Sara Timoteo

4 No ihaogö wanutunö taromali Lowalangi wa so dania ginötönia ato niha si taya famati, lafondrondrongo wehede famaelungu si hulö moroi khö Lowalangi,+ ba famahaʼö malaʼika si lö sökhi 2 nifaʼema niha samini tödö somasi falimo,+ ba si no afuru tödö side-ide.* 3 Lö latehe mangowalu niha+ ba lö latehe laʼa ngawalö gö,+ sindruhunia wa ifazökhi daʼö Lowalangi enaʼö laʼa+ si fao fangandrö saohagölö ira niha samati+ ba si so faʼaboto ba dödö si tefaudu sanandrösa ba zindruhu. 4 Fefu nifazökhi Lowalangi oi sökhi,+ ba lö hadöi sinangea mutimbagö+ na muʼa ia si fao fangandrö saohagölö. 5 Fefu ngawalö gö, no teʼamoniʼö börö daromali Lowalangi ba fangandrö.

6 Na öfaʼema mene-mene daʼa khö ndra talifusö, no tobali ndraʼugö sangai halöwö si sökhi khö Keriso Yesu, si no mufahaʼö ba daromali sanandrösa ba wamati khö Lowalangi ba famahaʼö si sökhi si no öfalua barö daʼa.+ 7 Timbagö huhuo faya+ nidunö-dunö niha sato* si möi fangoʼaya Lowalangi. Yatobali ohitö dödöu wamahaʼö yaʼugö ba wamosumange Lowalangi soroi ba dödö. 8 Lö börö moguna wamahaʼö boto andrö, hizaʼi famosumange Lowalangi soroi ba dödö moguna manö gofu hezo, ba no tefabuʼu waʼauri iadaʼa hegöi faʼauri ba zi so miföna.+ 9 Tola mufaduhusi tödö wehede andrö ba tatema ia soroi ba dödö. 10 Daʼö mbörö wa taforege ba taʼodödögö,+ börö me manötöna ita khö Lowalangi sauri, Sangorifi+ fefu niha,+ mendrua manö niha si lö faröi.

11 Böi böhöli wamaʼema oroisa andre hegöi ba wamahaʼö yaʼira. 12 Böi tehegö so zangosiwawöi yaʼugö börö me awuyu nasa ndraʼugö. Hizaʼi, yatobali ndraʼugö duma-duma ba niha si lö faröi, he ba wehede, ba gamuata, ba waʼomasi, ba wamati, hegöi ba waʼohau-hau. 13 Irege tohare ndraʼo, böi böhöli wangodödögö fombaso föna niha sato,+ amenesi,* ba fahaʼö ira. 14 Böi ositengagö mbuala nibeʼe khöu si no ötema me latufa högöu ira satua sokubaloi, simane si no tefaʼeleʼö sanandrösa ba khömö.+ 15 Daʼö törö-törö tödöu,* ba odödögö enaʼö oroma waʼatedoumö ba niha fefu. 16 Faigi-faigi hewisa ndraʼugö hegöi famahaʼöu.+ Böi böhöli wamalua daʼa börö me teʼorifi ndraʼugö awö zamondrongo yaʼugö.+