2 Moze

35 Aefa daʼö, ikaoni fefu ndraono Gizaraʼeli Moze enaʼö owulo ira ba imane, ”No iwaʼö khöda Yehowa enaʼö tafalua daʼa:+ 2 Tola mohalöwö ami ba zi önö ngaluo, hizaʼi miʼamoniʼö ngaluo si fitu. Daʼö luo wolombase, sabato khö Yehowa.+ Gofu haniha zohalöwö ba ngaluo daʼö, hasambalö labunu.+ 3 Gofu hezo toröi ami, tebai mifewuaʼö galitö ba ngaluo Sabato.”

4 Ba imane Moze ba ndraono Gizaraʼeli maʼafefu, ”Daʼa niwaʼö Yehowa: 5 ’Miʼowuloi dolo-tolo khö Yehowa.+ Dozi si no aoha gölö fameʼe,+ laʼohe dolo-tolo khö Yehowa yaʼia daʼö anaʼa, firö, tembaga, 6 bana sobalau, nukha si ungu laʼa-laʼa,* bana soyo,* nukha si sökhi, bu nambi,+ 7 uli mbiri-biri si matua si no laʼoyoni, uli nasu nasi, eu akasia, 8 fanikha wandru, fanikha famataro* awö zumange somuhua,+ 9 kara una, ba kara tanö böʼö si tola mubeʼe ba nukha gere*+ hegöi balu-balu dötöʼa.+

10 ”’Akha möi fefu niha si so nekhe-nekhe danga+ ba wamazökhi niwaʼö Yehowa, 11 yaʼia daʼö ose Lowalangi, nukha soguna ba nose hegöi lagö-lagö, famakhai, döla-döla eu, baʼa-baʼa, dane-dane si no mufotögi hegöi tuwu-tuwunia; 12 Tawöla+ hegöi bea-bea+ awö lagö-lagö,+ simanö göi nukha mbaʼa-baʼa;+ 13 meza+ hegöi bea-bea awö gama-gamania, simanö göi roti nibaliʼö sumange;+ 14 naha wandru,+ fandru, fanikha, ba gama-gamania;+ 15 naha wanunu sumange somuhua+ awö mbea-beania, fanikha famataro* hegöi sumange somuhua,+ nukha mbaʼa-baʼa ba mbawandruhö nose Lowalangi. 16 Ba lafazökhi göi naha wanunu sumange nitunu+ hegöi tarali moroi ba tembaga, bea-bea, ba fefu gama-gamania; baʼa nidanö awö duwu-tuwunia;+ 17 nukha mbaʼa-baʼa si tobali oto-oto golayama+ ba dane-dane nifotögi awö döla-dölania, nukha mbaʼa-baʼa ba mbawa göli golayama; 18 taru-taru nukha ba nose Lowalangi, simanö göi daru-taru awö zinali ba nukha mbaʼa-baʼa si tobali oto-oto golayama;+ 19 nukha nihaogö fanoso+ soguna khö ndra sangai halöwö ba naha niʼamoniʼö, baru niʼamoniʼö khö Gere Aʼaroni,+ awö nukha ndraononia matua ba wangai halöwö tobali ere.’”

20 Ba mofanö ndraono Gizaraʼeli föna Moze. 21 Lö ara, tohare niha si terou tödö ba wameʼe tolo-tolo+ khö Yehowa. Omuso dödöra ba wolohe ngawalö niʼogunaʼö ba wamazökhi ose waʼowulo, baru niʼamoniʼö, ba fefu zoguna ba wamosumange Lowalangi. 22 Fefu zaoha ölö, he ira matua hegöi ira alawe, lö laböhöli wolohe famakhai mbaru, ati-ati, laeduru, ba gama-gama sebua böli awö ganaʼa tanö böʼö. Labeʼe sumange* khö Yehowa fefu ganaʼa niʼohera.+ 23 Dozi ira labeʼe na so khöra mbana sobalau, nukha si ungu laʼa-laʼa,* bana soyo, nukha si sökhi, bu nambi, uli mbiri-biri si matua si no muʼoyoni, ba uli nasu nasi. 24 Fefu zomasi mameʼe firö hegöi tembaga, möi ira labeʼe khö Yehowa, simanö göi zomasi mameʼe eu akasia niʼogunaʼö ba wohalöwö andrö.

25 Fefu ndra alawe sonekhe mondrandra,+ möi ira laʼohe zi no lafazökhi, yaʼia daʼö bana sobalau, nukha si ungu laʼa-laʼa,* bana soyo, ba nukha si sökhi. 26 Fefu göi ndra alawe sonekhe, landrandra mbana moroi ba mbu nambi börö me terou dödöra wamalua daʼö.

27 Laʼohe gara una ira sondröniaʼö, ba kara tanö böʼö nifasa ba nukha gere* hegöi ba mbalu-balu dötöʼa,+ 28 fanikha famayoini ba fanikha wandru, fanikha famataro,*+ ba sumange somuhua.+ 29 Dozi iraono Gizaraʼeli si terou tödö ba wameʼe tolo-tolo, laʼohe zoguna ba halöwö niwaʼö Yehowa khö Moze. Fefu ira, he ira matua hegöi ira alawe, labeʼe daʼö si tobali tolo-tolo si no aoha gölö khö Yehowa.+

30 Aefa daʼö, imane Moze ba ndraono Gizaraʼeli, ”No ifili Yehowa zotöi Besaleʼeli ono Guri ono Huri moroi ba mado Yehuda.+ 31 No fahöna khönia geheha niʼamoniʼö moroi khö Lowalangi awö waʼatua-tua, faʼaboto ba dödö, fangiʼila, ba fefu waʼonekhe ba wamalua halöwö tuka 32 ba wamazökhi duma-duma domosa sedöna muʼehaogö, mamazökhi gama-gama moroi ba ganaʼa, firö, ba tembaga, 33 manaba ba mamaʼanö kara sebua böli, ba mangehaogö ngawalö gambara nifoe moroi ba geu. 34 Ibeʼe göi waʼatua-tua khö Mbesaleʼeli hegöi Oholiabi+ ono Gahizamakhi moroi ba mado Dano ba wamahaʼö niha böʼö. 35 Ibeʼe khöra waʼatua-tua+ Lowalangi ba wamalua halöwö tuka, ba wosuzi, ba wanoso faoma bana sobalau, nukha si ungu laʼa-laʼa,* bana soyo, ba nukha si sökhi awö ngawalö nisoso tanö böʼö. Yaʼira si darua andre lafazökhi ngawalö duma-duma domosa sedöna muʼehaogö ba oya ngawalö halöwö nifaluara.