Halöwö Zinenge
19 Gasa-gasa weʼaso Afolo+ ba Gorindro, iʼanöröi mbanua side-ide Faulo ba ofeta ia ba Nefeso.+ Ba daʼö falukha ia ndra nifahaʼö 2 ba manofu ia, ”Hadia no mitema geheha niʼamoniʼö me awena faduhu dödömi?”+ Latema linia, ”Lö irai marongo wa so geheha niʼamoniʼö.” 3 Börö daʼö manofu ia, ”Na simane daʼö, hewisa wombayagö yaʼami idanö?” Latema li, ”Moloʼö famayagö idanö Yohane.”+ 4 Imane Faulo, ”Ibayagö idanö niha Yohane tandra wamalalini era-erara,+ ba ifatunö khöra enaʼö faduhu dödöra ba niha si tohare aefa ia,+ yaʼia daʼö Yesu.” 5 Me larongo daʼö, labayagö ira idanö ba döi Zoʼaya Yesu. 6 Me itufa högöra Faulo, latema geheha niʼamoniʼö.+ Ibörögö fahuhuo ira ba li tanö böʼö ba mamaʼeleʼö ira.+ 7 So mato 12 niha ndra matua waʼato.
8 Sagötö ba zi tölu waŵa, lö iböhöli weʼamöi ba nahia waʼowulo*+ ba lö ataʼu ia fahuhuo. Ifaʼema göi huhuo sebua ba idunö-dunö enaʼö faduhu dödöra ba Wamatörö Lowalangi.+ 9 Hizaʼi, me so zabeʼe högö* si lö faduhu tödö, laʼoʼaya Lala Zoʼaya+ föna niha sato, ba mofanö ia, ifabali ndra nifahaʼö moroi khöra.+ Ero maʼökhö, ifaʼema huhuo sebua ba nahia waʼowulo ba sekola Dirano. 10 Dua fakhe ifalua daʼö, irege fefu niha ba Provinsi Asia, niha Yahudi hegöi niha Yunani ahori larongo daromali Lowalangi.*
11 Lö iböhöli Lowalangi wangogunaʼö Faulo ba wamalua tandra safönu faʼabölö ba sahöli-höli dödö.+ 12 Lua-luania, safu tanga hegöi nukha si no irai ifake, laʼohe ba niha sofökhö+ ba tola möi famofanö malaʼika si lö sökhi ba döhö ira.+ 13 Hizaʼi, so göi ösa niha Yahudi soʼanöröi banua ba wamofanö malaʼika si lö sökhi, latandraigö göi laʼogunaʼö döi Zoʼaya Yesu ba wamofanö malaʼika si lö sökhi si no fatewu ba niha. Lamane, ”Ba döi Yesu nituriaigö Waulo, uwaʼö khömi, miheta ami.”+ 14 Dafitu nono gere sebua ba niha Yahudi sotöi Sikoia, zamalua daʼö. 15 Imane khöra malaʼika si lö sökhi andrö, ”Uʼila haniha Yesu,+ ba uʼila haniha Waulo.+ Hizaʼi, haniha ami andrö?” 16 Ba zi lö mudöna-döna, manaoka niha nifakao malaʼika si lö sökhi andrö ba wondraʼu yaʼira. Ilawa ira irege lalau moloi lö nukha* ba oi mesokho. 17 Oi laʼila zalua andre niha Yahudi hegöi niha Yunani si toröi ba Nefeso, irege ataʼu ira ba monönö tefolakhömi döi Zoʼaya Yesu. 18 Ato niha si no faduhu tödö, tohare ira lafaduhuʼö ba laʼombakhaʼö föna niha sato fefu gamuata si lö sökhi si no lafalua. 19 Ato ba gotaluara mböröta zi fakelemu, laʼowuloi mbukura ba latunu föna niha sato.+ Me no laʼerai mbölinia, tesöndra 50.000 firö waʼebua. 20 Börö daʼö, itugu tehöngö ba monönö waʼabölö daromali Yehowa* misa si fao faʼahöli-höli dödö.+
21 Me no aefa alua daʼö fefu, ihalö gangetula Faulo wa mangawuli ia ba Yeruzalema+ na no aefa möi ia ba Makedonia+ hegöi ba Nakhaya. Imane, ”Moroi ba daʼö uʼotarai weʼamöi ba Roma.”+ 22 Andrö ifatenge darua zi toʼölö fao khönia yaʼia daʼö Timoteo+ ba Eraso,+ ba yaʼia samösa toröi ia sabata ba Provinsi Asia.
23 Me luo daʼö, alua waʼakaliru sabölö-bölö+ soʼamakhaita ba Lala Zoʼaya.+ 24 So samösa ndra matua sotöi Demeterio, samazökhi nahia wamosumange Aritemi moroi ba wirö, ba tobali fangalui sebua daʼö ba zohalöwö khönia.+ 25 Iʼowuloi ira hegöi sohalöwö tanö böʼö imane, ”He kawa, no aboto ba dödömi wa tasöndra zoguna khöda moroi ba halöwö daʼa. 26 Iadaʼa no mirongo ba miʼila samösa wa ifaweʼe niha Faulo tenga ha ba Nefeso,+ hizaʼi arakhagö fefu zi sambua Provinsi Asia, enaʼö faduhu dödöra wa lowalangi nifazökhi danga niha sindruhunia tenga lowalangi.+ 27 Alai ia andre, tola manö alö wangaluida ba obou döida ba niha, ba lö eluaha ba dödö niha saʼae nahia wamosumange Aritemi, ba taya lakhömi lowalangi* nisömba ba zi sagörö Provinsi Asia hegöi ba zi sagörö ulidanö.” 28 Me larongo daʼö, itugu mofönu ira ba muʼao-ao, ”Sebua kuaso Aritemi, lowalangi niha Efeso!”
29 Kaliru fefu mbanua daʼö, ba laʼosamuzaigö ira weʼamöi bakha ba nahia wanoto niha sato,* lafaso wolohe Gayo faoma Arisaro,+ niha Makedonia si fao khö Waulo ba lala. 30 Sindruhunia, omasi Waulo wamalukhaisi niha sato andrö, hizaʼi lö latehe khönia ira nifahaʼö. 31 So ösa niha si fahuwu, sohalöwö ba gowasa fatandrisa andrö zameʼe fehede khönia, enaʼö böi möi ia bakha ba nahia andrö faböi mosikho ia. 32 So ösa ziʼao simane daʼa, tanö böʼö simane daʼö. Itugu kaliru niha ba ato zi lö mangila hadia mbörö wa owulo ira. 33 Lafarou Alesandro fahuhuo börö me yaʼia nilulugö niha Yahudi tanö föna. Aefa daʼö, ifazawa dangania tandra wa so zinangea iwaʼö. 34 Hizaʼi me laʼila ia wa niha Yahudi, ibörögö muʼao ira mato dua za waʼara ba endronga lira wangumaʼö, ”Sebua kuaso Aritemi, lowalangi niha Efeso!”
35 Ba gafuriata, ifahono niha sato wali kota imane, ”Yaʼami niha Efeso, haniha zi lö mangila wa banua Efeso andre zozago nahia wamosumange Aritemi solakhömi awö nadunia andrö, satoru moroi ba dalu mbanua? 36 Börö me tebai mulawa daʼa, mihonogö ami ba böi milau-lau manö. 37 Niha niʼohemi ba daʼa lö nitagöra nahia wamosumange mazui laʼoʼaya lowalangida.* 38 Tobali, na so zi lö fao dödö Demeterio+ hegöi ira sohalöwö khö zi samösa niha, so ndra gubernur* ba ginötö wanguhuku. Akha ba daʼö laʼangadugö nawöra. 39 Hizaʼi na so danö böʼö zomasi ami nasa, ba gödo zanguhuku muʼetuʼö daʼö. 40 Alai na mosikho ita zalua ba zi maʼökhö andre. Tola manö labaliʼö ita samobörö horö, börö me lö taʼila tabeʼe wanema li hana wa owulo niha si kaliru andre.” 41 Me no aefa iwaʼö daʼö, ifofanö niha sato.