Nisura Luka
15 Fefu zanugi pajak hegöi sebua horö, owulo ira ba zi fasui Yesu ba wamondrondrongo huhuonia.+ 2 Börö daʼö, latahigö ia ira Farizaiʼo hegöi sangila amakhoita, ”Itema niha sebua horö ba falulu manga ira.” 3 Aefa daʼö, itutunö khöra Yesu gamaedola daʼa, 4 ”Na so ba gotaluami zokhö biri-biri 100 ngaʼeu, ba sageu zi taya, hadia lö iröi zi 99 ngaʼeu ba mbenua ba möi iʼalui zi taya andrö irege isöndra?+ 5 Me no isöndra, ihalö ba iʼangalisigö si fao faʼomuso dödö. 6 Me irugi nomo, ikaoni ndra awönia hegöi si faola omo khönia imane, ’Aine taʼomusoiʼö dödöda, börö me no usöndra mbiri-birigu si no taya.’+ 7 Ufatunö khömi, hulö simane daʼö zi samösa niha sebua horö samalalini era-era,+ tobali ia faʼomuso dödö sebua ba zorugo moroi ba zi 99 niha satulö si lö moguna famalalini era-era.
8 ”Mazui, na so ndra alawe sangokhögö si fulu kefe loga firö* ba no taya sambua, hadia lö itunu wandru, ibözini fefu nomonia ba ihaogö wangalui irege isöndra? 9 Me no isöndra, ikaoni ndra awönia* hegöi si faola omo khönia imane, ’Aine taʼomusoiʼö dödöda, börö me no usöndra gefegu* si no taya.’ 10 Ufatunö khömi, simane daʼö waʼomuso dödö ndra malaʼika Lowalangi ba zorugo na so samösa niha samalalini era-erania.”+
11 Aefa daʼö imane Yesu, ”So samösa niha, darua khönia nono matua. 12 Ono siakhi imane khö namania, ’He Pa, hezo dana khögu ba harato andrö.’ Ibagi haratonia amania ibeʼe ba nononia si darua. 13 Hauga hari aefa daʼö, iʼowuloi fefu haratonia ono siakhi andrö, mofanö ia ba danö saröu. Ba daʼö ihorigö gokhötania ba wamalua si lö sökhi. 14 Me no ahori gefenia, alua göi mbaŵa lofo ba mbanua daʼö ba aekhu numana ia. 15 Iʼandrö halöwönia ba niha sowanua ba daʼö, ba ifatenge ia wanaro bawi ba mbenua.+ 16 Börö waʼolofonia, iʼa menaʼö wöfö gö mbawi andrö famoʼösi dalunia. Hizaʼi, lö hadöi sameʼe önia.
17 ”Ba gafuriata maniasa ia imane, ’Fefu zohalöwö khö namagu fahöna göra, hizaʼi arakhagö mate ndraʼo waʼolofo ba daʼa! 18 Ulau mofanö ba mangawulido khö namagu umane khönia, ”He Pa, no fasala ndraʼo föna Lowalangi* hegöi fönau. 19 Tenga sinangea saʼae latötöi ndraʼo onomö. Fataro ndraʼo tobali sohalöwö khöu.”’ 20 Lö ara, mofanö ia mangawuli khö namania. Me iʼila ia amania moroi ba zaröu, tumbu khönia waʼahakhö dödö. Fagohi namania, italagui ba ihaogö woʼuma. 21 Imane ononia, ’He Pa, no fasala ndraʼo föna Lowalangi hegöi fönau.+ Tenga sinangea saʼae latötöi ndraʼo onomö.’ 22 Imane amania khö ndra sawuyunia, ’Aliokö! Mihalö mbaru sebua fondrege zi sökhi, mibeʼe khönia. Mibeʼe ba durunia laeduru ba sandrala ba gahenia. 23 Mitaba nono zawi satabö. Talau manga ba taʼowasaini daʼa, 24 börö me no mate nonogu andre ba no ifuli auri;+ no taya hizaʼi ifuli tesöndra.’ Ba ibörögö omuso dödöra.
25 ”Ba ginötö daʼö, ba mbenua so nononia siaʼa. Me mangawuli ia ba ahatö irugi nomo, irongo-rongo li zanunö ba sanari-nari. 26 Ikaoni samösa zohalöwö khöra ba manofu ia hadia zalua. 27 Imane sohalöwö khöra, ’No mangawuli nakhimö, ba no itaba nono zawi satabö bapamö, börö me no mangawuli nakhimö* ba lö hadia ia khönia.’ 28 Hizaʼi, mofönu sibai ia ba lö möi ia yomo. Aefa daʼö tohare namania, iʼandrö enaʼö möi ia yomo. 29 Imane khö namania, ’No hauga fakhe mohalöwö ndraʼo khöu simane sawuyu, ba maʼifu na no ulawa wehedemö. Hizaʼi, lö irai ötaba ögu nono nambi enaʼö omuso dödögu khö ndra awögu. 30 Ba me mangawuli siʼaikö nonomö andrö, si no mangohori haratomö ba ndra alawe sohorö-horö, ötaba önia nono zawi satabö.’ 31 Imane amania, ’He onogu, lö si tebulö faoʼö khögu. Fefu gokhötagu ba tobali okhötau. 32 Hizaʼi, hasambalö taʼowasaini daʼa ba taʼomusoiʼö dödöda, börö me no mate nakhimö ba no ifuli auri; no taya hizaʼi ifuli tesöndra.’”