Sura Yohane Siföföna
2 He iraonogu, usura daʼa fefu enaʼö lö mifalua horö. Na so zamalua horö, so zanolo* yaʼita si fao khö Nama, yaʼia daʼö Yesu Keriso,+ samalua satulö.+ 2 Yaʼia andrö zumange fangatulö+ ba horöda,+ tenga ha ba horöda manö hizaʼi ba horö niha gulidanö maʼafefu.+ 3 Na lö taböhöli wamalua oroisania, daʼö dandra wa no aboto ba dödöda ia. 4 Na so zangumaʼö, ”No aboto ba dödögu ia,” ba na lö iʼoʼö goroisania, no si falimo daʼö ba lö hadöi sindruhu ba dödönia. 5 Niha soloʼö fehedenia, iforomaʼö wa sindruhu-ndruhu moʼahonoa waʼomasinia khö Lowalangi.+ Daʼö zangoromaʼö wa hasara dödöda khönia.+ 6 Niha sangumaʼö no hasara dödönia khö Lowalangi, moʼömö ia göi woloʼö amuata Yesu.+
7 Yaʼami ira talifusö niʼomasiʼö, tenga oroisa si bohou nisuragu khömi, hizaʼi oroisa si no ara, si no irai mitema me mböröta.+ No irai mirongo goroisa si tohöna andre. 8 Hewaʼae simanö, oroisa nisuragu andre no oroisa si bohou. No iʼoʼö goroisa daʼa Keriso hegöi yaʼami. Iadaʼa, arakhagö taya waʼogömi-gömi andrö ba humaga haga sindruhu andrö.+
9 Na so zangumaʼö ba haga so ia, ba na fatiu dödönia+ khö dalifusönia, ba zogömi-gömi+ so ia nasa irugi iadaʼa. 10 Niha sangomasiʼö talifusönia, ba haga so ia.+ Lö hadöi sinegu khönia si möi börö wangala. 11 Hizaʼi, niha si fatiu tödö khö dalifusönia no so ia ba zogömi-gömi.+ Börö me ogömi-gömi, andrö lö iʼila hezo isawa.+
12 Ufaʼoheʼö zura khömi yaʼami iraono, me no teʼefaʼö horömi börö döinia andrö.+ 13 Ufaʼoheʼö zura khömi ira ama, börö me no miʼila ia zi so andrö iʼotarai mböröta. Ufaʼoheʼö zura khömi yaʼami si bohou ebua, börö me no mikalaisi Zatana.*+ Ufaʼoheʼö zura khömi yaʼami iraono side-ide, börö me no aboto ba dödömi Namada Lowalangi.+ 14 Ufaʼoheʼö zura khömi ira ama, börö me no miʼila ia zi so andrö iʼotarai mböröta. Ufaʼoheʼö zura khömi yaʼami si bohou ebua, börö me lö mangiwa ami+ ba lö tebulö khömi daromali Lowalangi+ ba no mikalaisi Zatana.*+
15 Böi miʼomasiʼö gulidanö hegöi ösinia maʼafefu.+ Na so zangomasiʼö ulidanö, lö fangomasiʼö Ama ba dödönia,+ 16 börö me fefu zi so ba gulidanö andre simane faʼomasi nösi,+ faʼomasi hörö,+ ba fohöni-höni okhöta, tenga moroi khö Nama, hizaʼi moroi ba gulidanö. 17 Si taya nösi gulidanö awö waʼomasinia andrö,+ ba soloʼö somasi Lowalangi auri sagötö faʼara.+
18 He yaʼami iraono, inötö safuria daʼa. No mirongo wa tohare zi faʼudu khö Keriso.+ Iadaʼa manö, ato zi faʼudu khö Keriso.+ Ba daʼö taʼila wa no so ita ba ginötö safuria. 19 Fao ira khöda mege, ba laheta ira börö me faböʼö ira moroi khöda.+ Na fao ira khöda, tatu so ira ba gotaluada. Hizaʼi, laheta ira enaʼö oroma wa tenga simane yaʼita fefu niha.+ 20 No ifataro ami Niʼamoniʼö andrö,+ ba ahori so khömi waʼaboto ba dödö. 21 Usura khömi daʼa tenga börö me lö aboto ba dödömi zindruhu,+ hizaʼi börö me no miʼila ba lö hadöi falimosa si otarai zindruhu.+
22 Haniha zi falimo andrö na tenga sangositengagö wa Yesu andrö Keriso?+ Sangositengagö Ama hegöi Ono, daʼö zi faʼudu khö Keriso.+ 23 Haniha zi lö manemaʼö Ono, ba lö itemaʼö ia Ama.+ Hizaʼi, haniha zamaduhuʼö Ono,+ ba itema ia göi Ama.+ 24 Hadia zi no mirongo ba wamobörö, böi tebulö daʼö ba dödömi.+ Na lö tebulö ba dödömi zi no mirongo ba wamobörö, lö tebulö hasara dödömi khö Nono hegöi khö Nama. 25 Daʼa nifabuʼu Lowalangi khöda yaʼia daʼö faʼauri si lö aetu.+
26 Usura khömi zura andre börö me so niha sangalui lala ba wamaelungu yaʼami. 27 No ibayoini ami Lowalangi faoma ehehania,+ ba lö tebulö khömi daʼö irege lö saʼae sinangea mamahaʼö yaʼami. Atulö wombayoini andrö, tenga faya, daʼö zamahaʼö yaʼami fefu hadia ia.+ Simane si no ifahaʼö, böi tebulö hasara dödömi khönia.+ 28 Börö daʼö yaʼami iraono, böi tebulö hasara dödömi khönia enaʼö lö aiwö ita wahuhuosa na iforomaʼö ia,+ ba lö aila ita irege fandröndröu na tohare ia. 29 Aboto ba dödömi wa sindruhu ia, ba aboto göi ba dödömi wa niha samalua sindruhu, daʼö nono Lowalangi.+