Sara Korindro

8 Iadaʼa, sanandrösa ba gö nibeʼe sumange nadu:+ No aboto ba dödöda daʼö.+ Tola manö fayawa niha si so faʼaboto ba dödö andrö, hizaʼi faʼomasi zi tobali famarou dödö.+ 2 Na so zangumaʼö no aboto ba dödönia hadia ia, sindruhunia lö saboto ba dödönia fefu daʼö. 3 Hizaʼi na so zangomasiʼö Lowalangi ba aboto ba dödö Lowalangi ia.

4 Sanandrösa ba gö nibeʼe sumange nadu, aboto ba dödöda wa lö eluaha nadu+ andrö ba ha samösa Lowalangi.+ 5 Hewaʼae so nifotöi lowalangi, he ba zorugo, he ba gulidanö,+ oya sa ”lowalangi” ba ato ”zoʼaya”, 6 na ba khöda ha samösa Lowalangi,+ yaʼia daʼö Ama andrö.+ Yaʼia zamazökhi fefu hadia ia ba khönia auri ita.+ Ba ha samösa Zoʼaya, yaʼia daʼö Yesu Keriso. Fefu hadia ia tefazökhi ba khönia+ ba börö ia wa auri ita.

7 Hizaʼi, lö fefu niha aboto ba dödöra daʼa.+ Börö me sanömba adu ira mböröta, so ösa zi manga lamane tödöra föfö gö nadu daʼö,+ irege tetutu dödöra side-ide andrö sambö aro famati.+ 8 Sindruhunia lö möi fangahatöʼöda khö Lowalangi gö andrö.+ Lö rugi ita na lö taʼa, ba lö göi mohare ita na taʼa.+ 9 Miʼangelama, hewaʼae na tola mifalua hadia ia ba zomasi dödömi, böi tobali fangala khö ndra talifusö sambö aro famati.+ 10 Yaʼami si so faʼaboto ba dödö, na manga ami ba nahia wamosumange adu ba na iʼila ami niha sambö aro famati, hadia tenga no tedönisi dödönia irege iʼa gö nibeʼe sumange nadu? 11 Na simane daʼö, faʼaboto ba dödömi andrö möi fangala ba niha sambö aro famati, hewaʼae na talifusömi ia ba no mate Keriso salahinia.+ 12 Na fasala ami khö dalifusömi börö me mifalua daʼö irege tetutu dödönia side-ide sambö aro famati,+ no mosala ami khö Keriso. 13 Na tobali fangala khö dalifusögu gö si no uʼa, uböhöli wemanga nagole saʼae enaʼö lö tobali fangala khö dalifusögu.+