusöu, no mozio-zio ira. Omasi ira falukha khöu.” 21 Itema lira, ”Mamagu hegöi talifusögu yaʼia daʼö samondrongo ba samalua taromali Lowalangi.”+
22 Samuza maʼökhö, möi Yesu hegöi ira nifahaʼönia ba dundraha. Imane khöra, ”Miʼaine, möi ita yefo nidanö.” Aefa daʼö mofanö ira.+ 23 Sagötö moloyo ira, no mörö Yesu. Aefa daʼö, alua mbade sabölö-bölö, ibörögö möi yawa nidanö ba dundraha ba arakhagö ahöndrö ira.+ 24 Börö daʼö, lasusugi ia ira nifahaʼö lamane, ”He Samahaʼö, he Samahaʼö, mate ita!” Maoso ia, ifahono nangi awö ndrulu. Iʼanemaiʼö tebato mbade ba ahono.+ 25 Aefa daʼö imane khöra, ”Hezo wamatimi?” Hizaʼi si fao faʼataʼu ba faʼahöli-höli dödö, faoma lamane, ”Haniha sindruhunia niha daʼa? Angi hegöi asi laʼoʼö linia.”+
26 Lö ara, larugi zinga nasi ba mbanua Gerasa,+ si so yefo Galilaia. 27 Me awena sibai möi tou Yesu, möi khönia samösa ndra matua nifakao malaʼika si lö sökhi moroi ba mbanua andrö. No ara lö nifakenia nukha ba tenga ba nomo toröi ia, hizaʼi ba gotalua lewatö.+ 28 Me iʼila Yesu, muʼao ia ba ituhi danö. Aefa daʼö, ebua linia weʼao imane, ”He Yesu, Ono Lowalangi Fondrege Zalawa, hana wa möiʼö ba daʼa? Uʼandrö khöu böi fakao ndraʼo.”+ 29 (Börö me ifofanö malaʼika si lö sökhi andrö ba mboto niha daʼö. Asese sibai* ifakao ia malaʼika si lö sökhi andrö.+ No hauga kali larate dangania, labeʼe mbilagu ba gahe, ba lahaogö wozago yaʼia. Hizaʼi, tola itotoʼö mböbönia, ba iʼohe ia malaʼika si lö sökhi andrö ba zi lö niha-niha.) 30 Isofu khönia Yesu, ”Haniha döimö?” Imane, ”Legio,” börö me ato malaʼika si lö sökhi si fatewu ba mbotonia. 31 Laʼandrö khö Yesu ira malaʼika si lö sökhi andrö enaʼö lö ifatenge ira ba mbaho sabakha sibai.*+ 32 Me luo daʼö, so ngawawa mbawi+ sangalui göra ba hili. Börö daʼö laʼandrö khönia enaʼö itehegö fatewu ira ba mbawi andrö, ba itehegö khöra Yesu.+ 33 Fefu malaʼika si lö sökhi no mege laheta ira ba niha daʼö, ba fatewu ira ba mbawi. Manaoka fefu mbawi andrö moroi ba hili sokara, lafazaumba ira ba nasi ba ahöndrö. 34 Me laʼila zalua andrö sanarogö bawi, moloi ira ba lafatunö zalua daʼö ba mbanua sebua hegöi ba zi fasui.
35 Möi niha wamaigi salua andrö. Lafalukhaisi Yesu ba laʼila niha si fatewu malaʼika si lö sökhi no mege, no monukha ba modadao ia ahatö ba gahe Yesu. Lö owöhö ia saʼae. Me laʼila daʼö oi so waʼataʼura. 36 Niha si no mangila, ladunö-dunö ba niha sangondrasi hewisa me tefadöhö niha si fatewu malaʼika si lö sökhi andrö. 37 Ato niha moroi ba mbanua Gerasa, laʼandrö khö Yesu enaʼö iröi mbanua daʼö börö waʼataʼura. Aefa daʼö mofanö Yesu itörö dundraha. 38 Niha si fatewu malaʼika si lö sökhi no mege, iforege enaʼö fao ia khö Yesu. Hizaʼi, ifofanö ia Yesu ba imane,+ 39 ”Angawuli ba fatunö hadia nifalua Lowalangi khöu.” Mofanö ia ba idunö-dunö fefu ba mbanua daʼö hadia nifalua Yesu khönia.
40 Me mangawuli Yesu, latemaʼö ia si fao faʼomuso dödö. No ara labalo-baloi ia.+ 41 Lö ara tohare samösa ndra matua sotöi Yaʼiro, sondröniaʼö ba nahia waʼowulo. Ituhi danö föna Yesu ba iforege enaʼö möi ia ba nomonia,+ 42 börö me abölö-bölö wökhö nononia alawe si ha sambu-sambua. Mato 12 fakhe ndröfi nono daʼö.
Ba wofanö-fanö Yesu, ladegeni ia niha sato. 43 So ba daʼö samösa ndra alawe sendro talu,+ no 12 fakhe göna khönia wökhö daʼö, ba samösa lö si tola mamadöhö yaʼia.+ 44 Ifahatö ia moroi furi ba igogohe gahe mbaru Yesu,+ iʼanemaiʼö döhö wökhönia andrö. 45 Manofu Yesu, ”Haniha zombambaya yaʼo?” Hizaʼi, lö samatunö. Imane Fetero, ”He Samahaʼö, ato sibai niha ba zi fasuimö.”+ 46 Imane Yesu, ”So zombambaya yaʼo, uʼila wa so waʼabölö+ saheta khögu.” 47 Aboto ba dödö ndra alawe andrö wa no laʼila ia. Börö daʼö, möi ia föna Yesu, ituhi danö si fao fanizi-nizi. Itutunö föna niha sato hadia mbörö wa ibabaya gahe mbaru Yesu ba iʼanemaiʼö döhö ia. 48 Aefa daʼö imane khönia Yesu, ”He onogu, no ifadöhö ndraʼugö famatimö. Angawuli yaʼohahau dödöu.”+
49 Gasa-gasa wahuhuosa Yesu, tohare samösa denge-tenge moroi ba nomo Yaʼiro imane, ”No mate nonomö. Böi saʼae fakao Zamahaʼö andrö.”+ 50 Irongo daʼö Yesu ba imane khö Yaʼiro, ”Böi busi dödöu. Amati manö ba hasambalö auri nonomö.”+ 51 Me no irugi nomo daʼö, lö itehegö möi bakha niha sato, ha Fetero, Yohane, Yakobo ba satua nono andrö. 52 Mege-ege fefu niha ba laböbözi dötöʼara börö waʼabu dödö. Imane khöra Yesu, ”Böi miʼaeʼe saʼae.+ Tenga si mate ia, ha si mörö.”+ 53 Ibörögö laʼigi-igiʼö ia, börö me laʼila wa no mate nono daʼö. 54 Hizaʼi, igogohe danga nono daʼö Yesu imane, ”Faoso onogu!”+ 55 Ifuli auri* nono andrö+ ba iʼanemaiʼö maoso ia.+ Iwaʼö Yesu enaʼö labeʼe gö nono andrö. 56 Omuso sibai dödö zatuania, hizaʼi itegu ira Yesu enaʼö böi latutunö zalua andrö ba niha böʼö.+