Sara Korindro
14 Miʼodödögö wamalua faʼomasi, ba böi miböhöli wanöndra* buala moroi khö Lowalangi, mendrua manö nasa ba wamaʼeleʼö.+ 2 Niha si fahuhuo ba li böʼö, fahuhuo ia khö Lowalangi tenga ba niha. Hewaʼae na fahuhuo ia sanandrösa ba zi tobini niʼamoniʼö+ börö geheha, lö hadöi samondrongo.+ 3 Niha samaʼeleʼö tola ifarou dödö niha böʼö, itolo, ba irara dödö niha faoma fehedenia. 4 Niha si fahuhuo ba li böʼö, ha yaʼia samösa iʼaroʼö, hizaʼi niha samaʼeleʼö iʼaroʼö dödö mbanua niha Keriso. 5 Omasi ndraʼo na fahuhuo ami fefu ba li böʼö,+ ba abölö omasido nasa na mamaʼeleʼö ami.+ Abölö sökhi na mamaʼeleʼö moroi na fahuhuo ami ba li böʼö, hatö na so zamoʼeluaha irege teʼaroʼö mbanua niha Keriso. 6 He yaʼami ira talifusö, na tohare ndraʼo ba fahuhuodo ba li böʼö, hadia gunania khömi? Enaʼö so gunania, abölö sökhi na fahuhuo ndraʼo si fao faʼaboto ba dödö,+ famaʼeleʼö, famahaʼö mazui hadia niʼombakhaʼö Lowalangi.+
7 Simane ngawalö wakake zinunö, duma-dumania surune mazui harafa, na ha sambua note niʼasogönia, hewisa wa laʼila niha hadia zinunö niʼanunöisinia? 8 Na lö tatu li dorofe, haniha zamaʼanö yaʼia ba wanuwö? 9 Simanö göi na lö laʼila geluaha wehedemi, hewisa wa aboto ba dödö niha hadia niwaʼömi? Hulö fahuhuo ami ba dalu mbanua. 10 Oya sibai ngawalö li ba gulidanö andre, hizaʼi oi so geluahania. 11 Na lö aboto ba dödögu hadia niwaʼö zi samösa niha, hulö niha böʼö ia ba wamaigigu, ba simanö göi ndraʼo ba wamaiginia. 12 Simanö göi ami. Börö me omasi ami mbuala moroi khö Lowalangi, miforege wangalui enaʼö fahöna ba wangaʼaroʼö banua niha Keriso.+
13 Andrö, niha si fahuhuo ba li böʼö moguna mangandrö ia enaʼö iʼila ifoʼeluaha.+ 14 Na mangandrö ndraʼo ba li böʼö, ufalua ia börö mbuala moroi khö Lowalangi, hizaʼi lö ikhamö era-eragu. 15 Tobali, hadia nifaluagu? Mangandrö ndraʼo börö mbuala moroi khö Lowalangi, ba mangandrödo göi faoma era-eragu. Usuno Lowalangi si fao fanunö börö mbuala nibeʼenia, ba uʼanunöisi göi faoma era-eragu. 16 Na misuno Lowalangi si fao buala moroi khönia, ba lö aboto ba dödö niha si lö mufahaʼö si so ba gotaluami geluaha wangandrömi saohagölö, hewisa wa tola iwaʼö, ”Yaduhu”? 17 Sindruhu sa, sökhi wangandrömi saohagölö, hizaʼi lö möi famarou dödönia. 18 Uʼandrö saohagölö khö Lowalangi börö me oya uʼila li böʼö moroi khömi. 19 Hewaʼae simanö, abölö sökhi ha lima ngawua wehedegu ba mbanua niha Keriso ba aboto ba dödöra enaʼö tola ufahaʼö ira, moroi na fulu ribu ngawua wehedegu ba lö laʼila geluaha.+
20 He yaʼami ira talifusö, böi mibaliʼö iraono ami ba wangera-ngera.+ Mibaliʼö iraono ami ba waʼalösökhi,+ ba yatobali ami satua ba wangera-ngera.+ 21 No tesura ba Goroisa Moze, ”’Uʼogunaʼö niha böʼö hegöi li böʼö ba wahuhuosa khöra, hizaʼi lö lafondrondrongo ndraʼo,’ iwaʼö Yehowa.”*+ 22 Andrö, buala ba wahuhuosa ba li böʼö tandra ba niha si lö mamati,+ tenga tandra ba niha samati. Buala ba wamaʼeleʼö tenga ba niha si lö mamati, hizaʼi ba niha samati. 23 Na owulo mbanua niha Keriso ba oi dozi fahuhuo ba li böʼö, aefa daʼö tohare niha si lö mufahaʼö mazui niha si lö mamati, hadia lö ibaliʼö ami sowöhö? 24 Na dozi mamaʼeleʼö ami, aefa daʼö tohare niha si lö mufahaʼö mazui niha si lö mamati, tobali fanegu khönia wehedemi ba tobali famarounia ba wamareso tödönia. 25 Iʼila hadia zi tobini ba dödönia irege ituhi danö ba wamosumange Lowalangi. Imane, ”Sindruhu wa so Lowalangi ba gotaluami.”+
26 Na simanö, hewisa ami ira talifusö? Na owulo ami, so zoʼanunöisi sinunö niʼamoniʼö, so zamahaʼö, so zamaʼema nifaʼeleʼö Lowalangi, so zi fahuhuo ba li böʼö, ba so zamoʼeluaha.+ Mifalua fefu daʼö ba wamarou tödö. 27 Na so zi fahuhuo ba li böʼö, fondrege waʼato darua mazui datölu enaʼö lafalali-lali wahuhuosa, ba moguna so zamoʼeluaha.+ 28 Na lö hadöi samoʼeluaha, akha ahono ira ba mbanua niha Keriso ba fahuhuo ira khö Lowalangi bakha ba dödö. 29 Na so zamaʼeleʼö, darua mazui datölu+ zi fahuhuo, ba tanö böʼönia laʼodödögö ba wangila eluaha. 30 Hizaʼi, na so nifaʼeleʼö Lowalangi ba zi samösa niha si dadao ba daʼö, yaʼahono niha si fahuhuo andrö. 31 Tola mamaʼeleʼö ami zamösana enaʼö tefahaʼö fefu niha ba tefarou dödöra.+ 32 Enaʼö laʼila lafatörö mbuala moroi khö Lowalangi ira samaʼeleʼö. 33 Lowalangi andrö Lowalangi waʼatulö, tenga Lowalangi samawuka.+
Simane ba mbanua niha Keriso fefu ba niha niʼamoniʼö, 34 yaʼahono ndra alawe ba gangowuloa mbanua niha Keriso. Tebai fahuhuo ira.+ Hizaʼi, enaʼö so khöra woloʼö,+ simane niwaʼö ba Goroisa Moze. 35 Na omasi laʼila hadia ia, tola lasofu khö woʼomora ira matua yomo ba nomo, börö me lö moadu ba ndra alawe na fahuhuo ira ba mbanua niha Keriso.
36 Hadia moroi khömi daromali Lowalangi mazui ha khömi tefaʼema ia?
37 Na so zangumaʼö tödönia, samaʼeleʼö ia mazui no itema mbuala moroi khö Lowalangi, moguna ifaduhuʼö wa moroi khö Zoʼaya* fefu zi no usura andre khömi. 38 Na so zi lö mameʼe ba dödönia daʼa, ba lö göi laʼameʼegö tödö ia.* 39 Andrö yaʼami ira talifusö, miʼodödögö wanema buala wamaʼeleʼö andrö,+ hizaʼi böi mitenawa na so zi fahuhuo ba li böʼö.+ 40 Fefu hadia ia enaʼö oi sökhi ba toföfö.+