Famaʼeleʼö Nitema Yohane

2 ”Ömane wanura khö malaʼika+ ba mbanua niha Keriso ba Nefeso:+ Daʼa wehede zololohe si fitu ngawua döfi ba dangania kambölö, sowaö-waö ba gotalua naha wandru anaʼa si fitu ngawua andrö:+ 2 ’Aboto ba dödögu nifaluamö, faʼerege dödöu hegöi faʼanau gölöu. Ötimbagö niha si lö sökhi. Ötandraigö niha sangotöigö yaʼia sinenge,+ sindruhunia sa tenga, ba öʼila wa yaʼira andrö si falimo. 3 Oya göi wamakao nitaögömö börö döigu,+ hizaʼi anau gölöu ba lö aetu wanötönamö.+ 4 Hewaʼae simanö, so zi lö omasido khöu. Faʼomasimö tenga simane me mböröta.

5 ”’Börö daʼö, törö-törö tödöu hawaʼabölö-bölö waʼalabumö. Falalini gera-erau+ ba fuliʼö ba zi toʼölö öfalua me mböröta. Na lö öfalalini gera-erau,+ tohare ndraʼo ba wangeheta khöu naha wandru+ andrö. 6 Hizaʼi, so nasa zi sökhi nifaluamö: fatuwu ndraʼugö ba gamuata nifalua agama Nikolaʼiti,+ si fatuwu ndraʼo göi. 7 Yaʼami si so talinga, mifondrondrongo niwaʼö geheha niʼamoniʼö ba mbanua niha Keriso:+ Niha si möna,+ utehegö laʼa mbua geu fangorifi+ si so ba waradaiso Lowalangi.’

8 ”Ömane wanura khö malaʼika ba mbanua niha Keriso ba Zimina: Daʼa wehedenia, yaʼia daʼö ’Si Oföna ba Safuria’,+ si no irai mate ba ifuli auri:+ 9 ’Aboto ba dödögu wa tefakao ndraʼugö ba numana, sindruhunia sa kayo.+ Uʼila göi wa laʼoʼaya ndraʼugö sangotöigö yaʼia niha Yahudi sindruhunia sa tenga. Yaʼira andrö angowuloa* tana khö Zatana.+ 10 Böi ataʼufi wamakao nitaögöu dania.+ Ibeʼe ami ösa ba gurunga Afökha enaʼö sindruhu-ndruhu tetandraigö ami ba mitaögö wamakao ba zi fulu hari faʼara. Foromaʼö wa lö faröi ndraʼugö irugi waʼamate ba ubeʼe khöu dakula waʼauri.+ 11 Yaʼami si so talinga,+ mifondrondrongo niwaʼö geheha niʼamoniʼö ba mbanua niha Keriso: Niha si möna,+ lö latörö waʼamate si mendrua.’+

12 ”Ömane wanura khö malaʼika ba mbanua niha Keriso ba Weregamo: Daʼa wehede zangokhögö gari si faoma bawa, sanau ba satarö andrö:+ 13 ’Aboto ba dödögu hezo toröi ndraʼugö, yaʼia daʼö ba nahia dadaoma Zatana. Hizaʼi, lö faröi ndraʼugö khögu.+ Lö tebulö wamatimö khögu+ hewaʼae labunu+ Atifasi fönamö ba nahia dadaoma Zatana. Yaʼia andrö samaduhuʼö si lö faröi khögu.+

14 ”’Hewaʼae simanö, so zi lö omasido khöu. Ötehegö so ösa zoloʼö famahaʼö Mbileamo+ ba gotaluami. Bileamo andre mböröta zangoʼou Balaki+ enaʼö tedönisi ndraono Gizaraʼeli ba wamalua horö yaʼia daʼö ba wemanga nagole nibeʼe sumange nadu hegöi ba wohorö.*+ 15 So göi ba gotaluami zoloʼö famahaʼö agama Nikolaʼiti.+ 16 Andrö mifalalini gera-erami. Na löʼö, tohare ndraʼo khömi ba usuwö ira faoma föda sanau, salua moroi ba mbawagu.+

17 ”’Yaʼami si so talinga, mifondrondrongo niwaʼö geheha niʼamoniʼö ba mbanua niha Keriso:+ Ubeʼe mana si tobini+ ba niha si möna.+ Ubeʼe göi khönia sambua gara safusi side-ide. Ba gara andrö tesura döi si bohou ba samösa lö sangila baero niha sanema yaʼia.’

18 ”Ömane wanura khö malaʼika ba mbanua niha Keriso ba Diatira:+ Daʼa wehede Nono Lowalangi, hulö galitö si hola-hola hörönia+ ba ahenia hulö tembaga salösö:+ 19 ’Uʼila hadia nifaluamö, faʼomasiu, famati, fangai halöwö khö Lowalangi, ba faʼanau gölöu. Uʼila göi nifaluamö ba gafuriata andre töra moroi ba nifaluamö me mböröta.

20 ”’Hewaʼae simanö, so zi lö omasido khöu. Ötehegö ndra alawe si hulö Gizebela+ andrö sangotöigö yaʼia samaʼeleʼö. Ifaelungu ndra sawuyugu ba wamahaʼönia irege lafalua gamuata wohorö*+ ba laʼa nagole zumange nibeʼe ba nadu. 21 No ubeʼe khönia ginötö ba wamalalini era-erania, hizaʼi lö omasi ia iböhöli gamuatania ba wohorö.* 22 Ubeʼe khönia wökhö sabölö-bölö. Na lö lafalalini gera-erara niha sohorö khönia moroi ba gamuatania andrö, ufatörö khöra wamakao sabölö-bölö. 23 Uhori dania ndraononia faoma fökhö famunu. Daʼö mbörö wa aboto ba dödö mbanua niha Keriso wa yaʼodo zamareso fangera-ngera* hegöi tödö. Usulöni khömi moloʼö nifaluami zamösana.+

24 ”’Hizaʼi, ba niha Diatira si lö moloʼö famahaʼö daʼö, si lö manö mangila nifotöi ”si tobini khö Zatana”,+ umane khöra wa lö omasido unönö noro dödömi. 25 Irege tohare ndraʼo, böi miböhöli wamalua si sökhi.+ 26 Ba niha si möna hegöi soloʼö oroisagu irugi gamozua, ubeʼe khönia kuaso ba wamatörö ngawalö soi,+ 27 simane kuaso nitemagu moroi khö Namagu. Ikubaloi ngawalö soi faoma siʼo siʼöli,+ irege tobali ira bowoa tanö nifufu ba sozawili. 28 Ubeʼe göi khönia madala.+ 29 Yaʼami si so talinga, mifondrondrongo niwaʼö geheha niʼamoniʼö ba mbanua niha Keriso.’