Nisura Yohane
10 ”Sindruhu-ndruhu niwaʼögu khömi, si lö manörö bawandruhö ba sanawö baʼa-baʼa na möi ia bakha ba kandra mbiri-biri, no sanagö ba sorabu daʼö.+ 2 Hizaʼi, sanörö bawandruhö, daʼö zindruhu gubalo.+ 3 Labokai khönia mbawandruhö+ ira sanaro ba larongo linia biri-biri andrö.+ Ikaoni fefu ba itötöi döi mbiri-birinia ba iʼohe ira baero. 4 Me no iʼohe baero fefu mbiri-birinia, mowaö-waö ia tanö föna ba laʼoʼö ia börö me no latöngöni linia. 5 Lö laʼoʼö li niha si lö laʼila, moloi ira börö me faböʼö li niha daʼö.” 6 Ifatunö khöra gamaedola andre Yesu, hizaʼi lö aboto ba dödöra geluahania.
7 Imane zui Yesu, ”Sindruhu-ndruhu niwaʼögu, yaʼodo mbawandruhö ba mbiri-biri andrö.+ 8 Fefu zi tohare baero ndraʼo no sanagö ba sorabu, ba lö lafondrondrongo wehedera biri-biri. 9 Yaʼodo mbawandruhönia, haniha zi möi khögu ba kandra andrö daʼö niʼorifi. Na möi ia bakha ba kandra hegöi na möi ia baero, isöndra ndruʼu satabö.+ 10 Lö möi zanagö na tenga ba wanagö, ba wamunu, ba wamakiko.+ Wa möi ndraʼo enaʼö teʼorifi mbiri-biri ba fahöna khöra waʼauri. 11 Yaʼo gubalo si sökhi.+ Kubalo si sökhi itehegö nosonia salahi mbiri-birinia.+ 12 Moloi genoni si tenga kubalo mazui sokhö biri-biri na iʼila tohare nasu gatua. Iröi mbiri-biri ba iraʼu ira asu gatua irege muzawili, 13 börö me ha enoni ia ba lö ba dödönia mbiri-biri andrö. 14 Yaʼo gubalo si sökhi. Aboto ba dödögu mbiri-birigu ba aboto göi ba dödöra ndraʼo,+ 15 simane faʼaboto ba dödö Nama ndraʼo+ ba faʼaboto ba dödögu Nama. Utehegö nosogu ba mbiri-birigu.+
16 ”Ba so khögu mbiri-biri tanö böʼö si tenga moroi ba kandra andre,+ ba lö tola löʼö uʼohe ira ba lafondrondrongo ligu dania ba tobali ha sambawa nikubaloi ba ha samösa gubalo.+ 17 Iʼomasiʼö ndraʼo Ama,+ börö me utehegö nosogu,+ enaʼö tola usöndra mangawuli. 18 Lö sangai yaʼia khögu, hizaʼi utehegö börö me nilau dödögu. Tola ubeʼe ia, ba tola ufuli uhalö.+ Khö Namagu utema goroisa ba wamalua daʼa.”
19 Ifuli zui kaliru niha Yahudi+ börö wehedenia andrö. 20 Ato ba gotaluara zangumaʼö, ”Owöhö niha daʼö, no fatewu ba mbotonia malaʼika si lö sökhi. Hana wa mifondrondrongo niwaʼönia?” 21 Tanö böʼö lamane, ”Tenga simane daʼö na fahuhuo niha si no fatewu malaʼika si lö sökhi. Tebai ibokai hörö niha sauʼa malaʼika si lö sökhi lö?”
22 Me luo daʼö, Owasa Fangamoniʼö osali ba Yeruzalema, inötö mbaŵa deu. 23 Mowaö-waö Yesu ba gosali, ba Newali Nifosagö khö Zelomo.+ 24 Tohare niha Yahudi lafasui Yesu ba lamane, ”Hawaʼara manö öbeʼe manahö-nahö dödöma? Na sindruhu Keriso ndraʼugö fatunö manö khöma, böi biniʼö.” 25 Itema lira Yesu, ”No ufatunö khömi, ba lö faduhu dödömi. Halöwö nifaluagu ba döi Namagu, daʼö zamaduhuʼö yaʼo.+ 26 Hizaʼi, lö faduhu dödömi börö me tenga biri-birigu ami.+ 27 Larongo ligu biri-birigu. Uʼila haniha ira ba laʼoʼö ndraʼo.+ 28 Ubeʼe khöra waʼauri si lö aetu+ ba lö irai tehori ira. Lö si tola mangai yaʼira ba dangagu.+ 29 Hadia nibeʼe Nama khögu, abölö ebua mbölinia moroi ba danö böʼö fefu. Lö si tola mangai yaʼira ba danga Nama.+ 30 Ha sambua ndraʼaga Namagu.”+
31 Ifuli zui lahalö gara ira niha Yahudi ba wanebu Yesu. 32 Imane khöra Yesu, ”Uforomaʼö khömi halöwö soya ba si sökhi si otarai Nama. Hadia halöwögu si tobali tandrösami wa mitebu ndraʼo kara?” 33 Lamane ira niha Yahudi, ”Wa matebu ndraʼugö kara tenga börö me no öfalua halöwö si sökhi, hizaʼi börö me öʼoʼaya Lowalangi.+ Yaʼugö niha, ba hana wa öbaliʼö ndraʼugö lowalangi?” 34 Imane Yesu, ”Hadia tenga daʼö nisura ba Goroisa Moze, ’Umane, ”Hulö lowalangi ami”’?+ 35 Na ifotöi niha solawa taromali andrö ’lowalangi’,+ ba tebai mufawuʼa ngawua wehede Mbuku Niʼamoniʼö, 36 ba hana wa miwaʼö khögu, yaʼo niʼamoniʼö ba nifatenge Nama ba gulidanö, ’Sangoʼaya Lowalangi ndraʼugö’, me umane, ’Ono Lowalangi ndraʼo’?+ 37 Na lö ufalua halöwö nibeʼe Namagu, böi mifaduhusi tödö ndraʼo. 38 Hizaʼi, na ufalua ia hewaʼae lö faduhu dödömi khögu, mifaduhusi tödö halöwö nifaluagu,+ enaʼö aboto ba dödömi ha sambua ndraʼaga Nama.”+ 39 Laʼalui lala zui ba wondraʼu yaʼia, hizaʼi tebai lafalua.
40 Mofanö ia zui, iʼötö Nungo Nidanö Yoridano ba nahia wombayagö idanö nifalua Yohane mböröta,+ ba toröi ia ba daʼö. 41 Ato niha sangondrasi yaʼia ba lamane, ”Lö hadöi tandra sahöli-höli dödö nifalua Yohane, hizaʼi itörö fefu niwaʼö Yohane sanandrösa ba niha daʼa.”+ 42 Tobali, ato zamati khönia ba daʼö.