Halöwö Zinenge
18 Aefa daʼö, mofanö Waulo moroi ba Atena numalö ba Gorindro. 2 Falukha ira ba daʼö Akila,+ niha Yahudi si otarai Wondro, sawena tohare moroi ba Gitalia fao ira woʼomonia Firisikila, börö me ibeʼe fareta Kaisaro Kalaudio ba niha Yahudi enaʼö laröi mbanua Roma. Iʼondrasi ira Faulo, 3 ba börö me fagölö nekhe-nekhe dangara yaʼia daʼö mamazökhi tendra, toröi ia ba nomora ba falulu fohalöwö ira ba daʼö.+ 4 Ero luo sabato,+ ifaʼema huhuo sebua* Faulo ba nahia waʼowulo,*+ iforege enaʼö faduhu dödö niha Yahudi hegöi niha Yunani.
5 Me tohare Zila+ faoma Timoteo+ moroi ba Makedonia, ibörögö oya ibeʼe ginötönia Faulo ba wanuriaigö taromali. Ifaduhuʼö ba niha Yahudi wa Yesu andrö Keriso.+ 6 Börö me lö laböhöli wangoʼaya ba lalawa ia, iʼanotogö mbarunia+ imane, ”Yaʼami samösa zoluʼi domi.+ Lö horögu ba ndromi.+ Iʼotarai iadaʼa, möido ba niha moroi ba soi böʼö.”+ 7 Mofanö ia moroi ba daʼö* ba möi ia ba nomo Titio Yuso samosumange Lowalangi, omo sahatö ba zinga nahia waʼowulo andrö. 8 Hizaʼi, Kerifo+ sohalöwö ba nahia waʼowulo andrö ba fefu nösi nomonia faduhu dödöra khö Zoʼaya. Ato göi niha Gorindro samondrongo turia somuso dödö, faduhu dödöra ba tebayagö ira idanö. 9 Samuza inötö me alua khö Waulo gangilata ba zi bongi, imane khönia Soʼaya, ”Böi ataʼufi. Tohugö fahuhuo ba böi bato, 10 börö me fao ndraʼo khöu+ ba lö niha si tola mamakao yaʼugö. Ato niha ba mbanua daʼa zi faduhu tödö khögu.” 11 Toröi ia ba daʼö döfi amatonga waʼara ba ifahaʼö ira ba daromali Lowalangi.
12 Me tobali gubernur* Galio ba mbanua Nakhaya, hasara dödö niha Yahudi ba wolawa Faulo, ba laʼohe ia föna gurusi wanguhuku. 13 Lamane, ”Niha daʼa, ifaweʼe niha sato enaʼö lafosumange Lowalangi si faböʼö moroi ba huku.” 14 Hizaʼi me fahuhuo Waulo, imane Galio khö ndra niha Yahudi, ”Na si lö sökhi daʼa mazui horö niʼodödögö, hasambalö ebolo dödögu wamondrongo yaʼami. 15 Hizaʼi na ha fatitisa ba wehede, töi, mazui huku khömi,+ yaʼami zamatunö daʼö saʼae. Lö omasido tobali sanguhuku ba zimane daʼa.” 16 Ifofanö ira moroi ba gurusi wanguhuku andrö. 17 Börö daʼö, fefu ira laraʼu Zotene+ sondröniaʼö ba nahia waʼowulo ba labörögö labözi ia föna gurusi wanguhuku. Hizaʼi, lö ba dödö Galio fefu daʼö.
18 Me toröi ia mato hauga hari tö ba daʼö, mangona Waulo khö ndra talifusö ba moloyo ia ba Ziria, fao ira Wirisikila ba Akila. Iʼadogo-dogoiʼö wanaba bunia Faulo ba Gengekirea+ börö me no fawuʼu li ia. 19 Me no larugi Efeso, iröi danö böʼö Faulo ba daʼö, möi ia ba nahia waʼowulo* ba fahuhuo ia khö ndra niha Yahudi.+ 20 Laʼandrö khönia enaʼö toröi manö ia ba daʼö, hizaʼi lö omasi ia. 21 Mangona ia imane, ”Mangawulido ba daʼa na itehegö Yehowa.”* Aefa daʼö moloyo ia moroi ba Efeso, 22 ofeta ia ba Kaisarea. Itohugö wofanö* itörö mbanua niha Keriso ba daʼö ba mofanö ia ba Gandriokhia.+
23 Me no toröi ia hauga hari ba daʼö, mofanö ia itöröi mbanua Galatia hegöi Ferigia+ ba wamarou tödö ndra nifahaʼö.+
24 Me luo daʼö, samösa niha Yahudi sotöi Afolo+ si otarai Alesandria, möi ia ba Nefeso. Onekhe ia fahuo-huo ba oya niʼilania sanandrösa ba Mbuku Niʼamoniʼö. 25 No tefahaʼö ia ba lala Yehowa.* Ba terou dödönia börö geheha niʼamoniʼö, fahuhuo ia ba ifahaʼö zi tefaudu sanandrösa khö Yesu, hizaʼi ha sanandrösa famayagö idanö nifalua Yohane zaboto ba dödönia. 26 Ibörögö fahuhuo ia si fao faʼabarani ba nahia waʼowulo. Me larongo daʼö ira Firisikila faoma Akila,+ lakaoni ia ba laʼombakhaʼö khönia zabölö tefaudu sanandrösa ba lala Lowalangi. 27 Börö me omasi ia moloyo numalö ba Akhaya, lafaʼoheʼö zura ira talifusöda enaʼö latemaʼö ia ba daʼö. Me irugi daʼö, ato niha si faduhu tödö nitolonia börö waʼasökhi dödö sebua* moroi khö Lowalangi. 28 Fahuhuo ia föna niha sato soroi ba dödö, ihaogö wamaduhuʼö wa fasala wamahaʼö niha Yahudi. Iforomaʼö moroi ba Mbuku Niʼamoniʼö wa Yesu andrö Keriso.+