Dua Timoteo
1 Moroi khö Waulo, sinenge Keriso Yesu moloʼö ohitö dödö Lowalangi ba wangombakha nifabuʼunia sanandrösa ba waʼauri nibeʼe ba khö Keriso Yesu,+ 2 khö Dimoteo, onogu niʼomasiʼö:+
Yaʼötema waʼasökhi dödö sebua,* faʼahakhö dödö, ba faʼohahau dödö moroi khö Namada Lowalangi, ba moroi khö Keriso Yesu, Soʼaya yaʼita.
3 Uʼandrö saohagölö khö Lowalangi me khönia ufalua halöwö niʼamoniʼö si fao tödö side-ide si lö sinegu simane nifalua ndra tuagu me föna. Bongi maʼökhö, itörö tödögu ndraʼugö ba wangandrö. 4 Na itörö tödögu dawa höröu, omasido sibai falukha khömö enaʼö fahöna khögu waʼomuso dödö. 5 Lö olifu ndraʼo wamatimö si lö famini tödö,+ niʼokhögö nenemö Loise hegöi mamamö Oinike me mböröta, ba faduhu dödögu wa simane daʼö göi wamatimö.
6 Börö daʼö, ufasugi ba dödöu enaʼö owölö-ölö ndraʼugö wangogunaʼö buala Lowalangi nitemamö me utufa högöu.+ 7 Lowalangi zameʼe khöda eheha faʼabölö,+ faʼomasi, ba fangila mamatimbaisi hadia ia, tenga eheha sadaʼu-daʼu.+ 8 Andrö böi aila ndraʼugö wamaduhuʼö Soʼaya yaʼita,+ mazui yaʼodo si no labeʼe ba gurunga börö ia. Yafao ndraʼugö woluʼi famakao+ ba duria somuso dödö, börö me öʼodaligö geheha Lowalangi.+ 9 Yaʼia zanolo ba sogaoni yaʼita enaʼö tobali ita niha niʼamoniʼö,+ tenga börö mbua-buada, hizaʼi börö gohitö dödö Lowalangi ba faʼasökhi dödönia sebua.*+ Ibeʼe khöda waʼasökhi dödönia andrö ba khö Keriso Yesu iʼotarai mböröta, 10 ba no oroma daʼö iadaʼa, yaʼia me tohare Zangorifi yaʼita, Keriso Yesu,+ si no mangeheta faʼamate.+ Börö duria somuso dödö,+ no iʼoromaʼö haga ba waʼauri+ hegöi sanandrösa ba mboto si tebai tekiko.+ 11 Börö duria somuso dödö andrö wa tefatenge ndraʼo tobali sanuriaigö, sinenge ba samahaʼö.+
12 Daʼö mbörö wa utaögö wamakao simane daʼa.+ Lö aila ndraʼo+ börö me aboto ba dödögu Lowalangi nifaduhusigu tödö, ba faduhu dödögu wa irorogö fefu zi no utouʼö ba dangania irugi luo daʼö.+ 13 Böi böhöli woloʼö goi-goi wamahaʼö sindruhu andrö+ si no örongo moroi khögu si fao famati ba faʼomasi, enaʼö hasara dödöu khö Keriso Yesu. 14 Börö geheha niʼamoniʼö si no taʼokhögö, rorogö harato andre si no lafaduhusi tödö khöu.+
15 Miʼila samösa wa no laröi ndraʼo niha Provinsi Asia,+ simanö göi ndra Figelo ba Hemogene. 16 Yaʼiforomaʼö waʼahakhö dödönia Lowalangi ba nösi nomo Gonesiforo,+ börö me asese irara dödögu ba lö aila ia hewaʼae no lakuru ndraʼo. 17 Me so ndraʼo ba Roma, iʼodödögö wangalui yaʼo irege isöndra. 18 Yaʼiforomaʼö khönia waʼahakhö dödö Lowalangi Yehowa* na luo daʼö. No aboto ba dödöu halöwö nifaluania ba Nefeso.