Nisura Mareko
12 Ibörögö fahuhuo Yesu ba niha si fao amaedola, ”So niha samazökhi kabu nagu,+ ikölini fasui, ihaogö naha wamera agu ba ifasindro malige zanaro.+ Aefa daʼö, ifaʼokosiʼö ba niha sohalöwö ba danö ba mofanö ia ba danö saröu.+ 2 Me irugi inötö wamasi, ifatenge samösa zawuyunia khö ndra sohalöwö ba wangai ösa bua nagu andrö tana khönia. 3 Hizaʼi, laraʼu zawuyunia andrö, laböbözi, ba lafofanö ia lö noro danga. 4 Ifuli ifatenge zawuyunia tanö böʼö, hizaʼi labözi högö zawuyu andrö ba laʼailasi ia.+ 5 Ifatenge zui zawuyu tanö böʼö, hizaʼi labunu. Ato zui nifatengenia sawuyu aefa daʼö, hizaʼi so ösa niböbözi ba so göi nibunura. 6 Hatö samösa tö zi toröi, yaʼia daʼö ono niʼomasiʼönia.+ Ba gafuriata ifatenge nononia andrö khöra imane, ’Tatu laʼataʼufi nonogu andre.’ 7 Hizaʼi, faoma lamane khö nawöra ira sohalöwö ba danö andrö, ’Yaʼia zangokhögö kabu daʼa dania.+ Aine, tabunu ia ba möi khöda gokhötania.’ 8 Laraʼu ia ba labunu. Aefa daʼö, lafazaumba baero ba kabu nagu.+ 9 Hadia zedöna ifalua sokhö kabu nagu andrö? Tohare ia ibunu fefu zohalöwö daʼö, ba ibeʼe kabunia ba niha böʼö.+ 10 Hadia lö irai mibaso ba zura? ’Kara nitimbagö zamazökhi omo, no tobali kara* sabölö moguna.+ 11 Moroi khö Yehowa* daʼö ba sahöli-höli dödöda.’”+
12 Me larongo daʼö ira sondröniaʼö ba agama, edöna laraʼu Yesu börö me laʼila wa khöra manandrösa gamaedola daʼö. Hizaʼi, ataʼu ira niha sato, andrö laröi ia.+
13 Aefa daʼö lafatenge ösa ndra Farizaiʼo hegöi si faʼawö khö Herode. Laʼondrasi Yesu enaʼö teʼala samösa ia ba wehedenia.+ 14 Me larugi, manofu ira khönia, ”He Samahaʼö, aboto ba dödöma wa sindruhu na mohedeʼö, ba lö omasi ndraʼugö na lasunoʼö niha börö me lö öfaigi mbawa niha. Hizaʼi, sindruhu wangombakhaʼöu lala Lowalangi andrö. Iadaʼa, hadia tola tabuʼa pajak khö Kaisaro? 15 Tabuʼa ma löʼö?” Aboto ba dödö Yesu wa samini tödö ira, andrö imane, ”Hana wa mitandraigö ndraʼo? Miʼohe khögu ba daʼa sambua loga dinar,* daʼufaigi.” 16 Labeʼe khönia ba imane, ”Gambara haniha daʼa ba haniha döinia?” Latema linia, ”Kaisaro.” 17 Aefa daʼö imane, ”Mibeʼe khö Kaisaro tana khö Kaisaro,+ ba khö Lowalangi tana khö Lowalangi.”+ Ahöli-höli dödöra ba wamondrongo fehedenia.
18 Aefa daʼö tohare ndra Sadukaiʼo si lö faduhu tödö ba wanusugi si mate.+ Laʼondrasi ia ba manofu ira,+ 19 ”He Samahaʼö, moloʼö huku Moze, na so ndra matua si no mate si lö ono, gaʼania mazui akhinia zangai foʼomonia ira alawe, enaʼö mongaʼötö dalifusöra matua andrö.+ 20 So dafitu ndra matua si fatalifusö. Mangowalu ziaʼa ba no mate, lö ngaʼötönia. 21 Aefa daʼö ganetenia ihalö woʼomo gaʼania, hizaʼi mate zui daʼö lö ngaʼötö. Numero tölu göi simane daʼö. 22 Mate fefu zi dafitu andrö lö ngaʼötö, ba gafuriata göi mate ndra alawe daʼö. 23 Na tesusugi zi no mate dania, haniha woʼomo ndra alawe daʼö? Börö me no irai tobali foʼomonia ndra matua si dafitu andrö.” 24 Itema lira Yesu, ”Lö aboto ba dödömi Mbuku Niʼamoniʼö hegöi faʼabölö Lowalangi, daʼö wa fasala sibai ami.+ 25 Ba ginötö wanusugi niha si no mate dania, lö mangowalu ndra matua mazui tebeʼe nihalö ndra alawe. Hizaʼi, tobali ira simane malaʼika ba zorugo.+ 26 Sanandrösa ba wanusugi si no mate, hadia lö irai mibaso zalua ba gotalua ndruʼu sodoi nisura ba mbuku Moze? Me luo daʼö imane Lowalangi khö Moze, ’Lowalangi Gaberahamo ndraʼo, Lowalangi Gizaʼaki, ba Lowalangi Yakobo.’+ 27 Yaʼia andrö Lowalangi niha sauri, tenga Lowalangi niha si no mate. Fasala sibai ami.”+
28 Samösa zangila amakhoita si tohare me irongo fabuʼa-buʼa ira. Aboto ba dödönia wa enahöi me itema lira Yesu. Börö daʼö manofu ia, ”Hadia goroisa sabölö ebua* moroi ba ngawalö goroisa fefu?”+ 29 Imane Yesu, ”Daʼa zabölö moguna: ’Mifondrondrongo yaʼami iraono Gizaraʼeli! Yehowa* andrö Lowalangida, Yehowa* andrö ha samösa, 30 ba omasiʼö Yehowa* Lowalangiu moroi siʼaikö ba dödöu, nosou* maʼasambua, era-erau ba faʼabölöu maʼafefu.’+ 31 Oroisa si dua yaʼia daʼö, ’Omasiʼö nawöu simane faʼomasiu ndraʼugö.’+ Daʼö zi dombua goroisa sabölö ebua.” 32 Imane sangila amakhoita andrö, ”Sökhi sibai wanema limö Samahaʼö, tefaudu ba zindruhu wa ’ha samösa Lowalangi andrö ba lö Lowalangi tanö böʼö baero ia’.+ 33 Ba fangomasiʼö yaʼia moroi siʼaikö ba dödö, era-era ba faʼabölöda maʼafefu hegöi fangomasiʼö awö simane fangomasiʼöda yaʼita, abölö moguna daʼö moroi ba wameʼe sumange nitunu ba sumange tanö böʼö.”+ 34 Börö me onekhe ndra matua daʼö wanema li, imane khönia Yesu, ”Ahatö ndraʼugö ba Wamatörö Lowalangi.” Aefa daʼö, samösa lö si barani wanofu khö Yesu saʼae.+
35 Me mamahaʼö ia ba gosali, manofu Yesu, ”Hana wa lawaʼö ira sangila amakhoita, Keriso andrö maʼuwu Dawido?+ 36 Niʼabölöʼö geheha Lowalangi+ Dawido me imane, ’No iwaʼö Yehowa* khö Zoʼaya yaʼo, ”Dadao ba gambölögu irege ubeʼe tou barö gaheu zi faʼudu khöu.”’+ 37 Dawido manö ikaoni khönia Soʼaya, tobali hewisa wa tobali maʼuwu Dawido Keriso andrö?”+
Omuso dödö niha sato me larongo daʼö. 38 Imane Yesu me mamahaʼö ia, ”Miʼangelama khö ndra sangila amakhoita andrö samangörö-ngörö yaʼira, samake baru sebua sanau ba omasi ira nifosumange ba nahia sato niha,*+ 39 ba omasi ira modadao ba gurusi tanö föna* ba nahia waʼowulo* hegöi nahia si sökhi ba gowasa.+ 40 Larabu nomo* lakha mbanua, ba laʼanauʼö wangandrö enaʼö laʼila ira niha. Latema dania hukuma sabölö ebua ira niha daʼö.”
41 Aefa daʼö, modadao Yesu iʼotahögö naha wameʼe tolo-tolo,+ inehe-nehegö niha sameʼe kefe ba daʼö. Ato niha si kayo zameʼe kefe sebua.+ 42 Aefa daʼö, so samösa lakha mbanua sameʼe si dombua loga side-ide böli.*+ 43 Ikaoni ndra nifahaʼönia Yesu ba imane khöra, ”Sindruhu niwaʼögu khömi, abölö ebua nibeʼe lakha mbanua andre moroi khö ndra niha daʼö sameʼe kefera ba naha dolo-tolo.+ 44 Labeʼe zi töra moroi ba gokhötara. Hizaʼi, hewaʼae numana lakha mbanua daʼö, no ibeʼe fefu gefenia böli zoguna khönia menaʼö.”+