Sara Timoteo
1 Moroi khö Waulo, sinenge Keriso Yesu moloʼö oroisa Lowalangi, Sangorifi yaʼita, ba Keriso Yesu tötönaföda,+ 2 khö Dimoteo,*+ si sara lala wamati khögu, si hulö nonogu samösa.+
Yaʼötema waʼasökhi dödö sebua,* faʼahakhö dödö, ba faʼohahau dödö moroi khö Namada Lowalangi, ba moroi khö Keriso Yesu, Soʼaya yaʼita.
3 Me mböröta, uʼandrö khöu enaʼö toröi manö ndraʼugö ba Nefeso me numalö ndraʼo ba Makedonia, simanö göi iadaʼa, enaʼö tola öfangelama niha samahaʼö faya, 4 mazui samondrondrongo huhuo falimosa+ ba fanutunö ngaʼötö. Fefu daʼö lö hadöi gunania,+ ha asala laʼila lawaʼö ba lö laʼila lafaduhuʼö na atulö, faböʼö moroi ba zi no ihenaigö Lowalangi ba wangaʼaroʼö famati. 5 Sindruhunia, wa labeʼe wanuturu lala* andre enaʼö taʼokhögö waʼomasi soroi ba dödö,+ tödö side-ide si lö sinegu, ba moroi ba wamati soroi ba dödö.+ 6 Hizaʼi, so niha si no elungu moroi ba daʼö, irege lafondrondrongo huhuo si lö eluaha.+ 7 Omasi ira tobali samahaʼö+ oroisa. Hizaʼi, lö aboto ba dödöra hadia wehedera hegöi ngawalö nifaduhuʼöra si fao faʼabarani.
8 Aboto ba dödöda wa sökhi Goroisa Moze na tefaudu wamalua yaʼia, 9 börö me tenga ba niha satulö teʼasogö goroisa, hizaʼi ba niha sanawö+ ba solawa, samalua horö ba si lö mamosumange Lowalangi, sangaohasi ba dödö ngawalö niʼamoniʼö ba si faröi,* samunu amania, inania, hegöi niha böʼö, 10 sohorö,* ira matua sohoröni awönia ira matua, sanagö, si falimo, sanawö hölu,* ba samalua ngawalö zi lö tefaudu ba wamahaʼö satulö,+ 11 dali duria somuso dödö andrö solakhömi moroi khö Lowalangi somuso tödö, nibeʼe ba dangagu.+
12 Uʼandrö saohagölö khö Keriso Yesu Soʼaya yaʼita sameʼe khögu faʼabölö, börö me lö faröi ndraʼo ba wamaiginia, andrö ibeʼe khögu halöwö andre,+ 13 hewaʼae sangoʼaya Lowalangi ndraʼo mböröta, samakao, ba si fayawa.+ Falukha ndraʼo waʼahakhö dödö, börö me ambö famatigu ba lö khögu faʼaboto ba dödö me ufalua daʼö. 14 No fahöna khögu waʼasökhi dödö sebua* moroi khö Lowalangi, si fao famati ba faʼomasi si otarai khö Keriso Yesu. 15 Tola mufaduhusi tödö wehede daʼa ba sinangea mutemaʼö: No möi ba gulidanö Keriso Yesu ba wangefaʼö niha si so horö.+ Moroi ba gotaluara, yaʼo wondrege zebua horö.+ 16 Hewaʼae simanö, falukha ndraʼo waʼahakhö dödö enaʼö ba khögu yaʼo sebua horö andre, tola iforomaʼö waʼebolo dödönia Keriso Yesu, me ibaliʼö ndraʼo duma-duma ba niha samati khönia ba wanöndra faʼauri si lö aetu.+
17 Yatefosumange ba tefolakhömi Razo götö-götö waʼara,+ yaʼia daʼö Lowalangi si ha sambua,+ si lö tebulö+ ba si lö oroma.+ Yaduhu.
18 Ubeʼe ba dangau wanuturu lala* andre yaʼugö onogu Timoteo, simane nifaʼeleʼö sanandrösa khöu enaʼö öforege wasöndrata ba gohitö dödö si sökhi,+ 19 öʼaroʼö wamati ba öʼokhögö dödö side-ide si lö sinegu.+ So ösa niha si no mangosiwawöi daʼö irege taya wamatira simane köfa sahöndrö, 20 simane Himenaiʼo+ ba Alesandro. No ubeʼe ira ba danga Zatana+ enaʼö göna ira fotu ba aboto ba dödöra wa tebai laʼoʼaya Lowalangi.