2 Moze

36 ”Falulu fohalöwö Mbesaleʼeli faoma Oholiabi awö zonekhe fatuka tanö böʼö. No ibeʼe khöra waʼatua-tua Yehowa hegöi fangiʼila enaʼö tola lafalua fefu halöwö soʼamakhaita ba naha niʼamoniʼö simane niʼoroisi Yehowa.”+

2 Ba mohede Moze khö Mbesaleʼeli, Oholiabi, awö zonekhe fatuka tanö böʼö si no ibeʼe faʼatua-tua+ Yehowa, ba si terou tödö ba wangai halöwö si fao faʼaoha gölö.+ 3 Itouʼö ba dangara Moze fefu gama-gama niʼamualagö+ ndraono Gizaraʼeli ba wamazökhi ngawalö niʼogunaʼö ba naha niʼamoniʼö. Ba lö laböhöli iraono Gizaraʼeli wolohe tolo-tolo si no aoha gölö, ero sihulö wongi möi lafasao khö Moze.

4 Me no labörögö wamalua halöwö niʼamoniʼö, lazara-zara waʼatohare 5 ba laʼondrasi Moze lamane, ”Abölö oya dolo-tolo nibeʼe ndraono Gizaraʼeli, töra moroi ba niʼogunaʼö ba halöwö niwaʼö Yehowa.” 6 Börö daʼö, iwaʼö Moze enaʼö labeʼe gangombakhata misa ba nose ndraono Gizaraʼeli: ”Böi miʼohe saʼae dolo-tolo soguna ba wamazökhi ose Lowalangi.” Ba laböhöli saʼae wolohe tolo-tolo andrö. 7 No tobönö dolo-tolo niʼohera ba wangasiwai fefu halöwö andrö, töra naʼi moroi ba niʼogunaʼö.

8 Fefu zonekhe ba wohalöwö,+ lafazökhi fulu ngawua nukha soguna ba nose Lowalangi.+ Lafazökhi nukha daʼö moroi ba nukha si sökhi fondrandra, bana sobalau, nukha si ungu laʼa-laʼa,* ba bana soyo.* Aefa daʼö, isuzi* gambara ndra kerubi ba nukha daʼö.+ 9 Ero sambua nukha 12,5 meter* waʼanau ba 1,8 meter* waʼebolo. Fagölö fefu waʼanau nukha daʼö hegöi faʼebolo. 10 Ifakhai nukha si lima ngawua enaʼö tobali sambua nukha sebolo, simane daʼö göi nukha si lima ngawua tanö böʼö. 11 Ifazökhi zi hulö galadanga moroi ba nukha sobalau ba zinga nukha sebolo andrö. Ibeʼe göi zimane daʼö ba nukha sebolo si sambua tö enaʼö tola mufakhai maʼadombua. 12 Ifazökhi 50 ngawua zi hulö galadanga ba nukha sebolo andrö, ba 50 ngawua zi hulö galadanga ba zinga nukha sebolo si sambua tö, irege na lafakhai dania ba faoma so dambalinia. 13 Ba gafuriata, ifazökhi 50 ngawua wamakhai moroi ba ganaʼa. Iʼogunaʼö daʼö ba wamakhai nukha sebolo si dombua andrö irege tobali sambua nukha soguna ba nose Lowalangi.

14 Ba ifazökhi 11 ngawua nukha moroi ba mbu nambi si tobali sagö nose Lowalangi andrö.+ 15 Ero sambua nukha 13,4 meter* waʼanau ba 1,8 meter* waʼebolo. Fagölö fefu waʼanau ba faʼebolo nukha si 11 ngawua andrö. 16 Ifakhai nukha si lima ngawua tobali sambua nukha sebolo, ba simane daʼö göi nukha si önö ngawua tö tobali sambua nukha sebolo. 17 Aefa daʼö, ifazökhi 50 ngawua zi hulö galadanga ba zinga nukha sebolo ba 50 ngawua zi hulö galadanga ba zinga nukha sebolo si sambua tö enaʼö tola mufakhai nukha si dombua andrö. 18 Ifazökhi 50 ngawua wamakhai moroi ba tembaga enaʼö teʼosambuaʼö nukha sebolo si dombua andrö.

19 Ifazökhi lagö-lagö nose Lowalangi moroi ba guli mbiri-biri si matua si no laʼoyoni ba lagö-lagö moroi ba guli nasu nasi nibeʼe yawa ba detenia.+

20 Ba ifazökhi döla-döla nose andrö moroi ba geu akasia.+ Iʼadölöʼö fefu wamasindro.+ 21 Ero sambua döla-döla faʼalawania 4,5 meter* ba faʼebolonia 67 sentimeter.* 22 Ero sambua döla-döla ifazökhi dombua gahe si falawa-lawa. Fefu döla-döla nose Lowalangi ifoʼahe simane daʼö. 23 Ifazökhi 20 rozi döla-döla soguna ba zinga nose Lowalangi sangotahögö tanö raya. 24 Ba döla-döla si 20 rozi andrö, ifazökhi 40 ngawua dane-dane si öfa sagi moroi ba wirö si no mufotögi; dombua dane-dane ero sambua döla-döla ba gahe si dua rozi andrö, ba simanö göi danö böʼö.+ 25 Ifazökhi 20 rozi döla-döla ba zinga nose Lowalangi sangotahögö tanö yöu 26 ba 40 ngawua dane-dane firö si no mufotögi, dombua dane-dane ero sambua döla-döla.

27 Ifazökhi önö rozi döla-döla+ tanö furi nose Lowalangi sangotahögö aekhula. 28 Ifazökhi dua rozi döla-döla sanuwu watalinga si dombua tanö furi nose Lowalangi. 29 Ba döla-döla daʼö so dua rozi geu iʼotarai moroi tou ofeta yawa si fatöfa ba zi hulö galadanga anaʼa siföföna. Daʼö nifazökhinia ba watalinga si dombua tanö furi nose Lowalangi. 30 Faʼoya döla-döla andrö walu rozi fefu ba 16 ngawua dane-dane firö si no mutögi, dombua dane-dane ero sambua döla-döla.

31 Aefa daʼö, ifazökhi mbaʼa-baʼa moroi ba geu akasia ba wamakhai döla-döla andrö fefu. Ifazökhi lima ngawua mbaʼa-baʼa ba zinga nose Lowalangi,+ 32 lima ngawua mbaʼa-baʼa gamaudu zinga si sambua, ba lima ngawua mbaʼa-baʼa sangotahögö aekhula, yaʼia daʼö tanö furi. 33 Fefu gotalua zinga nose Lowalangi, ifazökhi mbaʼa-baʼa nifariwa ba mbalö faföfö. 34 Ifoʼuli döla-döla andrö faoma anaʼa, ba ifazökhi zi hulö galadanga anaʼa ba wosaitagö baʼa-baʼania. Ifoʼuli göi mbaʼa-baʼa andrö faoma anaʼa.+

35 Ifazökhi mbaʼa-baʼa+ moroi ba nukha si sökhi si no mundrandra, bana sobalau, nukha si ungu laʼa-laʼa,* hegöi bana soyo. Ihaogö wosuzi gambara ndra kerubi+ ba nukha mbaʼa-baʼa daʼö.+ 36 Ifazökhi öfa rozi döla-döla moroi ba geu akasia ba ifoʼuli anaʼa. Tawi-tawinia göi ifazökhi moroi ba ganaʼa. Ifazökhi öfa ngawua dane-dane firö nifotögi ba döla-döla andrö. 37 Ifazökhi nukha mbaʼa-baʼa ba mbawandruhö nose Lowalangi. Ifazökhi moroi ba nukha si sökhi si no mundrandra, bana sobalau, nukha si ungu laʼa-laʼa,* hegöi bana soyo.+ 38 Ba nukha mbaʼa-baʼa andrö, ifazökhi lima rozi döla-döla awö dawi-tawi. Ifoʼuli anaʼa ero sara döla-döla gamaudu tanö yawa awö wamakhainia,* hizaʼi dane-dane si lima ngawua si no mufotögi ifazökhi moroi ba tembaga.