Ba Niha Heberaiʼo

13 Böi miböhöli wangoromaʼö faʼomasi khö ndra talifusö.+ 2 Böi olifu ami enaʼö lö abua gölömi ba wanemaʼö tome.*+ Na mufalua daʼö, so ösa zi lö mangila wa sindruhunia no latemaʼö ndra malaʼika.+ 3 Mitörö-törö tödömi niha si so ba gurunga,+ hulö no fao ami khöra ba gurunga,+ simanö göi niha nifakao börö me ba mboto waʼaniha so nasa ami.* 4 Dozi niha enaʼö laʼosinangegö wangowalu ba böi taʼunö waʼorudu andrö,+ börö me Lowalangi zanguhuku niha sohorö* hegöi sohoröni donga zodonga.+ 5 Böi miʼomasiʼö gefe+ ba mihonogö dödömi ba zi no so,+ börö me no iwaʼö Lowalangi, ”Lö manö uröi ndraʼugö ba lö uʼositengagö ndraʼugö.”+ 6 Börö daʼö lö ataʼu ita wangumaʼö, ”Yehowa* zanolo yaʼo; lö ataʼu ndraʼo. Hadia zi tola lafalua niha khögu?”+

7 Mitörö-törö tödömi zondröniaʼö yaʼami,+ si no mangombakha khömi taromali Lowalangi. Minehegö hewisa lua-lua waʼaurira ba miʼoʼö wamatira.+

8 Lö si tebulö Yesu Keriso, he me föna, he iadaʼa ba irugi zi lö aetu.

9 Böi ifaelungu ami ngawalö wamahaʼö si no faböʼö. Abölö sökhi teʼaroʼö ami ba waʼasökhi dödö sebua* moroi khö Lowalangi, tenga börö gö* si lö moguna ba niha sarörö moʼangeragö yaʼia.+

10 So khöda naha wanunu sumange. Dozi samalua halöwö niʼamoniʼö ba daʼö, lö tetehegö khöra wemanga ba nahia andrö.+ 11 Latunu nagole gurifö ira ere sebua baero nose andrö ba no laʼohe ndro gurifö daʼö bakha ba nahia niʼamoniʼö tobali sumange fameta horö.+ 12 Simanö göi Yesu, tefakao ia baero mbawa göli+ ba wangehao niha sato faoma donia.+ 13 Börö daʼö, damöi ita khönia baero nose andrö, tafaogö ita wanaögö fangoʼaya nitaögönia,+ 14 börö me lö hadöi khöda ba daʼa banua si lö tebulö, hizaʼi tadöna-döna mbanua si lö ara tö tohare.+ 15 Börö daʼö, datafaʼema khönia zumange fanuno khö Lowalangi+ yaʼia daʼö bua-bua mbewe+ sangombakha töinia.+ 16 Baero daʼö, böi olifu ami wamalua si sökhi ba niha ba faoma mitolo nawömi,+ börö me omasi Lowalangi zumange simane daʼö.+

17 Miʼoʼö ba mifondrondrongo+ li zondröniaʼö yaʼami,+ börö me yaʼira zondrorogö yaʼami* me khöra tezofu-zofu dania.+ Enaʼö omuso dödöra wamalua halöwöra tenga ba waʼabua gölö, börö me tenga sohare ami daʼö.

18 Böi miböhöli wangandrö salahima börö me faduhu dödöma lö itegu ndraʼaga tödöma side-ide, ba omasiga matörö zindruhu ba ngawalö hadia ia.+ 19 Uʼandrö khömi miʼangandrö salahigu enaʼö mangawuli ndraʼo khömi.

20 Lowalangi waʼohahau dödö andrö, sanusugi Soʼaya yaʼita Yesu, kubalo sebua+ solohe do wawuʼusa li irugi zi lö aetu, 21 ifaʼanö ami ba ngawalö zi sökhi ba wamalua ohitö dödönia, ba ifarou ita ba wamalua somasi ia ba khö Yesu Keriso. Yatefolakhömi ia irugi zi lö aetu. Yaduhu.

22 Uʼandrö khömi ira talifusö, mitema wehede famarou dödö andre börö me no adogo-dogo wehedegu ba zura nifaʼoheʼögu khömi. 23 Omasido uʼombakhaʼö khömi wa no muʼefasi dalifusöda Timoteo moroi ba gurunga. Na tohare ia dania, uʼohe ia awögu ba wangondrasi yaʼami.

24 Mifaʼema wangowaigu khö zondröniaʼö yaʼami hegöi khö ndra niha niʼamoniʼö. Laʼowai ami ira talifusöda si so ba Gitalia.+

25 Yafao khömi fefu waʼasökhi dödö sebua* moroi khö Lowalangi.