2 Moze
2 Me luo daʼö, so samösa ndra matua mado Lewi sangowalu khö ndra alawe mado Lewi.+ 2 Manabina ndra alawe daʼö ba tumbu khönia nono matua. No siga-siga sibai nono daʼö, andrö wa ibiniʼö tölu waŵa waʼara.+ 3 Me itugu ara ginötö, tebai saʼae labiniʼö nono daʼö.+ Andrö ihalö raga-raga* nifazökhi moroi ba döla zukhu,* isölö faoma asipala. Ibeʼe yawa ba daʼö nono andrö, iröi ba gotalua zukhu si tumbu ba ngöfi Nungo Nidanö Nilo. 4 Hizaʼi, so gaʼa nono daʼö ono alawe,+ ifandröndröu ia maʼifu ba wamaigi hadia zalua khö nakhinia.
5 Lö ara, tohare nono Waraʼo ono alawe si möi mondri ba Nungo Nidanö Nilo, ba latörö zinga nungo nidanö andrö ira sawuyunia alawe. Iʼila raga-raga si so ba gotalua zukhu andrö. Iʼanemaiʼö iwaʼö khö zawuyunia ba wangai raga-raga daʼö.+ 6 Me ibokai, iʼila nono sawuyu sege-ege, ono matua. Ahakhö dödönia ba imane, ”Ono ndra alawe niha Heberaiʼo daʼa.” 7 Imane gaʼa nono daʼö khö nono Waraʼo ono alawe, ”Hadia omasiʼö na ukaoni samösa ndra alawe Heberaiʼo ba wamaenu ono daʼa?” 8 Fao dödö nono Waraʼo andrö. Ba mofanö nono alawe daʼö, möi ikaoni nina nono sawuyu andrö.+ 9 Imane ono Waraʼo khö nina nono sawuyu andrö, ”Ohe nono daʼa ba faenu. Ubeʼe dania mböli gölöu.” Ba iʼohe nono andrö ira alawe daʼö ba ifaenu. 10 Me no ebua-bua nono daʼö, iʼohe ia inania khö nono Waraʼo ba ihalö tobali ononia.+ Ibeʼe töi nono daʼö Moze* börö me ba nidanö ihalö nono andrö.+
11 Samuza inötö me no ebua* Moze, möi ia wamalukhaisi ira talifusönia niha Heberaiʼo. Iʼila wamakao nitaögöra börö me lafaso ira wohalöwö.+ Lö ara, iʼila samösa niha Miserai samözi niha Heberaiʼo. 12 Ifakhölö ia ba lö hadöi niha ba daʼö. Ibunu niha Miserai andrö, aefa daʼö ikoʼo ba gawu.+
13 Mahemolunia, möi ia zui ba iʼila darua ndra matua Heberaiʼo si faʼudu. Imane ba niha si fasala, ”Hana wa öbözi nawöu?”+ 14 Imane niha daʼö, ”Haniha zamataro yaʼugö tobali samatörö ba sanguhuku yaʼaga? Hadia öbunu göi ndraʼo simane me öbunu niha Miserai andrö?”+ Ataʼu sibai Moze ba imane tödönia, ’No larongo niha hadia nifaluagu!’
15 Me irongo daʼö Faraʼo, edöna ibunu Moze, hizaʼi ilau moloi Moze. Möi ia ba Midiano ba toröi ia ba daʼö.+ Me irugi daʼö, modadao ia ahatö mbaʼa nidanö. 16 So samösa gere ba Midiano+ ba dafitu khönia nono alawe. Möi ira wanaʼu idanö ba wamoʼösi luha ba lafabadugö ba gurifö nifaliaro namara. 17 Simane si toʼölö, tohare ndra kubalo ba lafofanö ira. Me iʼila daʼö Moze, itolo* ira ba ifabadugö nidanö ba guriföra. 18 Me larugi nomo, tokea namara sotöi Regueli*+ imane, ”Hana wa alio sibai mangawuli ami maʼökhö?” 19 Lamane, ”Me lafofanöga ira kubalo, so niha Miserai sanolo yaʼaga.+ Itaʼu nasa nidanö ba ifabadugö ba guriföda.” 20 Imane ba ndraononia, ”Hezo so ia? Hana wa lö miwaʼö khönia weʼamöi ba daʼa? Mikaoni ia ba talau manga.” 21 Aefa daʼö, fao dödö Moze na toröi ia ba nomo Regueli, ba ibeʼe nononia alawe sotöi Sifora+ tobali foʼomo Moze. 22 Ba tumbu nono matua khö Zifora. Ibeʼe Moze döi nono andrö Geresomo,*+ börö me si fatewu Moze ba soi daʼö.+
23 Hauga fakhe aefa daʼö mate razo Miserai.+ Mangarö-ngarö ba mukökö-kökö ndraono Gizaraʼeli börö me laʼosawuyu ira. Lö laböhöli weʼao ba wangandrö fanolo khö Lowalangi sindruhu.+ 24 Ba gafuriata irongo Lowalangi wangarö-ngaröra,+ ba ibörögö ifalua zi no ifabuʼu khö Gaberahamo, Izaʼaki, ba Yakobo.+ 25 Ba iʼameʼegö tödö ndraono Gizaraʼeli, aboto ba dödönia zalua khöra.