Nisura Luka
23 Börö daʼö, mofanö niha sato laʼohe Yesu khö Wilato.+ 2 Labörögö lafobahulu ia,+ ”No ifaelungu mbanuama niha daʼa, lö itehe khöma na mabuʼa pajak khö Kaisaro,+ ba ifaduhuʼö wa Keriso ia, samösa razo.”+ 3 Manofu khönia Wilato, ”Hadia Razo Niha Yahudi ndraʼugö?” Itema li, ”Atulö, simane niwaʼömö.”+ 4 Imane Filato khö ndra kafalo gere hegöi niha sato, ”Maʼifu lö hadöi sala nisöndragu ba niha daʼa.”+ 5 Hizaʼi lamane, ”Ifaweʼe fefu niha Yudea ba wamahaʼönia. Si oföna ba Galilaia, lua-luania no irugi daʼa.” 6 Me irongo daʼö Filato, manofu ia hadia sindruhu niha Galilaia ia. 7 Me no aboto ba dödönia wa moroi ba mbanua nifatörö Herode iʼotarai,+ ifatenge ia Filato khö Herode si so ba Yeruzalema me luo daʼö.
8 Omuso sibai dödö Herode me iʼila Yesu börö me no ara idöna-döna enaʼö falukha ira. Oya nirongonia sanandrösa khö Yesu,+ ba manötöna ia enaʼö iʼila dandra sahöli-höli dödö nifaluania. 9 Andrö oya wanofu-nofunia, hizaʼi lö idema-dema linia Yesu.+ 10 No hauga kali mosindro ndra kafalo gere hegöi sangila amakhoita ba laduhugö wamobahulu Yesu. 11 Iʼailasi Yesu Herode hegöi ira saradadunia.+ Ibeʼe khönia mbaru si sökhi Herode ba wangoʼaya yaʼia+ ba ifangawuli Yesu khö Wilato. 12 Iʼotarai daʼö, ifuli fahuwu Herode khö Wilato, hewaʼae no faʼudu ira ba zilalö.
13 Aefa daʼö, iʼowuloi ndra kafalo gere Filato, ira samatörö hegöi niha mbanua. 14 Imane khöra, ”No miʼohe khögu niha daʼa ba mifobahulu ia wa no ifaweʼe niha mbanua enaʼö molawa ira. No oya usofu-sofu khönia, hizaʼi lö hadöi usöndra zala si tobali dane-dane nifobahulumi khönia.+ 15 Lö göi fasala niha daʼa moloʼö Herode, andrö wa ifangawuli ia khöma. Lö hadöi amuata niha daʼa si tobali börö wa laʼetuʼö hukuma faʼamate khönia. 16 Börö daʼö uleasi ia+ ba uʼefasi.” 17* —— 18 Hizaʼi muʼao fefu niha sato, ”Bunu* niha daʼö, efasi Mbaraba!”+ 19 (Wa labeʼe Mbaraba ba gurunga börö me molawa ia ba no ibunu niha.) 20 Ifuli zui fahuhuo khöra Wilato börö me omasi ia iʼefasi Yesu.+ 21 Ba ibörögö muʼao-ao niha sato, ”Osö ia ba döla geu! Osö ia ba döla geu!”+ 22 Ba zi medölu kali isofu khöra Filato, ”Hadia mbörö? Hadia zala si no ifalua? Na ufaigi, lö hadöi nifaluania sala si möi börö wamununia. Börö daʼö, uleasi ia ba uʼefasi.” 23 Itugu lafaso ba laforege weʼao enaʼö labunu ia.* Lö labato weʼao irege alulu dödö Wilato.+ 24 Andrö iʼetuʼö hukumania Filato moloʼö somasi dödöra. 25 Iʼefasi niha somasi ira, nikuru börö me ilawa zamatörö ba no ibunu niha. Hizaʼi, itouʼö Yesu ba dangara enaʼö labunu ba zomasi dödöra.
26 Mofanö ira ba laʼohe Yesu. Ba dalu lala, lataha Zimoni niha Girene si otarai mbanua side-ide. Labeʼe ba galisinia döla geu famakao* Yesu ba laʼandrö khönia enaʼö iʼoʼö moroi furi.+ 27 Ato sibai niha soloʼö yaʼia. Ba gotaluara so ndra alawe segeʼege ba samözi tötöʼara börö waʼabu dödö. 28 Ifaigi ira Yesu ba imane, ”He yaʼami ira alawe Yeruzalema, böi miʼeʼe ba khögu. Ba khömi miʼeʼe hegöi ba ndraonomi.+ 29 Hiza sa irugi baŵa dania ba lamane, ’Yaʼahowu ndra alawe si lö manabina, talu si lö irai moʼono, awö zi lö irai mamaenu ono!’+ 30 Ibörögö lamane ba hili, ’Langögö ndraʼaga!’ ba lamane ba hili-hili, ’Balugö ndraʼaga!’+ 31 Na lafalua daʼö ba ginötö atabö mbulu geu, hadia zalua na inötö aleu geu daʼö?”
32 So darua niha si lö sökhi si fao khönia niʼetuʼö hukuma faʼamate.+ 33 Me ofeta ira ba nahia nifotöi Naha Gamatela,+ laʼosö ia ba döla geu ba gotalua zi darua niha si lö sökhi andrö. Samösa ba gambölö ba samösa ba gabera.+ 34 Imane Yesu, ”He Ama, efaʼö khöra horöra, börö me lö laʼila hadia nifaluara.” Lalau fadahö-dahö ba nukhania ba labagi-bagi.+ 35 Mosindro niha sato wamaigi-maigi. Hizaʼi, laʼoʼaya ia ira samatörö lamane, ”Iʼorifi sa niha böʼö. Na sindruhu Keriso ia, Niha Nifili Lowalangi, akha iʼorifi samösa ia.”+ 36 Laʼoʼaya göi ia ira saradadu. Lafahatö ira, latandraigö labeʼe önia nagu saisö+ 37 ba lamane, ”Orifiʼö na sindruhu Razo Niha Yahudi ndraʼugö.” 38 So wafa nisura tanö yawa ba högönia, ”Daʼa Razo Niha Yahudi.”+
39 Aefa daʼö, samösa niha si lö sökhi niʼosö ba zingania iʼoʼaya Yesu+ imane, ”Öwaʼö Keriso ndraʼugö! Tandraigö orifi ndraʼugö ba yaʼaga göi.” 40 Hizaʼi, itegu ia awönia niʼosö si samösa, ”Hadia sindruhu lö ataʼu ndraʼugö khö Lowalangi? Fagölö wanguhuku nitemami, 41 ba sinangea tehuku ita. Hukuma daʼa tefaudu ba gamuata si no tafalua. Hizaʼi, lö hadöi sala nifalua niha daʼa.” 42 Aefa daʼö imane, ”He Yesu, törö tödöu ndraʼo na möiʼö ba Wamatöröu.”+ 43 Itema linia Yesu, ”Sindruhu niwaʼögu khöu maʼökhö andre, awögu ndraʼugö ba Waradaiso.”+
44 Mato bözi 12 waʼalawa luo,* ogömi fefu mbanua daʼö irugi mato bözi 3 tanö owi,*+ 45 börö me lö haga luo. Aefa daʼö, tebagi dua+ waʼasika nukha mbaʼa-baʼa ba naha niʼamoniʼö.+ 46 Ebua li Yesu weʼao imane, ”He Ama, ba dangau utouʼö nosogu.”+ Me no aefa iwaʼö daʼö, aetu nosonia.+ 47 So samösa gumandru zaradadu si no mangila ngawalö zalua, ibörögö isuno Lowalangi imane, ”Sindruhu wa lö fasala niha daʼa.”+ 48 Me no laʼila ngawalö zalua niha sowulo ba daʼö si möi mamaigi, mangawuli ira ba laböbözi dötöʼara börö waʼabu dödö. 49 Mosindro moroi ba zaröu fefu niha si no irai faʼila khönia. So göi ba daʼö ndra alawe si fao khönia moroi ba Galilaia no laʼila fefu ngawalö zalua andre.+
50 So samösa ndra matua sotöi Yosefo sohalöwö ba gödo Zangetuʼö Huku niha Yahudi. Yaʼia andrö niha si sökhi ba satulö tödö.+ 51 (Lö fao ia ba gangetula hegöi ba nifaluara.) Yaʼia andrö moroi ba Garimatea, banua si so ba Yudea. Idöna-döna göi Wamatörö Lowalangi. 52 Iʼondrasi Wilato ba wangandrö boto Yesu si no mate. 53 Ibeʼe tou mboto Yesu,+ ibukusi ba nukha si sökhi si lö taʼunö, ba ifadölö ba lewatö si no lakhao ba narö gara.+ Lö irai so niha si mate nibeʼe ba daʼö. 54 Me luo daʼö luo Wangöhöna,+ ba lö ara tö tebörögö luo Sabato.+ 55 Ira alawe si fao khönia moroi ba Galilaia, möi ira göi ba lewatö andrö ba lafaigi hewisa me lafadölö mboto Yesu.+ 56 Aefa daʼö, mangawuli ira ba wamaʼanö ngawalö zomuhua hegöi fanikha. Hizaʼi, molombase ira ba luo Sabato+ simane niwaʼö ba Goroisa Moze.