Nisura Mareko
8 Me luo daʼö, ifuli zui owulo niha sato ba lö hadöi öra. Börö daʼö, ikaoni ndra nifahaʼönia Yesu imane, 2 ”Ahakhö dödögu ndra niha daʼa.+ No tölu hari fao ira khögu ba lö hadöi öra.+ 3 Na ufofanö ira ba waʼolofo, tola manö tegaölö ira ba lala, mendrua manö me so ba gotaluara zi otarai mbanua saröu.” 4 Hizaʼi lamane ira nifahaʼö, ”Aröu sibai nahia daʼa. Hezo tola tahalö roti enaʼö abuso ira?” 5 Isofu khöra Yesu, ”Hawaʼoya roti si so khömi?” Latema linia, ”Fitu.”+ 6 Iwaʼö khöra Yesu enaʼö modadao ira ba danö. Aefa daʼö ihalö roti si fitu ngawua andrö, iʼaohasi gölö Lowalangi, iboboto ba ibeʼe khö ndra nifahaʼönia enaʼö labagi ba niha sato.+ 7 So göi khöra mato hauga rozi giʼa. Me no iʼandrö saohagölö khö Lowalangi, iwaʼö khö ndra nifahaʼönia enaʼö labagi-bagi giʼa andrö. 8 Manga ira fefu irege abuso. Ba me laʼowuloi zi töra, so fitu raga-raga segebua.+ 9 Me luo daʼö, so 4.000 ndra matua si manga. Aefa daʼö iwaʼö khöra Yesu enaʼö mangawuli ira.
10 Lö ara, möi ia ba dundraha fao ndra nifahaʼönia ba larugi mbanua Dalamanuta.+ 11 So ba daʼö ndra Farizaiʼo ba fabuʼa-buʼa ira khönia. Laʼandrö dandra sahöli-höli dödö moroi ba zorugo ba wanandraigö yaʼia.+ 12 Abu sibai dödönia ba imane, ”Hana wa laʼandrö dandra sahöli-höli dödö ira niha daʼa?+ Sindruhu niwaʼögu, niha ba götö daʼa lö laforomaʼö khöra dandra.”+ 13 Aefa daʼö iröi ira, ifuli itörö dundraha numalö yefo nidanö.
14 Hizaʼi olifu ira wolohe roti, lö hadöi öra ba dundraha baero zi safoto roti.+ 15 Ifangelama ira Yesu, ”Mifaigi, miʼangelama ba ragi ndra Farizaiʼo hegöi ragi Herode.”+ 16 Ibörögö fabuʼa-buʼa ndra nifahaʼö börö me lö hadöi solohe roti. 17 Me iʼila daʼö Yesu imane, ”Hana wa faʼudu ami ba roti? Hadia lö nasa miʼila geluaha? Hadia lö nasa saboto ba dödömi? 18 ’So hörömi ba lö miʼila. So dalingami ba lö mirongo-rongo.’ Hadia lö itörö tödömi 19 me uboboto zi lima ngawua roti khö ndra matua si 5.000 niha,+ hauga raga-raga tö zi töra me miʼowuloi?” Latema li, ”Felendrua.”+ 20 Me uboboto zi fitu ngawua roti khö ndra matua si 4.000 niha, hauga raga-raga tö zi töra me miʼowuloi?” Latema li, ”Fitu.”+ 21 Imane khöra Yesu, ”Hadia lö nasa aboto ba dödömi?”
22 Larugi Mbetisaida. Laʼohe khönia ba daʼö samösa ndra matua sauʼa. Laʼandrö khö Yesu enaʼö itufa ndra matua andrö.+ 23 Igogohe danga ndra matua sauʼa andrö, iʼohe baero ahatö ba nola mbanua. Me no idiloi ba ibabaya hörö ndra matua daʼö+ Yesu, manofu ia, ”Hadia niʼilamö?” 24 Ifakhölö ia niha andrö ba imane, ”Uʼila niha, hizaʼi hulö döla geu sofanö-fanö.” 25 Ifuli ibabaya hörö ndra matua daʼö Yesu ba awena saʼae tara wangiʼilania. Ifuli sökhi hörönia ba iʼila fefu hadia ia. 26 Aefa daʼö ifofanö ia Yesu ba imane khönia, ”Böi angawuli ua ba mbanua.”
27 Mofanö Yesu fao ira ndra nifahaʼönia ba mbanua si so ba Kaisarea Filifi. Manofu ia khö ndra nifahaʼönia me so ira ba lala imane, ”Fangumaʼö niha sato, haniha ndraʼodo andre?”+ 28 Lamane khönia, ”Yohane Samayagö Idanö,+ so göi zangumaʼö Elia,+ tanö böʼö lamane samösa moroi ba gotalua zamaʼeleʼö.” 29 Aefa daʼö, ifanandrösa wanofunia andre khö ndra nifahaʼönia, ”Na moloʼö yaʼami, haniha ndraʼodo andre?” Itema linia Fetero, ”Keriso ndraʼugö.”+ 30 Iʼabeʼeʼö wehedenia Yesu enaʼö böi lafatunö ia ba niha böʼö.+ 31 Ibörögö ifahaʼö ira wa hasambalö oya itörö wamakao Ono niha ba latimbagö ia ira sondröniaʼö, ira kafalo gere hegöi sangila amakhoita. Ba labunu ia,+ aefa daʼö tesusugi ba ngaluo si tölu.+ 32 Lö ibiniʼö Yesu wangombakha khöra fefu daʼö. Maoso Wetero idöni danga Yesu ba zingania ba ifangelama.+ 33 Ibaliʼö ia Yesu wamaigi nifahaʼönia ba mofönu ia khö Wetero imane, ”Ae furigu Satana! Lö öfatou-tou tödöu gera-era Lowalangi, ha fangera-ngera niha.”+
34 Aefa daʼö ikaoni niha sato hegöi ira nifahaʼönia imane, ”Na so zomasi moloʼö yaʼo, yamuʼositengagö ia* ba yamuluʼi döla geu famakao* andrö ba yamuʼoʼö ndraʼo.+ 35 Haniha zangalui faʼanau nosonia, hasambalö mate. Hizaʼi, haniha zi mate börö ndraʼo hegöi turia somuso dödö andrö, ifuli teʼorifi.+ 36 Sindruhunia, hadia gunania ba niha na isöndra hare ba gulidanö andre, ba teʼala nosonia?+ 37 Hadia nibeʼe niha si möi fangali nosonia?+ 38 Haniha zaila ba khögu hegöi ba wehedegu ba götö niha sebua horö andre ba si faröi,* aila göi Nono niha khönia+ na tohare ia ba lakhömi Namania si fao ira malaʼika niʼamoniʼö.”+