Sara Korindro
16 Iadaʼa, sanandrösa ba dolo-tolo niʼowuloi ba niha niʼamoniʼö,+ miʼoʼö wanuturu lala nibeʼegu ba mbanua niha Keriso ba Galatia. 2 Ba ngaluo siföföna ero migu, mibeʼe yawa maʼifu gefemi moloʼö faʼabölömi zamösana, enaʼö böi awena miʼowuloi na tohare ndraʼo. 3 Na no ofetado ba daʼö, ufatenge ösa ndra talifusö si no mitötöi ba zurami fefu,+ si no hasara dödömi ba wamasao tolo-tolo andrö ba Yeruzalema. 4 Hizaʼi, na daʼö zabölö sökhi enaʼö möi ndraʼo ba daʼö, ba fao ndraʼaga weʼamöi khömi.
5 Awena möido ufalukhaisi ami na no aefa utörö Makedonia, börö me omasido möi ba Makedonia.+ 6 Te toröi ndraʼo khömi irege tebato mbaŵa deu. Aefa daʼö, tola fao ami awögu dania he ha matonga dalu lala. 7 Lö omasido na ha sabata falukha ita na utörö khömi. Na itehegö khögu Yehowa,* omasido na ara toröi ndraʼo khömi.+ 8 Iadaʼa, ba Nefeso toröi ndraʼo+ irege tefalua Gowasa Fendrakose, 9 börö me no tebokai mbawandruhö sebua fönagu ba wangai halöwö+ hewaʼae oya zanaisi.
10 Na tohare Dimoteo,+ miʼodödögö enaʼö lö faʼataʼunia khömi, börö me no ihalö halöwö Yehowa,*+ simane yaʼo. 11 Andrö böi so zangositengagö yaʼia. Mitolo ia enaʼö tola itohugö wofanö ba wamalukhaisi yaʼo, börö me udöna-döna ia hegöi ira talifusö tanö böʼö.
12 Sanandrösa khö dalifusöda Afolo,+ no ufangaösö ia weʼamöi khömi si fao ira talifusöda tanö böʼö. Hizaʼi, lö edöna möi ia iadaʼa. Möi ia na so ginötö.
13 Andrö böi miförö,+ miʼaroʼö ami ba wamati,+ yasimane ira matua ami.*+ Yaʼabölö ami.+ 14 Mifalua fefu hadia ia si fao faʼomasi.+
15 Tatu no aboto ba dödömi fefu nösi nomo Zitefana, yaʼira zi oföna tobali soloʼö Keriso ba Nakhaya, ba laforege wanolo niha niʼamoniʼö. Uʼandrö khömi yaʼami ira talifusö: 16 Enaʼö miʼoʼö wehede niha simane daʼö hegöi niha si falulu fohalöwö si no erege tödö.+ 17 Omuso sibai dödögu me no tohare Zitefana,+ Fotunato, ba Akhaiko. Oya nitolora yaʼo me lö hadöi yaʼami ba daʼa. 18 No laʼokafui dödögu hegöi tödömi. Mifosumange niha simane daʼö.
19 Fefu mbanua niha Keriso ba Provinsi Asia, lafaʼoheʼö wangowaira khömi. Simanö göi Akila ba Ferikila hegöi banua niha Keriso sowulo ba nomora,+ lafaʼoheʼö wangowaira soroi ba dödö ba khö Zoʼaya. 20 Laʼowai ami fefu ira talifusöda. Mitemaʼö ira soroi ba dödö.
21 Yaʼo sotöi Faulo, yaʼe wangowaigu, nisuragu samösa.
22 Sinangea muʼelifi niha si lö mangomasiʼö Soʼaya. He Soʼaya, yatohare ndraʼugö! 23 Yafao khömi waʼasökhi dödö sebua* moroi khö Zoʼaya yaʼita Yesu. 24 Uʼomasiʼö ami fefu, yaʼami si no ha sambua ba khö Keriso Yesu.