2 Moze
24 Imane Yehowa khö Moze, ”Miʼaeʼe ba hili daʼö, yaʼugö, Aʼaroni, Nadabi, Abihu,+ ba 70 zondröniaʼö iraono Gizaraʼeli. Miʼangalulu khögu moroi ba zaröu. 2 Ha yaʼugö zi tola mangondrasi Yehowa, tanö böʼönia tebai. Tebai möi yawa ba hili ndraono Gizaraʼeli tanö böʼö.”+
3 Ba ifatunö Moze ba niha mbanua andrö fefu wehede ba angetula huku Yehowa.+ Fao dödö niha sato ba lamane, ”Omasiga maʼoʼö fefu niwaʼö Yehowa.”+ 4 Isura Moze fefu wehede Yehowa.+ Aefa daʼö, maoso ia ba zihulö wongi ba ifazökhi naha wanunu sumange ba gahe hili. Ifasindro göi 12 gara fanörö tödö moloʼö faʼato mado ndraono Gizaraʼeli si 12. 5 Ba iwaʼö ba ndraono matua Gizaraʼeli andrö enaʼö labeʼe zumange nitunu ba mato hauga ngaʼeu zawi si matua tobali sumange fangatulö+ khö Yehowa. 6 Ba ihalö zi matonga ndro zumange andrö Moze, ifaduwa ba mako, ba si matongania itefeʼö yawa ba naha wanunu sumange. 7 Lö ara, ihalö mbuku gamabuʼula li ba ibaso föna niha sato.+ Ba lamane, ”Omasiga maʼoʼö ba mafalua fefu niwaʼö Yehowa.”+ 8 Itefeʼö ndro zumange andrö Moze ba soi daʼö+ ba imane, ”Daʼa ndro wawuʼusa li nifazökhi Yehowa khömi moloʼö fehede nirongomi mege.”+
9 Möi Moze miyawa ba hili, Aʼaroni, Nadabi, Abihu, ba 70 zondröniaʼö iraono Gizaraʼeli 10 ba laʼila Lowalangi ndraono Gizaraʼeli.+ Barö gahenia hulö so zalo nifaʼanö moroi ba gara safiro, mohaga simane faʼobalau dalu mbanua.+ 11 Me manga ba mamadu idanö ndra sondröniaʼö iraono Gizaraʼeli,+ alua khöra gangilata sanandrösa khö Lowalangi sindruhu. Ba lö ifosikho ira Lowalangi.
12 Imane Yehowa khö Moze, ”Aeʼe miyawa ba hili ba wangondrasi yaʼo, ba daʼö manö iagö. Ubeʼe khöu gara wanura. Usura ba gara andrö goroisagu awö gamakhoitagu si lö tola löʼö laʼoʼö soi daʼö.”+ 13 Ifaʼanö ia Moze hegöi Yosua sohalöwö khönia,+ ba möi Moze miyawa ba hili nifili Lowalangi sindruhu.+ 14 Hizaʼi, no iwaʼö Moze khö ndra sondröniaʼö, ”Mibaloi ba daʼa irege mangawuli ndraʼaga.+ So nawömi Aʼaroni hegöi Huri.+ Na so gamadöniwa sinangea muʼetuʼö, tola ifalukhaisi ami niha daʼö.”+ 15 Aefa daʼö, möi Moze miyawa ba hili si no tebalu lawuo.+
16 Lö tebulö so lakhömi Yehowa+ ba Hili Zinaʼi+ ba tebalu hili andrö ba lawuo ba zi önö hari. Ba ngaluo si fitu, ikaoni Moze moroi bakha ba lawuo andrö. 17 Ba wamaigi ndraono Gizaraʼeli, lakhömi Yehowa andrö hulö hola-hola galitö ba zuzu hili. 18 Möi Moze bakha ba lawuo si so ba zuzu hili.+ Ba daʼö toröi ia 40 ngaluo ba 40 wongi.+