Nisura Luka

3 Ba ndröfi si 15 ba wamatörö Kaisaro Tiberio me Fondrio Filato zi tobali gubernur Yudea, Herode*+ zamatörö banua Galilaia, gaʼania Filifo tobali samatörö banua Gituraia ba Tarakhoniti. Lisania zi tobali samatörö banua Gabilene. 2 Me tobali kafalo gere Hanasi faoma Kayafa,+ itema goroisa Lowalangi Yohane+ ono Zakharia me so ia ba danö si mate.+

3 Itöröi fefu mbanua ba zi fasui Idanö Yoridano. Ituriaigö wa moguna tebayagö idanö niha, si tobali tandra wa no lafalalini gera-erara enaʼö teʼefaʼö horöra,+ 4 simane si no tesura ba mbuku Yesaya samaʼeleʼö, ”So li niha siʼao-ao ba danö si mate! ’Mihenaigö lala khö Yehowa!* Mihaogö lala sadölö khönia.+ 5 Mitimbu mbawa danö, ba mifadaya hili hegöi hili-hili; miʼadölöʼö lala sabila ba miʼalösöiʼö lala sokara-kara; 6 ba fefu niha laʼila dania wangorifi moroi khö Lowalangi.’”*+

7 Börö daʼö imane Yohane ba niha si tohare sedöna mubayagö idanö, ”Yaʼami maʼuwu gulö sobiso, haniha zangumaʼö wa tola teʼefaʼö ami moroi ba wönu Lowalangi andrö dania?+ 8 Börö daʼö, miforomaʼö ba mbua-buami wa mifalalini gera-erami. Böi miwaʼö tödömi wa tola teʼefaʼö ami börö me ngaʼötö Gaberahamo ami. Sindruhunia, na omasi Lowalangi, tola ibeʼe ngaʼötö khö Gaberahamo moroi ba gara andre. 9 No muhenaigö wato ba mbörö geu. Andrö, fefu geu si lö mowua si sökhi laʼobö dania ba latiboʼö ba galitö.”+

10 Aefa daʼö manofu niha sato, ”Na simane daʼö, hadia zinangea mafalua?” 11 Itema lira, ”Niha si dua görö baru enaʼö ibeʼe ba zi lö baru, ba si so balazo enaʼö ibagi-bagi.”+ 12 Tohare göi ndra sanugi pajak, labayagö ira idanö,+ ba lamane, ”He Samahaʼö, hadia zinangea mafalua?” 13 Imane khöra, ”Böi misugi* pajak töra moroi ba zi no mutatugöi.”+ 14 Manofu göi ndra saradadu khönia, ”Hadia zinangea mafalua?” Imane khöra, ”Böi mifakao* niha mazui miböbögö khöra zi lö duhu.+ Yaʼahono dödömi ba gazi nibeʼe khömi.”

15 Ato niha zombalo-mbaloi Keriso, ba manofu-nofu bakha dödöra sanandrösa khö Yohane, ”Hadia yaʼia andrö Keriso?”+ 16 Imane Yohane ba niha sato, ”Ubayagö ami faoma idanö, hizaʼi tohare niha sabölö ebua kuaso moroi khögu. Tenga sinangea ndraʼo wangeheta tali zandralania.+ Ibayagö ami faoma eheha niʼamoniʼö hegöi alitö.+ 17 No igogohe dambila ba wangehaogö naha wamöbörö. Ifaʼanö gandru ba halasa, ba fefu guliho itunu ba galitö si tebai mubunu.”

18 Oya göi mene-mene tanö böʼö nibeʼe Yohane ba lö iböhöli wanuriaigö turia somuso dödö ba niha. 19 Hizaʼi itegu Herode samatörö banua Galilaia sanandrösa khö Herodia foʼomo gaʼania awö ngawalö zi lö sökhi nifalua Herode. 20 Börö daʼö, sambua tö zui gamuata si lö sökhi nifalua Herode, yaʼia daʼö ifakuruʼö Yohane.+

21 Me labayagö idanö niha sato, tebayagö göi idanö Yesu.+ Me mangandrö ia teboka mbanua si yawa,+ 22 ba möi khönia geheha niʼamoniʼö hulö marafadi. Aefa daʼö terongo li moroi ba zorugo, ”Onogu ndraʼugö, niʼomasiʼögu, omuso dödögu khöu.”+