Nisura Mataiʼo
15 Aefa daʼö, tohare ndra Farizaiʼo hegöi sangila amakhoita+ moroi ba Yeruzalema, laʼondrasi Yesu lamane, 2 ”Hana wa lasawö zi toʼölö lafalua ira satua me föna ira nifahaʼömö? Duma-dumania, na manga ira ba lö lasasai* dangara.”+
3 Itema lira Yesu, ”Ba hana wa misawö goroisa Lowalangi ha börö huku ndra tuami?+ 4 Duma-dumania imane Lowalangi, ’Fosumange namau awö ninau,’+ ba, ’Dozi si falele khö namania mazui inania, huku famunu hukumania.’+ 5 Hizaʼi mimane, ’Na so zangumaʼö khö namania inania, ”Tebai utolo ami börö me no ufabuʼu wa ubeʼe sumange khö Lowalangi fefu gokhötagu,”+ 6 tola lö saʼae ifosumange zatuania.’ Na simanö, no misawö goroisa Lowalangi ha börö huku ndra tuami.+ 7 Yaʼami niha samini tödö. Sindruhu niwaʼö Yesaya sanandrösa khömi,+ 8 ’Lafosumange ndraʼo niha andre faoma bewera, ba tödöra no aröu khögu. 9 Zaya-zaya gölöra wamosumangera yaʼo, börö me oroisa niha gulidanö nifahaʼöra, hulö na oroisagu daʼö.’”+ 10 Ba ikaoni niha sato enaʼö lahatöʼö ira khönia, imane khöra Yesu, ”Mifondrondrongo ba yaʼaboto ba dödömi:+ 11 Tenga daʼö zotaʼunöisi niha si möi bakha ba mbawania, hizaʼi hadia zi kalua ba mbawania.”+
12 Aefa daʼö, lamane khönia ira nifahaʼö, ”Hadia lö öʼila wa abao dödö ndra Farizaiʼo ba wehedemö?”+ 13 Itema lira, ”Fefu zinanö si tenga nitanö Namagu andrö ba zorugo, ba ladeha dania. 14 Böi mihalö fökhö högömi ira. Niha sauʼa ira, sanuturu lala ba nawöra sauʼa. Na iʼohe danga nawönia sauʼa awönia sauʼa, faoma aekhu ira ba goho-koho.”+ 15 Imane Fetero, ”Ombakhaʼö khöma geluaha gamaedola daʼö.” 16 Imane Yesu, ”Hadia lö nasa aboto ba dödömi?+ 17 Hadia lö miʼila, gofu hadia zi möi ba mbawa, numalö ba mbetuʼa, aefa daʼö tetiboʼö ba lala zi taʼunö? 18 Ba hadia zi otarai mbawa, no moroi ba dödö daʼö, ba daʼö zotaʼunöisi niha.+ 19 Duma-dumania, moroi ba dödö iʼotarai fangera-ngera si lö sökhi:+ famunu niha, fohoröni donga zodonga, ngawalö wohorö tanö böʼö,* fanagö, falimosa, ba fangoʼaya. 20 Daʼö zotaʼunöisi niha. Hizaʼi, lö taʼunö niha na manga hewaʼae lö isasai dangania.”*
21 Mofanö Yesu moroi ba daʼö, isawa mbanua Diro hegöi Sidona.+ 22 So samösa ndra alawe Fenisia ba mbanua andrö si möi khö Yesu ba muʼao ia imane, ”Hakhösi tödö ndraʼo Soʼaya, maʼuwu Dawido. Tefakao sibai nonogu alawe, no fatewu ba mbotonia malaʼika si lö sökhi.”+ 23 Hizaʼi, lö itema li ndra alawe daʼö Yesu. Ba lamane khönia ira nifahaʼönia, ”Fofanö ndra alawe daʼö. Lö ibato weʼao-ao moroi furida.” 24 Imane Yesu, ”Tefatenge ndraʼo, ha ba ndraono Gizaraʼeli si hulö mbiri-biri si taya.”+ 25 Ba möi khönia ndra alawe andrö, mangalulu fönania ba imane, ”He Soʼaya, tolodo!” 26 Imane Yesu, ”Tebai lahalö gö ndraono ba latiboʼö ö nono nasu.” 27 Imane ira alawe andrö, ”Atulö niwaʼömö Soʼaya, hizaʼi niʼa nono nasu yaʼia daʼö satoru ba meza zokhö yaʼia.”+ 28 Ba itema linia Yesu, ”Ebua sibai wamatimö. Hasambalö alua nidöna-dönamö.” Iʼanemaiʼö döhö nono ndra alawe andrö.
29 Aefa daʼö, mofanö Yesu isawa mbanua sahatö ba Nasi Galilaia.+ Ba möi ia ba hili, ilau modadao ba daʼö. 30 Ba tohare niha sato, laʼohe khönia niha sakela-kela, sombuyu-mbuyu töla, sauʼa, si lö hede, ba tanö böʼönia. Latouʼö fefu zofökhö andrö ba gahe Yesu, ba ifadöhö ira.+ 31 Ahöli-höli dödö niha si so ba daʼö me laʼila wa tola fahuhuo zi lö hede, döhö zakela-kela, tola mowaö-waö zombuyu-mbuyu töla, ba teboka hörö zauʼa, irege lasuno Lowalangi ndraono Gizaraʼeli.+
32 Aefa daʼö, ikaoni ndra nifahaʼönia Yesu imane khöra, ”Ahakhö dödögu wamaigi niha sato andre.+ No tölu hari fao ira khögu, ba lö si manga ira. Lö omasido na olofo ira ba wangawuli, ma dania tegaölö ira ba lala.”+ 33 Ba lamane khönia ira nifahaʼö, ”Aröu sibai nahia daʼa, hezo tasöndra gö soya ba niha simane daʼa faʼato?”+ 34 Imane khöra Yesu, ”Hawaʼoya roti si so khömi?” Latema linia, ”Ha fitu, ba so mato hauga rozi giʼa si gide-ide.” 35 Me no aefa iwaʼö ba niha sato enaʼö modadao ira ba danö, 36 ihalö roti si fitu ngawua hegöi iʼa. Ilau mangandrö ba iboboto roti, ibeʼe khö ndra nifahaʼönia. Aefa daʼö, ladozigö niha sato ira nifahaʼönia.+ 37 Manga ira fefu irege abuso. Ba laʼozaragö zi töra, so fitu raga-raga segebua.+ 38 Sindruhunia, so mato 4.000 ndra matua si manga, baero ndra alawe hegöi iraono. 39 Me no aefa iwaʼö ba niha sato enaʼö mangawuli ira, möi ia ba dundraha, isawa mbanua Magada.+