Sara Tesalonika
4 Ba gafuriata yaʼami ira talifusö, omuso dödö Lowalangi+ ba gamuatami barö daʼa, tefaudu simane fanuturu lala nibeʼema, hizaʼi maʼandrö ba matötöna khömi ba döi Zoʼaya Yesu enaʼö miforege nasa wamalua. 2 Börö me no aboto ba dödömi wanuturu lala* nibeʼema ba döi Zoʼaya Yesu.
3 Niʼandrö Lowalangi yaʼia daʼö enaʼö miʼamoniʼö ami+ ba miʼaröuʼö ami ba gamuata wohorö.*+ 4 Fefu ami moguna miʼila hewisa wamatörö botomi+ enaʼö teʼamoniʼö+ ba tefolakhömi. 5 Tenga simane soi böʼö si lö faʼaboto ba dödö Lowalangi, si tebai manaha tödöra ba wamalua fohorö+ ba lö irai atage ira.+ 6 Tebai so zanawö ola ba sangalui hare khö dalifusönia si sara lala wamati, börö me ihuku zamalua daʼö Yehowa* simane si no mafaʼema ba maʼabeʼeʼö wangumaʼö khömi. 7 Tenga enaʼö raʼiö wa ikaoni ita Lowalangi, hizaʼi enaʼö teʼamoniʼö.+ 8 Na so niha sanimbagö daʼa, tenga niha nitimbagönia hizaʼi Lowalangi,+ soʼamualagö eheha niʼamoniʼö andrö khömi.+
9 Sanandrösa ba wangomasiʼö talifusö,+ lö saʼae moguna masura khömi börö me no ifahaʼö ami Lowalangi ba wangomasiʼö.+ 10 No miʼomasiʼö fefu ndra talifusö si so ba Makedonia, ba maʼandrö khömi ira talifusö böi miböhöli wamalua daʼö soroi ba dödö. 11 Simane si no mawaʼö khömi, miforege enaʼö ahono dödömi ba waʼaurimi,+ böi mihalö khömi zi tenga urusami,+ ba miʼodödögö wohalöwö,+ 12 enaʼö laʼila ami niha baero wa sökhi gamuatami+ ba lö soʼamböta khömi.
13 Baero daʼö ira talifusö, omasiga na aboto ba dödömi sanandrösa ba niha si no mate,*+ enaʼö böi talafo miʼabusi tödö hulö niha si lö fanötöna.+ 14 Na mamati ita wa no mate Yesu ba ifuli auri,+ mamati göi ita wa isusugi dania Lowalangi niha si no mate* soloʼö khö Yesu ba fao ira awönia.+ 15 Moloʼö taromali Yehowa,* mafatunö khömi wa yaʼita sauri irugi tohare dania Zoʼaya, lö tahulö niha si no mate,* 16 börö me tohare Zoʼaya moroi ba zorugo ba ibeʼe fareta faoma fehede gafalo malaʼika+ si fao li dorofe khö Lowalangi, ba oföna tesusugi dania niha si no mate soloʼö khö Keriso.+ 17 Aefa daʼö, yaʼita sauri nasa tefazawa ita ba lawuo+ fao khöra ba wamalukhaisi Soʼaya+ ba dalu mbanua irege lö tebulö fao ita khönia.+ 18 Börö daʼö, böi miböhöli wondrara tödö nawömi faoma fehede daʼa.