Ba Mbanua Niha Keriso ba Roma
2 Gofu haniha ami,+ na mihuku nawömi lö teʼefaʼö zalami. Na mihuku nawömi, no mihuku ami samösa börö me lö miböhöli wamalua daʼö.+ 2 Aboto ba dödöda wa ihuku Lowalangi niha si lö mamöhöli wamalua daʼö. Fanguhuku satulö wanguhukunia.
3 Mihuku niha si lö mamöhöli wamalua daʼö, ba yaʼami samösa mifalua göi. Hadia miwalinga tola teʼefaʼö ami moroi ba wanguhuku Lowalangi? 4 Hadia miʼositengagö waʼasökhi dödö,+ fanaha tödö,+ ba faʼebolo dödö+ Lowalangi si no fahöna, börö me lö aboto ba dödömi wa si fao faʼasökhi dödö itolo ami Lowalangi enaʼö mifalalini gera-erami?+ 5 Börö me abeʼe högömi ba lö mifalalini gera-erami, mihöna khömi wönu Lowalangi salua dania ba luo wanguhuku satulö.+ 6 Idozigö dania niha wanulöni bua-buara zamösana.+ 7 Niha sangalui lakhömi ba sumange, sanau ölö ba wamalua si sökhi, isöndra waʼauri si lö aetu ba boto si lö tekiko,+ 8 ba niha somasi fakara ba si lö moloʼö sindruhu, ba na iʼoʼö zi fasala, göna ia fanguhuku ba fönu Lowalangi.+ 9 So dania wamakao ba faʼabu dödö salua ba niha samalua si lö sökhi. Si oföna ba niha Yahudi, aefa daʼö ba niha Yunani. 10 Dozi niha samalua si sökhi, latema lakhömi, sumange ba faʼohahau dödö. Si oföna ba niha Yahudi+ aefa daʼö ba niha Yunani.+ 11 Lö ebua dödö zambuana Lowalangi.+
12 Dozi niha samalua horö si lö mangila oroisa, mate göi ia hewaʼae lö iʼila goroisa,+ hizaʼi dozi niha samalua horö ba si no teböbö ba goroisa, laʼetuʼö khönia huku moloʼö oroisa.+ 13 Satulö moloʼö Lowalangi tenga samondrongo oroisa, hizaʼi samalua oroisa.+ 14 Na lafalua niwaʼö ba goroisa yaʼira soi böʼö hewaʼae lö khöra oroisa,+ eluahania so goroisa ba dödöra. 15 Laforomaʼö wa no tesura ba dödöra goroisa andrö. Tödöra side-ide zamaduhuʼö khöra ba fangera-ngerara zamatunö khöra na fasala ira mazui löʼö. 16 Ba ngaluo wanguhuku moloʼö turia somuso dödö niʼombakhaʼögu, Keriso Yesu niʼogunaʼö Lowalangi ba wanguhuku ngawalö nibiniʼö niha.+
17 Lafotöi ami niha Yahudi,+ sangodaligö oroisa, ba omuso dödömi me no tobali ami ono mbanua Lowalangi, 18 ba omasi ami miʼila gohitö dödönia ba miʼila mifaehusi hadia zabölö moguna börö me no tefahaʼö ami ba Goroisa Moze,+ 19 ba faduhu dödömi wa yaʼami zolohe tanga zauʼa, sohagaini niha si so ba zogömi-gömi, 20 samahaʼö niha si bodo, samomaha iraono side-ide, sangokhögö faʼatua-tua sanandrösa ba zindruhu hegöi faʼaboto ba dödö ba Goroisa Moze. 21 Mifahaʼö sa niha böʼö, ba hana wa lö mifahaʼö ami samösa?+ Miwaʼö, ”Böi anagö,”+ hizaʼi hana wa managö ami? 22 Yaʼami samösa zangumaʼö, ”Böi miʼohorö,”+ ba hana wa mohorö ami? Anuzu dödömi nadu, ba hana wa mirabu nomo-omo nadu? 23 Omuso dödömi ba goroisa, tobali hana wa miʼoʼaya Lowalangi ba misawö Goroisa Moze? 24 Itörö ayati si no tesura, ”Börö ami wa teʼoʼaya döi Lowalangi ba soi böʼö.”+
25 Sindruhunia moguna wosuna andrö+ na mifalua goroisa.+ Hizaʼi, na misawö goroisa, fagölö ami niha si lö nisuna. 26 Na ifalua goroisa Lowalangi niha si lö nisuna+ moloʼö Oroisa Moze, hadia lö lafotöi ia niha si no lasuna?+ 27 Börö me no ifalua Goroisa Moze, niha si lö lasuna andrö zanguhuku yaʼami börö me so khömi goroisa si no tesura ba no lasuna ami, hizaʼi lö nifaluami oroisa andrö. 28 Tenga börö waʼasökhi mboto+ mazui me no lasuna wa tobali niha Yahudi sindruhu zi samösa niha.+ 29 Hizaʼi, tobali ia niha Yahudi sindruhu börö dödönia.+ Tödönia nisuna+ moloʼö eheha niʼamoniʼö, tenga börö goroisa si no tesura.+ Itema wanuno moroi khö Lowalangi, tenga moroi ba niha.+