Halöwö Zinenge
17 Mofanö ira iadaʼa latörö Gambifoli ba Gafolonia, aefa daʼö larugi Desalonika.+ Ba daʼö so nahia waʼowulo* niha Yahudi. 2 Simane si toʼölö ifalua Faulo,+ möi ia ifalukhaisi ira. Sagötö ba zi tölu ngaluo sabato, ihaogö wamatunö enaʼö aboto ba dödöra hewisa moloʼö Buku Niʼamoniʼö,+ 3 itutunö ba ifaduhuʼö moloʼö ayati zura wa hasambalö itörö wamakao Keriso+ ba tesusugi ia moroi ba gotalua zi mate.+ Imane, ”Yesu nituriaigögu khömi yaʼia daʼö Keriso.” 4 Lua-luania, so ösa zi faduhu tödö moroi ba gotaluara, ato niha Yunani samosumange Lowalangi, ba ato ndra alawe si tehöngö si fao khö Waulo hegöi Sila.+
5 Hizaʼi börö waʼafökhö dödö niha Yahudi,+ lakaoni niha si lö sökhi ba fasa, samangörö-ngörö yaʼira ba lala, ba laʼowuloi ira enaʼö kaliru mbanua andrö. Lasuwö nomo Yaso enaʼö laʼohe baero Waulo faoma Sila ba niha si kaliru andrö. 6 Börö me lö lasöndra Waulo faoma Sila, lasöbi baero Yaso ba so ösa ndra talifusö niʼohe föna ndra samatörö ba lamane, ”Ba daʼa so niha samawukaisi ulidanö,+ 7 no itema ira Yaso tobali tomenia. No lasawö huku Kaisaro börö me lamane so razo tanö böʼö yaʼia daʼö Yesu.”+ 8 Me larongo daʼö, ibörögö abu dödö niha sato awö zamatörö banua. 9 Hizaʼi, laʼefasi Yaso hegöi niha tanö böʼö börö me no labeʼe gefe si tobali weʼe-weʼe dödö.
10 Bongi daʼö, lafatenge Waulo faoma Sila ba Mberea ira talifusö. Me no larugi daʼö, möi ira ba nahia waʼowulo* niha Yahudi. 11 Tenga simane niha Desalonika, abölö omasi niha Mberea na tefahaʼö ira, börö me soroi ba dödöra wanemaʼö taromali Lowalangi. Lafareso Mbuku Niʼamoniʼö ero maʼökhö enaʼö laʼila hezo zindruhu, 12 irege ato zi faduhu tödö ba gotaluara, simanö göi ndra matua hegöi ira alawe nifosumange ba gotalua niha Yunani. 13 Hizaʼi, me larongo niha Yahudi si so ba Desalonika wa no ituriaigö daromali Lowalangi Faulo ba Mberea göi, tohare ira lafaweʼe niha ba lafangiwa dödö zato.+ 14 Börö daʼö, iʼanemaiʼö lawaʼö khö Waulo ira talifusö enaʼö mofanö ia ba zinga nasi,+ hizaʼi toröi Zila faoma Timoteo ba daʼö. 15 Ira talifusö si fao khö Waulo lafasao ia irugi Atena, aefa daʼö mofanö ira me no latema goroisa enaʼö alio Zila faoma Timoteo+ wamalukhaisi Faulo.
16 Me ibaloi ira Faulo ba Atena, alangu dödönia me iʼila wa oya nadu ba mbanua andrö. 17 Ibörögö fahuhuo ba nahia waʼowulo* ba daʼö, ba niha Yahudi hegöi niha böʼö samosumange Lowalangi, ero maʼökhö ia göi ba fasa, ifalukhaisi niha si so ba daʼö. 18 Hizaʼi, so ösa zoloʼö Efikuro hegöi Sitoiko, ibörögö fabuʼa-buʼa ira khönia ba so zangumaʼö, ”Hadia nifaʼema niha soya bewe andre?” So göi zangumaʼö, ”Hulö so lowalangi böʼö nidunö-dunönia.” Wa lawaʼö daʼö börö me itutunö duria somuso dödö Faulo sanandrösa khö Yesu hegöi fanusugi zi no mate.+ 19 Andrö laʼohe ia ba Areofago* ba lamane, ”Hadia tola maʼila wamahaʼö si bohou nifatunömö? 20 Öfatunö ngawalö zi lö irai marongo, ba omasiga maʼila geluahania.” 21 Fefu niha Atena hegöi niha si fatewu si toröi* ba daʼö, labeʼe ginötöra ha ba wamatunö mazui ba wamondrongo ngawalö zi bohou. 22 Aefa daʼö, mozizio Waulo ba gotalua Areofago+ ba imane,
”Yaʼami niha Atena, aboto ba dödögu wa miʼataʼufi sibai lowalangimi* ba ngawalö hadia ia, töra moroi ba niha böʼö.+ 23 Duma-dumania, me utöröi mbanua andre ba ufaigi hadia nifosumangemi, uʼila sambua naha wanunu sumange, no musura ba daʼö, ’Khö Lowalangi si Lö Taʼila.’ Iadaʼa, ufatunö khömi haniha Lowalangi nifosumangemi andrö si lö irai miʼila. 24 Lowalangi samazökhi ulidanö awö nösinia maʼafefu, Sokhö banua si yawa ba tanö,+ lö toröi ia ba nahia wamosumange nifazökhi danga niha,+ 25 lö itötöna wanolo moroi ba niha hulö na so zoʼamböta ia,+ börö me yaʼia zameʼe faʼauri ba niha, hanu-hanu,+ hegöi ngawalö hadia ia. 26 Moroi ba zi samösa niha+ ifazökhi fefu soi si toröi ba gulidanö,+ ihonogöi ginötö hegöi ola nahia zi toröi yaʼira+ 27 enaʼö laʼalui Lowalangi. Na laforege wangalui yaʼia, ba tola lasöndra ia.+ Sindruhunia lö aröu ia khöda zamösana. 28 Börö ia wa auri ita, maliwa-liwa ita, ba so ita, simane niwaʼö ndra sanura andrö khömi, ’Ononia* göi ita.’
29 ”Börö me ono Lowalangi ita, böi tamane wa Lowalangi andrö+ amaedola ganaʼa mazui firö mazui kara, simane adu nihaogö zamazökhi yaʼia dali nisöndra dödö niha.+ 30 Atulö, so mböröta ginötö nitehegö Lowalangi ba niha wa lö aboto ba dödöra ia.+ Iadaʼa, ifatunö ba niha gofu hezo manö wa moguna lafalalini gera-erara, 31 börö me no ihonogöi ginötö ba wanguhuku ulidanö+ si fao faʼatulö, no ituyu samösa niha ba no göi ibeʼe weʼe-weʼe dödö ba niha fefu, yaʼia me isusugi niha andrö moroi ba gotalua zi mate.”+
32 Me larongo wanusugi niha si no mate, ibörögö so zangoʼaya,+ ba tanö böʼönia lamane, ”Luo böʼö manö mafondrondrongo nifaʼemamö andre.” 33 Aefa daʼö iröi ira Faulo, 34 hizaʼi so niha si fao khönia ba faduhu dödöra. So samösa ba gotaluara zangetuʼö huku moroi ba Areofago sotöi Dionizio, ba samösa ndra alawe sotöi Damaria hegöi niha böʼö.