Nisura Yohane
18 Me no aefa iwaʼö daʼö Yesu, fao ira ndra nifahaʼönia numalö ba kabu+ ba zi tambai Ndraso Kidorona.+ 2 Iʼila nahia daʼö Yuda si manga mböli, börö me asese möi Yesu hegöi ira nifahaʼönia ba daʼö. 3 Andrö möi Yuda ba daʼö, iʼohe ndra saradadu awö zohalöwö nifatenge ndra kafalo gere hegöi ira Farizaiʼo. Laʼohe solo, fandru, ba fagado.+ 4 Iʼila Yesu fefu zi lö ara tö alua khönia. Iʼondrasi ira ba imane, ”Haniha niʼaluimi andrö?” 5 Latema linia, ”Yesu, niha Nazareta.”+ Imane khöra, ”Yaʼe ndraʼo.” Fao göi khöra Yuda si manga mbölinia.+
6 Me imane khöra Yesu, ”Yaʼe ndraʼo,” awuwu ira ba alabu tou ba danö.+ 7 Imane zui, ”Haniha niʼaluimi andrö?” Lamane, ”Yesu, niha Nazareta.” 8 Imane Yesu, ”No ufatunö khömi wa yaʼo niʼaluimi andrö. Na sindruhu yaʼo niʼaluimi, mifofanö ira andre fefu.” 9 Ba wehedenia andrö, itörö zi no irai iwaʼö, ”Samösa lö si taya niha nibeʼeu khögu andrö.”+
10 Aefa daʼö, isöbi wödania Simoni Fetero, itaba dalinga kambölö zawuyu gere sebua irege aetu.+ Töi zawuyu andrö Malikho. 11 Imane Yesu khö Wetero, ”Fuli saembugö wödamö andrö.+ Hadia lö tola löʼö ubadu nösi mako andrö nibeʼe Namagu khögu?”+
12 Laraʼu Yesu ba laböbö ia ira saradadu, kumandru hegöi sohalöwö ba niha Yahudi. 13 Si oföna, laʼohe ia khö Hanasi, börö me Hanasi andrö ama matua Gayafa,+ ere sebua ba ndröfi daʼö.+ 14 Kayafa andre zoʼamenesi niha Yahudi wa abölö sökhi na mate zi samösa niha salahi soira.+
15 Me luo daʼö, Simoni Fetero ba samösa nifahaʼö tanö böʼö laʼoʼö Yesu.+ Faʼila nifahaʼö andrö khö gere sebua, daʼö mbörö wa fao ia khö Yesu weʼamöi bakha ba golayama nomo gere sebua. 16 Baero mozizio Wetero ba zinga mbawandruhö. Nifahaʼö si samösa andrö si faʼila khö gere sebua, möi ia fahuhuo khö zanaro bawandruhö, aefa daʼö iʼohe bakha Wetero. 17 Sawuyu ira alawe sanaro bawandruhö andrö imane khö Wetero, ”Samösa göi ndraʼugö nifahaʼönia lö?” Imane Fetero, ”Tenga he.”+ 18 Börö me okafu-kafu me luo daʼö, laleu ira ba galitö ira sohalöwö hegöi sawuyu, lafasui galitö si hola-hola. Fao göi khöra Wetero ba woleu yaʼia.
19 Manofu gafalo gere khö Yesu sanandrösa khö ndra nifahaʼönia hegöi famahaʼönia. 20 Itema linia Yesu, ”No ufatunö föna niha sato. Mamahaʼö ndraʼo ba nahia waʼowulo hegöi ba gosali+ nahia gangowuloa niha Yahudi, ba lö irai ubiniʼö wangombakha hadia ia. 21 Hana wa ösofu khögu? Sofu manö ba niha si no irai mamondrongo fehedegu. Hasambalö laʼila hadia niwaʼögu.” 22 Me no aefa iwaʼö daʼö, samösa zohalöwö si zizio ba daʼö, itafari mbawa Yesu+ imane, ”Hadia simane daʼö na fahuhuo ndraʼugö khö gafalo gere?” 23 Imane khönia Yesu, ”Na fasala wehedegu, fatunö khögu* hezo zi sala. Ba na atulö wehedegu, hana wa ötafari ndraʼo?” 24 Aefa daʼö, iʼandrö Hanasi enaʼö laʼohe Yesu si no muböbö andrö föna gere sebua sotöi Kayafa.+
25 Gasa-gasa daʼö, no mozizio Wetero ba woleu yaʼia. So zangumaʼö khönia, ”Samösa göi ndraʼugö nifahaʼönia lö?” Iʼosilöʼögö Fetero imane, ”Tenga he.”+ 26 Samösa ba gotalua zawuyu gere sebua si fahatö ba niha nitaba Wetero talinga+ imane, ”Hadia tenga yaʼugö niʼilagu zi fao khönia ba kabu?” 27 Mangosilöʼögö zui Wetero, ba iʼanemaiʼö miwo zilatao.+
28 Aefa daʼö, iʼotarai khö Gayafa, laʼohe Yesu ba nomo gubernur.+ No moluo saʼae. Lö omasi möi ira bakha ba nomo gubernur enaʼö lö raʼiö ira+ ba tola fao ira wemanga gö ba Gowasa Fasa. 29 Möi baero Wilato, ifalukhaisi ira imane, ”Hadia niböbögömi khö niha daʼa?” 30 Lamane khönia, ”Na lö si fasala* niha daʼa, tatu lö maʼohe ia khöu.” 31 Imane Filato, ”Miʼohe manö ia, ba yaʼami zangetuʼö hukunia moloʼö huku khömi.”+ Lamane ira niha Yahudi, ”Lö nitehegö khöma ba wamunu niha.”+ 32 Börö zimanö, itörö niwaʼö Yesu hewisa dania na mate ia ba zi lö ara tö.+
33 Ifuli zui möi Wilato ba nomo gubernur, aefa daʼö ikaoni Yesu imane, ”Hadia Razo Niha Yahudi ndraʼugö?”+ 34 Itema linia Yesu, ”Hadia moroi ba dödöu samösa wanofumö andrö, mazui so zangombakha khöu sanandrösa khögu?” 35 Imane Filato, ”Tenga niha Yahudi ndraʼodo. Soimö samösa hegöi ira kafalo gere zameʼe yaʼugö ba dangagu. Hadia zi no öfalua?” 36 Imane Yesu,+ ”Tenga moroi ba gulidanö andre Wamatörögu.+ Na moroi ba gulidanö daʼa Wamatörögu, tatu no laforege ira enonigu enaʼö lö labeʼe ndraʼo ba danga niha Yahudi.+ Hizaʼi, sindruhu wa tenga moroi ba gulidanö andre Wamatörögu.” 37 Andrö imane khönia Filato, ”Na simanö, hadia sindruhu razo ndraʼugö?” Itema linia Yesu, ”Atulö, simane niwaʼömö.+ Hasambalö ufaduhuʼö zindruhu, andrö wa tumbu ndraʼo ba möido ba gulidanö.+ Dozi si faʼawö khögu ba zindruhu, lafondrondrongo wehedegu.” 38 Imane khönia Filato, ”Hadia zindruhu andrö?”
Me no aefa iwaʼö daʼö, möi ia baero ba wamalukhaisi ira niha Yahudi ba imane khöra, ”Lö hadöi sala nisöndragu ba niha daʼa.+ 39 Mendrua manö, moloʼö si toʼölö yaʼami, hasambalö uʼefasi samösa niha gurunga ero inötö Wasa.+ Hadia omasi ami uʼefasi Razo Niha Yahudi?” 40 Muʼao ira zui, ”Löʼö! Baraba manö efasi!” Baraba andrö sorabu.+