Sara Samueli
1 So samösa ndra matua moroi ba Ramataʼi-zufi*+ ba mbanua si so ba hili Geferai.+ Töinia Elikana,+ ono Yeroha, ono Gelihu, ono Dohu, ono Zufi niha Geferai. 2 Darua woʼomonia, yaʼia daʼö Khana ba Fenina. So nono Wenina, hizaʼi lö hadöi ono Khana. 3 Ero röfi, möi ia ba Zilo ba wamosumange Lowalangi* hegöi ba wameʼe sumange nitunu khö Yehowa samatörö saradadu zorugo.+ Ba daʼö mangai halöwö ndraono Eli si darua sotöi Hofini ba Fineha,+ tobali ere khö Yehowa.+
4 Samuza maʼökhö me ibeʼe zumange nitunu Elikana, ifoʼurakha woʼomonia Fenina ba fefu nononia matua hegöi ononia alawe.+ 5 Hizaʼi, tohude gurakha nibeʼenia khö Khana, börö me Khana zabölö iʼomasiʼö hewaʼae na lö nibeʼe Yehowa khönia nono.* 6 Lö iböhöli Fenina wangoʼaya Khana enaʼö alangu dödönia börö me lö nibeʼe Yehowa khönia ono. 7 Daʼö nifalua Fenina ero röfi. Na möi ira ba nomo Yehowa ero inötö,+ lö aetu-aetu iʼoʼaya ia Fenina irege meʼe Khana ba lö manga ia. 8 Imane foʼomonia Elikana, ”He Khana, hana wa meʼe ndraʼugö ba lö mangaʼö? Hadia zabu dödömö? Hadia lö abölö sökhi ndraʼo moroi ba zi dafulu ono matua?”
9 Aefa daʼö, mofanö Khana me no awai manga ira ba Zilo. Me luo daʼö, no modadao gere sotöi Eli ba zinga mbawandruhö gosali*+ Yehowa. 10 Abu sibai dödö Khana ba ibörögö mangandrö ia khö Yehowa+ si fao faʼadöʼu-döʼu. 11 Fawuʼu li ia, ”He Yehowa samatörö saradadu zorugo, na öfaigi gabula dödö genonimö andre, na itörö tödöu ndraʼo, na lö olifuʼö genonimö andre, na öbeʼe khögu nono matua,+ ba ubeʼe ia khöu Yehowa sandrohu faʼaurinia, ba lö irai laguti mbunia.”+
12 Ara sibai wangandrönia khö Yehowa ba ifaigi-faigi mbawania Eli. 13 Mangandrö Khana bakha ba dödönia, ha metu-metu mbewe ba lö terongo linia. Iwalingagö si mabu ia Eli. 14 Imane Eli, ”Hana wa mabu ndraʼugö? Böhöli wamadu nagu andrö.” 15 Imane Khana, ”Tenga si mabu ndraʼodo Pa! Lö nibadugu agu mazui ngawalö duo. Yaʼodo andre ira alawe sabu tödö, ba ufatunö nösi dödögu khö Yehowa.+ 16 Böi baliʼö ndraʼo ira alawe si lö karua. Iʼotarai mege fahuo-huo ndraʼo simane daʼa börö waʼabu dödögu.” 17 Imane Eli, ”Angawuli, yaʼohahau dödöu. Yaʼifondrondrongo wangandrömö andrö Lowalangi Gizaraʼeli.”+ 18 Imane Khana, ”Yafalukha genonimö andre waʼebua dödöu.” Aefa daʼö, mofanö ia ba manga ba lö saʼae ifangerau mbawania.
19 Mahemolunia, maoso ira sihulö wongi sibai ba mangalulu ira föna Yehowa, aefa daʼö mangawuli ira ba nomora ba Rama.+ Orudu Elikana khö woʼomonia Khana ba itörö tödö Yehowa ia.+ 20 Barö zi döfi,* manabina Khana ba tumbu khönia nono matua ba ibeʼe töinia+ Samueli,* imane ”Daʼa niʼandrögu moroi khö Yehowa.”
21 Ifuli zui möi Elikana awö zoroi yomonia maʼafefu ba wameʼe sumange nitunu khö Yehowa ero röfi+ hegöi sumange wawuʼusa li. 22 Hizaʼi, lö möi Khana.+ Imane khö woʼomonia, ”Na lö mamaenu saʼae nono daʼa, awena uʼohe ia. Ba daʼö toröi ia dania khö Yehowa sagötö faʼara.”+ 23 Imane foʼomonia Elikana, ”Falua zi sökhi moloʼö yaʼugö.* Ba iagö nomo irege lö mamaenu saʼae nono andrö. Yaʼifatörö niwaʼöu Yehowa.” Toröi Khana ba nomo ba wangebua ono daʼö irege lö mamaenu saʼae.
24 Me no aefa saʼae ba mbagi zusu nononia andrö, iʼohe ia Khana ba Zilo.+ Iʼohe göi sageu zawi si matua si tölu fakhe faʼebua, 22 liter* darigu, ba sambua rumbi sebua nagu nibadu.+ Ofeta ia ba nomo Yehowa fao nono andrö. 25 Ba lataba zawi si matua andrö ba lafasao nono daʼö khö Eli. 26 Imane Khana, ”He Pa, möido ba hölu khöu, yaʼodo andre mböröta ira alawe si fao khöu ba nahia daʼa ba wangandrö khö Yehowa.+ 27 Me luo daʼö, uʼandrö enaʼö so nonogu, ba no ifondrondrongo wangandrögu Yehowa.+ 28 Iadaʼa, ubeʼe ia nifiza khö Yehowa. Sandrohu faʼaurinia ufafizaʼö ia khö Yehowa.”
Lö ara, ituhi* danö föna Yehowa ba daʼö.